Hesekiel 25

Äwa de Amonita

1Un mie wort wada kloa waut de Har to sajen haud. Hee säd: 2Menschensän, kjikj emol no Amon opptoo, un profezei äwa an. #(2-7) Hes 21,33-37; Jer 49,1-6; Amos 1,13-15 3Saj to de Amonita: Horcht emol no waut Gott de Har sajcht: Dit es waut Gott de Har sajcht: Wiels jie junt freiden aus mien Heilichtum toschaund jemoakt wort, un aus Israel venicht wort, un aus Juda veschlapt wort, #Kloag 2,16; Hes 36,2 4doawäajen woa ekj die enne Macht von daut Volkj em Oosten äwajäwen. Dee woaren äare Zelten mank junt oppstalen un mank junt wonen. Dee woaren june Arnten äten un june Malkj drinkjen. 5Un ekj woa Raba to eene Weid fa Kameelen moaken, un en Amon woaren de Schop grosen, un jie woaren enseenen, daut ekj de Har sie. 6Dit es waut Gott de Har sajcht: Wiels du diene Henj klautschen deetst, un diene Feet traumplen deetst äwa Israel, un du die soo sea freien deetst äwa äaren Schoden, 7doawäajen woa ekj miene Macht jäajen die brinjen un de Velkja loten die bestälen. Du woascht mank de Velkja utjerot woaren un von mank de Lenda een Enj haben. Du woascht gaunz venicht woaren, daut du woascht enseenen, daut ekj de Har sie.

Äwa de Moabita

8Dit es waut Gott de Har sajcht: Moab un Seir sajen, daut daut judsche Volkj nuscht veschieden es von aule aundre Velkja. #(8-11) Jes 15,1-9; 16,1-4; Jer 48,1-47 9Oba nu horcht, ekj woa daut groote Eewa en Moab aufriemen, bat aul de Städa en dee gaunze Jäajent venicht sent. Soogoa de aunjeseene Städa, Bet Jeschimot, Baal Meon, un Kirjatajim. 10Daut Volkj vom Oosten woat junt, toop met de Amonita, opp emma ennämen, un ekj woa daut soo romkomen loten, daut jie nich mea woaren aus een Volkj aunjeseenen woaren. 11Ekj woa daut Jerecht loten äwa Moab komen, un see woaren enseenen, daut ekj de Har sie.

Äwa de Edomita

12Dit es waut Gott de Har sajcht: Wiels Edom Rach jeeeft haft aun Juda un sikj met daut sea veschulcht haft, #(12-14) Hes 35,1-15; Jer 49,7-22; Amos 1,11-12; Oba 1,1-21; Psa 137,7 13woa ekj miene Macht jäajen Edom komen loten un äare Menschen un äa Vee utroden, soo daut aules vedorwen es von Teman bat Dedan. Dee woaren unja daut Schwieet faulen. Soo sajcht Gott de Har. 14Un ekj woa mie derch mien Volkj Israel aun Edom rajchen, un dee woaren met Edom omhäa gonen, doano aus see mie enjeoajat un veläajen jemoakt haben. Soo woaren see to feelen kjrieen, woo ekj trigjtol, sajcht Gott de Har.

Äwa de Filista

15Dit es waut Gott de Har sajcht: Wiels de Filista aun mien Volkj äare Rach jeeeft haben un mien Volkj soo onen Jewessen venicht haben, #(15-17) Jes 14,29-32; Jer 47,1-7; Amos 1,6-8; Zef 2,4-5 16doawäajen sajcht Gott de Har: Horcht, ekj woa miene Macht jäajen de Filista komen loten, un woa de Kreeta utroden, un de latste, waut aum Mäa äwabliewen, ombrinjen. 17Ekj woa mie aun an rajchen un an groff bestrofen, un see woaren enseenen, daut ekj de Har sie, wan ekj an trigjtol.

Currently Selected:

Hesekiel 25: PB

Highlight

Copy

Compare