Hesekiel 24

Jerusalem woat met een rostaja Gropen vejlikjt

1Dan wort mie kloa, waut de Har mie sajen wull. Daut passieed en daut 9. Joa aun dän 10. Dach von de 10. Moonat. Hee säd: #2Kjen 25,1 2Menschensän, hool disen Dach em Denkj. Moakj die disen Dotem, wiels vondoag haft de Kjennich von Babel sien Loaga rom Jerusalem jesat. 3Jeff dit stieekopje Volkj dise Jeschicht, daut see doaräwa nodenkjen. Saj an: Dit es waut Gott de Har sajcht:

Brinjt emol een Gropen

un stalt däm opp daut Fia.

Jeet doa Wota nenn, #Hes 11,3

4un schmiet doa Fleesch nenn.

Laj de baste Stekja

von Schinkjen un Schulla nenn,

un scheene fleeschje Knoakes

5von daut baste Schop.

Laj doa Brenholt nunja,

un moak een heetet Fia;

lot de Knoakes koaken

bat aules mäa un goa es.

6Dit es waut Gott de Har sajcht:

Woo saul daut met de Staut gonen,

dee soo väl Lied haft omjebrocht?

See es aus een verostada Gropen,

dee nienich reinjemoakt es.

Nemm de Stekja doa rut;

een Stekj aus daut aundre;

eendoont woont daut ieeschte. #Hes 22,2; Nah 3,1

7De Menschen haben en äare Staut

oschuldje Menschen omjebrocht.

Daut Bloot licht opp een kolen Steen;

wan daut wia oppe Ieed jewast,

haud eena daut veschoawen kunt. #3Mo 17,13; 1Sam 14,32-34

8Ekj leet daut Bloot oppem kolen Steen,

daut see daut nich veschoawen wudd,

soo daut mien Oaja sikj nich lajen wudd,

un see daut kjrieech waut ar jehieed.

9Nu sajcht Gott de Har:

Dit woat de Staut noch schlajcht gonen.

Dee haft sikj groote Schult jemoakt,

fa Läwes waut sent omjebrocht;

ekj moak mien Holtfia krakjt soo groot.

10Brinjt mea Holt! Knoat daut aun!

Moakt daut Fleesch gaunz wieekj un goa,

dan jeet daut Wota doavon auf,

un reesch de Knoakes schwoat.

11Dan stal dän ladjen Gropen opp

un hett noch eemol goot,

daut de Gropen jläat un de Borkj vedonst

un daut Rosta doavon looslat.

12Emsonst hab ekj mie hia bemieecht.

Daut Rosta es soo schlemm un väl,

dee kjemt soogoa em Fia nich loos.

13Du hast die derch dien onbandjet Läwen orrein jemoakt, un hast die nich loten rein moaken, aus ekj uk noch rein moaken wull. Doawäajen woascht du nich wada rein jemoakt woaren, bat mien Oaja sikj utjespält haft. #Hes 5,13 14Ekj, de Har, hab dit jesajcht.

Daut woat romkomen,

ekj woa daut doonen,

ekj woa nich schoonen,

ekj jäw nich no.

Mie woat daut nich schod sennen,

dee woaren die rechten,

fa daut waut du deetst,

un woo du don läwsd,

soo sajcht Gott de Har. #Jer 13,14

Däm Profeet siene Fru stoaft

15Un mie wort kloa waut de Har to sajen haud. Hee säd: 16Menschensän, horch emol. Daut waut diene Uagen sea jleichen, woa ekj plazlich wajchnämen. Oba wan ekj daut doo, saust du nich truaren ooda hielen. Du saust kjeene Tronen faulen loten. 17Droag daut gaunz em stellen, oba komt nich toop toom sinjen. Droag diene Koppbinj un go nich boaft; hool die nich diene Haunt äwa dien Mul un lot de Nobasch die kjeen Broot toostieren. #Hos 9,4; Micha 3,7

18Zemorjes räd ekj noch to daut Volkj, un dänselwjen Owent storf miene Fru. Un dän näakjsten Morjen deed ekj waut de Har mie jesajcht haud. 19Un de Lied fruagen mie: Woascht ons sajen waut daut meent, daut du soo wieda jeist? 20Un mie wort wada kloa, waut de Har to sajen haud. Hee säd: 21Saj de Israeliten: Dit es waut Gott de Har sajcht: Horcht emol. Ekj woa mien Heilichtum, wua jie soo jieren hangonen, woont jie soo sea jleichen, un no dän jie soon velangen haben, loten toschaund gonen, un june Famieljes, dee jie bie Jerusalem jeloten haben, woaren em Kjrich stoawen motten. 22Un dan woa jie krakjt soo doonen aus ekj jedonen hab. Jie woaren junt nich de Haunt äwa daut Mul hoolen, un de Nobasch nich loten junt Broot toostieren. 23Nä, jie woaren junt de Koppbinjen oppsaten un woaren nich boaft gonen; jie woaren nich truaren ooda hielen. Oba jie woaren em stellen vegonen, wäajen june Schult, un eena toom aundren stänen. #3Mo 26,39-40 24Hesekiel woat een Tieekjen fa junt sennen, un jie woaren dan, wan dee Tiet kjemt, soo doonen aus hee nu jedonen haft. Dan woa jie enseenen, daut ekj Gott de Har sie. #Hes 12,6.11

25Un du, Menschensän, paus mau opp. Aun däm Dach wan ekj an de vesechade Städ wajchnäm, wua see soo jieren hangonen, dee see soo sea jleichen, un no dee see soon velangen haben, un dan uk noch äare Säns un Dajchta von doa wajchnäm, 26dan aun dän Dach woat eena von doa jerant komen un die sajen, waut jeworden es. #Hes 33,21 27Un dan aun dän Dach, wan dee waut sikj doa wajchjebrocht haft, no die kjemt, woat diene Stemm trigjkomen, daut du to am räden kaust un nich mea woascht stomm sennen. Du woascht een Tieekjen fa an sennen, soo daut see enseenen woaren, daut ekj de Har sie.

Currently Selected:

Hesekiel 24: PB

Highlight

Copy

Compare