2. Samuel 24

David lat de Menschen talen

(1Chr 21,1-6)

1Een aundatmol wia de Har onwellich met Israel, un hee reizt David un säd to am: Go emol, un tal de Menschen en Israel un Juda. 2Un David schekjt Joab, dän Kommandaunt von de Armee, daut hee aule Menschen en Israel talen sull. Hee sull von Dan bat Beerscheba gonen, daut hee weeten kunn woo väl daut wieren. #(2 un 3) 2Mo 30,12 3Oba Joab säd toom Kjennich: Mucht de Har dien Gott daut Volkj noch hundatmol jrata moaken en diene Läwestiet. Oba wuarom velangt mien Har, de Kjennich, dit? 4Oba de Kjennich bleef opp sien Stekj. Un Joab un de aunjestalde jinjen wajch vom Kjennich om de Israeliten to talen. 5See jinjen derch däm Jordan un fungen bie Aroer, de Staut medden en daut Tol aun. Von doa jinjen see no Gad un dan no Jaser, #5Mo 2,36 6dan no Gilead, un uk no Kadesch, en de Hetita äare Jäajent. Von doa jinjen see no Dan un uk bat Sidon, 7un dan siedlich no Tierus, de Staut met de dikje Mia un aul daut Jewäa, un aul de Städa wua de Hiwita un Kanaanita sent, un schlieslich no Beerscheba un daut Launt en daut siedne Poat von Juda. 8Daut neem an 9 Moonat un 20 Doag soo derch daut gaunze Launt to gonen, un dan kjeemen see trigj no Jerusalem. 9Un Joab jeef däm Kjennich disen Berecht. En Israel wieren 800.000 Mana dee en de Armee deenen kunnen, un en Juda wieren noch emol 500.000.

Daut Volkj woat bestroft

(1Chr 21,7-17)

10Aus David daut Volkj ieescht jetalt haud, ploagd am sien Jewessen. Un David säd to däm Harn: Ekj hab eene groote Sind jedonen en dit. Un nu bedd ekj, Har, nemm mie miene Schult auf. Ekj sie sea onbedocht jewast. #2Sam 12,13 11David haud eenen Profeet, Gad, von däm hee goode Ensecht kjrieech. Un Gad kjeem dän näakjsten Morjen aus David oppjestonen wia met een Wuat vom Harn un säd: #1Sam 22,5; 1Chr 29,29; 2Chr 29,25 12Go un saj David hee kaun von dree Dinja wälen woont ekj doonen saul. 13Un Gad jinkj no David un hilt am dee väa: Sellen doa dree Joa Hungaschnoot komen, ooda daut du dree Moonat ver diene Fiend flichten motst, ooda eene schlemme dree doagsche wankende Krankheit? Denkj die daut derch, un saj mie waut vonne Auntwuat ekj däm Harn, dee mie jeschekjt haft, jäwen saul. #Jer 24,10; Hes 6,11-12 14Un David säd to Gad: Dit es eene schlemme Sach. Oba lot mie nich en Menschenhenj faulen. Lot Gott leewa met siene Haunt opp mie komen, wiels hee es jenstich. 15Un de Har schekjt dän Morjen eene schlemme wankende Krankheit opp Israel, dee fa de bestemde Tiet väahilt. En daut gaunze Launt, von Dan bat Beerscheba storwen doa Menschen, 70.000 aules toop. 16Dan aus däm Harn sien Enjel reed wia de Krankheit opp Jerusalem to brinjen, kjrieech de Har doa aundre Jedanken äwa, un hee säd to dän Enjel, dee de Doodes brocht: Nu hia opp. Daut es jenuach. De Enjel wia bat dän Draschplauz bie Arauna dän Jebusita. #1Mo 19,13; 2Mo 12,23; Jes 54,16 17Un David sach dän Enjel, woona de Krankheit opp daut Volkj brocht, un David säd toom Harn: Ekj hab jesindicht. Ekj hab orrajcht jedonen. Lot dän Schoden leewa opp mie un miene Famielje komen un nich opp dise oschuldje Menschen. #4Mo 16,22

David brinjt een Opfa

(1Chr 21,18-27)

18Un Gad kjeem no David un säd to am: Go no dän Draschplauz bie Arauna dän Jebusita, un stal doa eenen Aultoa opp fa dän Harn. 19Un David jehorcht däm Harn sien Wuat un deed waut Gad am säd. 20Un aus Arauna oppkjikjt un däm Kjennich un siene Mana no am komen sach, jinkj hee am entjäajen un kjneed sikj bat opp de Ieed ver David. 21Un Arauna säd: Mien Kjennich, wuarom best du no mie jekomen? Un David säd: Ekj sie jekomen, wiels ekj mucht dien Draschplauz von die kjeepen un doa eenen Aultoa fa däm Harn buen, soo daut de schlemme wankende Krankheit kunn oppjehoolen woaren. 22Un Arauna säd to David: Mien Har un Kjennich, nemm dän Plauz un moak soon Opfa aus du west. Hia kaust miene Rinda doatoo schlachten un nemm de Draschschlap un daut Joch fa daut Holt. 23Ekj jäw die daut hia, mien Kjennich. Mucht de Har dien Gott dien Opfa aunnämen. 24Oba de Kjennich säd to am: Nä, ekj woa die daut aufkjeepen. Ekj woa nich een Opfa fa däm Harn mienen Gott moaken von daut waut mie nuscht jekost haft. Un soo koft David dän Draschplauz un de Rinda fa 50 Selwastekja. 25Un David bud eenen Aultoa fa däm Harn un muak doa Brauntopfa un Dankopfa. Un de Har auntwuad sien Jebäd fa daut Volkj, un de Krankheit wort oppjehoolen. #2Sam 21,14

Currently Selected:

2. Samuel 24: PB

Highlight

Copy

Compare