2. Mose 3
3
Gott roopt Moses
1Moses wia fa eene lenjre Tiet een Schophoad fa sienen Schwieevoda Jitro, de Priesta en Midian. Nu juach hee siene Schop eenen Dach bat aun de aundre Sied von de Wiltnis, bat hee bat Horeb, däm Gottesboajch, kjeem. #(1-12) Apost 7,30-34 2Un aus hee doa wia, wees sikj ver am een Enjel vom Harn en Flaumen en eenen Bosch. Moses foll daut opp, daut doa Fia wia, oba de Bosch nich vebrend. #5Mo 33,16 3Dan säd Moses: Dit well ekj mie von dichta bie beseenen. Dit es doch sondaboa, daut de Bosch nich vebrent. 4Un aus de Har sach, daut hee doa han kjeem, roopt Gott von em Bosch: Moses, Moses! Un hee säd: Ekj sie hia. 5Un Gott säd: Komm hia nich noda, un nemm die dien Footich auf. De Städ opp woone du steist es heiljet Launt. #1Mo 28,17; Jos 5,15 6Un hee säd wieda: Ekj sie dien Voda sien Gott, Abraham sien Gott, Isaak sien Gott un Jakob sien Gott. Doamet bedakjt Moses sikj daut Jesecht. Hee haud Angst Gott auntokjikjen. #1Mo 17,1; 28,1-4; 35,9-11; Mat 22,32 7Dan säd de Har: Ekj hab daut goot jeseenen, woo mien Volkj von de Ägipta jekjwält woat. Un ekj hab jehieet, daut see unja äare Oppsechta stänen, un mie besorcht daut, daut see soo lieden. #2Mo 2,23 8Un nu sie ekj jekomen, an von unja de Ägipta äare Jewault to raden. Ekj woa an ut daut Launt rutbrinjen, un an no een goodet un grootet Launt brinjen. Daut es een Launt wua Malkj un Honnich ranen, wua nu de Kanaanita, de Hetita, de Amorita, de Perisita, de Hiwita, un de Jebusita wonen. 9Ekj saj die daut noch een mol: Ekj hab daut roopen von de Israeliten jehieet, un ekj hab daut jeseenen, woo de Ägipta an kjwälen. 10Nu es daut aun die! Ekj well haben, daut du no däm ägiptischen Kjennich jeist, un daut du mien Volkj, de Israeliten, ut Ägipten rut fieescht. #2Mo 7,16; Rech 6,14 11Un Moses säd to Gott: Wäa sie ekj, daut ekj no däm Kjennich gonen saul, de Israeliten ut Ägipten rut to brinjen? #2Mo 4,10; 1Mo 32,11; 2Sam 7,18; Jes 6,5.8; Jer 1,6 12Un Gott säd: Ekj woa met die sennen. Un dit lot die een Tieekjen sennen, daut ekj deejanja sie, dee die jeschekjt haft: Wan du daut Volkj ut Ägipten rut brinjst, woa jie opp disen Boajch Opfa brinjen. #Jer 1,8
13Dan säd Moses to Gott: Kjikj emol, wan ekj no de Israeliten go un an saj: June Vodasch äa Gott haft mie no junt jeschekjt, un see dan froagen: Waut fa eenen Nomen haft dee? waut saul ekj an dan sajen? 14Un Gott säd to Moses: Ekj sie, dee ekj sie. Un hee säd: Soo saust du to de Israeliten sajen: “Ekj sie”, haft mie no junt jeschekjt. #2Mo 6,2; Mal 3,6; Opb 1,4.8 15Un Gott säd wieda to Moses: Soo saust du de Israeliten sajen: De Har, june Vodasch äa Gott, Abraham sien Gott, Isaak sien Gott, un Jakob sien Gott, haft mie no junt jeschekjt.
Dit es mien Nomen opp emma.
Jie sellen nienich opphieren, dän auntobäden. #2Mo 6,2-3; Jes 42,8
16Go nu, un roop de Leida en Israel un saj an: De Har, june Vodasch äa Gott, haft sikj mie jewäsen. Abraham, Isaak, un Jakob äa Gott sajcht: Ekj hab mie junt aunjeseenen, un daut waut see junt en Ägipten aundoonen. 17Un ekj hab jesajcht, daut ekj junt woa von unja de Ägipta äare Jewault rutbrinjen, no daut Launt von de Kanaanita, Hetita, Amorita, Perisita, Hiwita un Jebusita, een Launt wua de Malkj un Honnich ranen. 18Un see woaren no junt horchen, un du un de Leida en Israel sellen nom ägiptischen Kjennich gonen un am sajen: De Har, de Hebräa äa Gott, haft sikj ons jewäsen. Doawäajen froag wie nu, auf wie derwen eene dree doagsche Reis enne Wiltnis nenn moaken, daut wie däm Harn onsen Gott doa een Opfa brinjen. #2Mo 5,1.3 19Oba ekj weet, daut de ägiptischa Kjennich junt daut nich woat loten, nich buta hee onbedinjt mott. 20Ekj woa oba miene stoakje Haunt utstrakjen un dee loten opp Ägipten komen, met aul miene Wunda, dee ekj doa doonen woa, un no däm woat hee junt gonen loten. 21Ekj woa daut soo rombrinjen, daut de Ägipta junt woaren goot toojedonen sennen, soo, daut wan jie ieescht veloten woaren, woa jie nich met ladje Henj rutgonen. #2Mo 11,2-3; 12,35-36; 1Mo 15,14 22Jieda Fru woat von äare Nobafru, ooda von soone waut en äa Hus komen, froagen no selwane un goldne Sachen, un uk no Kjleeda. Un jie woaren june Säns un june Dajchta dee droagen loten, un soo woa jie de Ägipta bestälen.
Currently Selected:
2. Mose 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.