Hesekiel 28
28
Äwa däm Kjennich von Tierus
1Un mie wort wada kloa, waut de Har to sajen haud. Hee säd: 2Menschensän, go un saj däm Leida en Tierus: Dit es waut Gott de Har sajcht: Wiels du soo prauzich worscht un dochst: “Ekj sie nu Gott; ekj hab nu eene Städ aus een Gott oppem Mäa.” Oba du best je bloos een Mensch un nich Gott, uk wan du die en dien Hoat jleefst, daut du met een Gott sust jlikj jetrocken woaren. #Jes 31,3; Dan 5,20; Apost 12,23
3Du jleefst du best kjlieekja aus Daniel,
daut doa nuscht es waut du nich aul weetst, #Hes 14,14; Dan 1,17
4un du jleefst daut de Weisheit auleen,
die haft Krauft opp jebut, daut du nu,
aul daut Selwa un Golt en die hast.
5Un du jleefst die em Haundlen soo weis,
un vedeensd soo väl Jelt en dee Tiet,
daut du stolt best jeworden en die,
un jleefst, daut bloos du hast soone Krauft.
6Dit es waut Gott de Har nu sajcht, wiels du die en dien Hoat met eenen Gott jlikjtrakjen deetst:
7Horch waut ekj saj: Ekj woa Fiend
opp die schekjen, dee ruchloos un stoakj
met die omgonen woaren. Un äa Schwieet
woat de Weisheit mank junt gaunz venichten,
un Straums von de Staut gaunz vedoawen. #Hes 30,11
8Du woascht rauf jeschupst en daut Loch,
un em Mäa deep em Wota, dän Doot
un daut Enj von dien Läwen, toobrinjen. #Hes 26,20
9Un nu saj, woascht du doa bie dien Doot
uk noch sajen, du best doch een Gott,
wan du ensitst de Macht äwa die,
un du bloos een Mensch best un kjeen Gott?
10Derch de Macht von de framde kjemst om,
un du stoafst aus een onbeschnädna,
dit lot jesajcht sennen von Gott däm Harn.
11Mie wort wada kloa, waut de Har to sajen haud. Hee säd: 12Menschensän, sinj emol dit Trualeet äwa däm Kjennich von Tierus. Gott de Har sajcht:
Du wieescht soo straum aus irjentwäa,
soo kluak un bloos soo schmock, #Hes 27,2
13du wieescht em Goaden Eden dan,
von Gott soo straum jekjleet,
met Sarder, Topas, Diamaunt,
un Turkis, Onniks noch,
un Jaspies, Safier, Malachit,
un Smaracht, diere Steen
en Golt jesat un schmock jewoakjt,
aum Dach aus du mol kjeemst. #1Mo 2,8; Hes 31,8-9
14Du wieescht een Cherub dän ekj aunstald,
Wajchta opp dän heiljen Gottesboajch
to sennen; un jinjst opp fieeje Steena.
15Gaunz onen Schult wieescht du von dan,
aus du noch gaunz kjlien wieescht,
bat eemol beeset jefungen wort
en woo du läwen deetst. 16Du haundelsd don met soo väl Woa,
de Macht wort die to Sind,
dan must ekj die, du Wajchta Cherub,
vom Gottesboajch vesteeten,
von mank dee fieeje Steen veschmieten.
17Du leetst soo schmock un worscht uk stolt,
de Weisheit dee du hautst, vedreidsd
du, om dien Straums to hoolen;
ekj klunjd dien Stolt dol bat em Blott
un leet die een Spikjtoakel woaren,
18Du brochst eene Schaund opp dien Heilichtum
derch onopprechtjet Haundlen un
dee väle Sinden doa;
daut ekj een Fia en diene Medd
woa loten aules vebrennen,
bat du ver aulem wäa doa kjikjt
bloos Ausch best oppe Ieed.
19Du best soo schrakjlich hanjerecht.
Een jiedra dee die kjant,
däm schudat daut un es vestalt.
Noch eemol kaust nich opp. #Hes 27,36
Äwa de Staut Sidon
20Un mie wort wada kloa, waut de Har to sajen haud. Hee säd: 21Menschensän, kjikj emol no Sidon un profezei äwa dee Staut: #Jes 23,2-4 22Dit es waut Gott de Har sajcht:
Du Sidon, nu horch häa,
veräakjent mott met die.
Ekj woa en diene Medd
nu miene Harlichkjeit
bewiesen, daut du sitst,
daut ekj de Har sie.
De Staut mott ver Jerecht,
un seenen hia un nu,
daut ekj de Heilja sie.
23Ekj schekj eene Krankheit han,
dee väle nich bestonen,
un oppe Gaussen woat
daut Schwieet soo väle schlonen,
daut jie daut dan woaren seenen,
de Har haft daut jedonen.
Israel woat en Fräd läwen
24Doa woat dan kjeent von de Nobasch rom Israel, dee an veacht haben, noch lenja een Stachel fa an sennen, dee an spekjt ooda wee deit.
25Dit es waut Gott de Har sajcht: Wan ekj wada de Israeliten von mank de Velkja, wua ekj dee nu vestreit hab, vesaumlen woa, dan woa ekj mie ver aule Velkja derch an wiesen, daut ekj heilich sie. Un see woaren en äa Launt wonen, daut ekj Jakob, dee mie deend, jejäft hab. 26See woaren doa en Fräd läwen un sikj äare Hiesa buen un Wiengoades aunplaunten. See woaren onvestieet wonen wan ekj ieescht äare Nobasch, dee an veachten deeden, ver Jerecht jenomen hab. Dan woaren see weeten daut ekj de Har, äa Gott sie.
Currently Selected:
Hesekiel 28: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
