Hesekiel 27
27
Daut Trualeet äwa Tierus
1Un mie wort noch wada kloa, waut de Har to sajen haud. Hee säd: 2Menschensän, fang emol aun dit Trualeet äwa Tierus to sinjen. 3Saj to de Staut aum Mäa, dee met de Velkja oppe Inseln haundelt:
Dit sajcht Gott de Har:
Tierus, dee du von die sajchst,
du best de schmokste Staut, #Hos 9,13
4un strakjst die wiet bat opp daut Mäa.
Du best soo aus daut schmokste Schepp
waut Bumeista wua buen;
5de Bräda sent von Taunenholt,
de Schepspost Zeedaholt
von Libanon un Senir jeholt, #5Mo 3,8-9
6de Roodeln sent von Ieekjenholt
von Baschan häa jeholt,
de Fluaren sent von Taunenholt
vom Launt von de Kittäa
met Aulfenbeen vezieet.
7Daut Säajel von Ägipten es
von utjeneidet Lienzeich,
un deent aus diene Flag.
Un bleiwe un bleiwroode Dakjen
sent von daut Elischa Volkj. #1Mo 10,4
8Toom roodlen wieren stoakje Mana,
von Sidon un Arwad,
oba de kluaka aun daut Stia
wia doch von Tierus selfst.
9Jewizte Mana von Gebal
veschmäaden june Schäp;
de Schäp von väle Lenda kjeemen
un koften von jun Woa. #1Kjen 5,32; Jos 13,5
10Von Persien, Liedia un von Libien
kjeemen stoakje Soldoten un deenden
en diene Armee. Een jiedra honk
sien Schilt un Hoot en june Staut
un jeef junt groote Aunerkjanunk.
11De Wajchta oppe Torms, dee wieren
von Helek un Arwad,
un wäaden jäajen jieda Fient.
De Waunt, dee honk voll Schilten,
soo straum leet kjeene aundre Staut.
12Jie kunnen Haundel driewen met Tarsis wiels jie soo rikj wieren. Jie hauden Selwa, Iesa, Zink, un Blie toom Haundel. 13Jawan, Tubal un Meschech haundelden met junt fa Sklowen un koppane Sachen. #Hes 38,2 14Jie haundelden june Sachen met Togarma un jie koften junt Mulasch von an un Pieed, waut jie toom Kjrich un uk fa jeweenelje Oabeit brukten. 15De Lied von Rodos un aundre Inseln haundelden met junt, un doaderch kjrieej jie Aulfenbeen un schwoatet Holt von Afrika. 16De Edomita haben väl von junt jekoft, un brochten junt kostboare Turkis Steena, bleiwet Zeich, utjeneide Sachen, feinet Lienzeich, Korralen un Rubinen. 17Juda un Israel vehaundelden Weit, Oliewen, Fiejen, Honnich, Eelj un Kjeen fa june Sachen. 18Damaskus haft välet jekoft von aul daut veschiedne waut jie häastalden, un brocht junt Wien von de Helbon Jäajent un Woll von Zahar. 19Wedan un Jawan haben die straume iesane Sachen, Kerneel un stoakjet Baunt von Usal jebrocht. 20Von Dedan kofst du die Pieets Dakjen fa de Rittasch. 21Von de Araba un von de Leidasch von Kedar kofst du de baste Schop un Kosen, wan see kjeepen kjeemen. #1Mo 25,13 22De Haundelslied von Saba un Ragma kjeemen met däm basten Balsam, met veschiedne kostboare Steena, un met goldne Sachen un haundelden opp junen Moakjt. #1Mo 10,7 23Doa wieren uk Haundelsmana von Haran, Kane un Eden, un soogoa von Assur un Medien. 24Von doa kofst du äare baste Kjleeda, dee von bleiwet Zeich jemoakt wieren un dan noch utjeneit un bunte Fluadakjen un Strank un Benja, dee jie opp jun Moakjt vekoften. 25De Tarsis Schäp fuaren rom no de Sachen waut jie haundelden.
Bat wiet oppem Mäa rieekjt dien Rikjtum.
26De Seemana fuaren met die
opp daut Mäa bat een Oostwint oppkjeem
un wiet opp daut Mäa die veschluach.
27De Sachen, de Woa un daut Straums,
met Seemana un Stieemana toop,
un Bumeista un Hendla von Woa,
un aul de Soldoten bie junt,
un Häaden von Menschen bie junt
vesinkjen doa wiet opp daut Mäa,
aum Dach wan jun Enj opp junt kjemt.
28De Seemana schrieen soo lud,
daut daut Launt aun daut Mäa zetren deit.
29De Roodla un Stieemana met
aul de Scheppmana, dee stieen fuaz auf
un stonen opp daut Launt,
30un schrieen un hielen äwa die.
See streien sikj Ieed opp däm Kopp
un setten en Schaund enne Ausch.
31See schnieden de Hoa von de Kjap
un trakjen daut Sakkjleet sikj aun,
em Trua fa die, un see schrieen
un hielen bloos bettalich lud.
32Em Trua woat een Leet aunjestemt
un Tronen jewescht äwa die;
es jeemols eene Staut soo aus jie,
soo stell jemoakt wiet opp daut Mäa?
33Diene Woa von daut Mäa freid soo väl,
un Kjennichs, dee worden dan rikj,
vom haundlen met Sachen von die.
34Nu es nuscht von de Staut hia jebläwen,
dee es en daut Mäa nenjerutscht,
de Woa un de Menschen tojlikj
sent wajch, un nu es aules to nuscht.
35De Lied opp daut Launt un aum Mäa,
dee stuzt daut, woo die daut nu jeit;
de Kjennichs vetrakjt daut Jesecht,
soo jrämen un enjsten see sikj.
36De Haundelsmana wiet rom de Welt,
dee zetren un tieren sikj nu;
soo groff un soo schwind best veschwungen,
un kaust nich mea oppstonen. #Hes 28,19
Currently Selected:
Hesekiel 27: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
