2. Samuel 23

David siene latste Wieed

1David, Isai sien Sän, wia von Gott huach erhowen, un hee wia von Jakob sienen Gott jesaulft. Hee hinjaleet scheene Leeda un jeef dise wichtje Varzh aus siene latste Wieed: #1Sam 16,13

2Däm Harn sien Jeist rät to mie; siene Wieed sent en mien Mul. 3Israel äa Gott haft jerät, dee wäa Israel Schutz jeft aus een Boajch, haft to mie jesajcht: Een Kjennich dee rajcht deit, un en Forcht fa Gott rejieet, 4dee es aus daut Morjenlicht aun een kloaren Dach, un aus de Räajen dee daut Graus aum waussen brinjt. #Rech 5,31 5Woat Gott nich miene Nokomen soo säajnen? Haft hee nich eenen eewjen Bunt met mie jemoakt, dee doa foadich un secha es? Woat hee nich wiedahans halpen un aules jäwen no waut ekj froag? #2Sam 7,16 6Oba de gottloose Menschen sent aus Distlen, dee eena tosied hoakjt; kjeena nemt dee en de Haunt. 7Eena brukt een Iesa un eenen Spies fa dee; dee woaren gaunz vebrent, wua see sent.

David siene Kjrieja

(1Chr 11,10-41)

8Hia es eene List von David siene aunjeseene Soldoten: Jischbaal, de Hachmonita wia de väaschta von de Dree. Dee jinkj met sien Spies jäajen 800 Maun un brocht dee aula en eene Schlacht om. 9Daut tweede von de Dree wia Eleasar, Dodo sien Sän, een Ahoachita. Hee wia met David aus see de Filista, dee sikj toom Kjrich reedjestalt hauden, trozten un dan flichten musten. 10Eleasar bleef stonen un schluach de Filista bat am de Haunt aun sien Schwieet vekraumpt wia un nich loosloten kunn. De Har jeef eenen grooten Siech dän Dach un de Israeliten jinjen trigj un bestoolen de Jefolne dee Eleasar jeschloagen haud. 11Un dan de näakjsta von de Dree wia Schama, Age von Harar sien Sän. De Filista saumelden sikj bie Lehi, wua een Schaubelflekj wia, un de Mana flichten ver de Filista. 12Oba Schama bleef medden opp de Stap stonen un kjamft, un brocht de Filista om. De Har jeef eenen grooten Siech dän Dach.

13Eemol aus de Arnttiet wia, wia David en de Heel bie Adullam un de Filista hauden sikj en daut Refaim Tol jeloagat. Dan kjeemen dree von de 30 Armeeleida no David #1Sam 22,1 14wua hee sikj daut en de Heel jesechat haud. De Filista oba hauden Betlehem enjenomen. 15Un David darscht doa, un hee säd jrodsoo: Wan ekj doch waut Wota drinkjen kunn von däm Borm, dee bie Betlehem biem Puat es. 16Dan jinjen de dree aunjeseene Soldoten un muaken äaren Wajch derch de Filista äa Loaga, schapten waut Wota von däm Borm dee bie Betlehem biem Puat wia, un brochten David daut. Oba David drunk doa nich von. Hee goot daut aus een Opfa ver däm Harn ut #1Sam 7,6 17un säd: Von dit kaun ekj, Har, opp kjeenen Wajch drinkjen. Daut wia aus wan ekj daut Bloot drunk von dee, dee äa Läwen opp Spell saden, daut to holen. Un hee drunk daut nich. Oba dit es waut de dree aunjeseene Soldoten deeden.

18Abischai, de Brooda aun Joab, un Zeruja äa Sän, wia de väaschta von de Dartich. Eemol jinkj hee met sien Schwieet jäajen 300 Maun un brocht dee om. Dan kjrieech hee uk soone Aunerkjanunk aus de Dree. #2Sam 21,17 19Hee wia dee waut daut baste bekaunt wia von de 30 un wort dee äa Kommandaunt. Oba hee wort nich jlikjetrocken met de Dree.

20Un Benaja, Jojada von Kabzeel sien Sän, wia uk een aunjeseena Soldot. Hee schluach twee von de Moabita äare baste Kjrieja. Un emol aun eenen schneejen Dach jinkj hee auleen en een Loch met een Leiw, un schluach däm doot. #Jos 15,21; 2Sam 8,18 21Eemol schluach hee uk eenen grooten Ägipta doot. De Ägipta haud een Spies en de Haunt un Benaja haud bloos eenen Stock. Oba hee fipst janem sien Spies ut de Haunt un brocht am met sienen ieejnen Spies om. 22Soont deed Benaja, Jojada sien Sän. Hee wort jlikj jetrocken met de Dree. 23Hee wia huach aunjeseenen von de 30, oba hee wia nich eent von de Dree. Un David muak am toom väaschten von siene Wajchta.

24De 30 wieren: Joab sien Brooda Asael, un Elhanan, Dodo von Betlehem sien Sän, #2Sam 2,18 25Schama von Harod, Elika von Harod, 26Helez de Peletita, Ira, Ikkesch von Tekoa sien Sän, #1Chr 27,9.10 27Abieser von Anatot, Sibbechai de Huschatita, 28Zalmon de Ahoachita, Mahrai von Netofa, 29Heled, Baana von Netofa sien Sän, Ittai, Ribai von Gibea mank de Benjaminita sien Sän, 30Benaja von Piraton, Hiddai von de Riefasch bie Gaasch, 31Abialbon de Arbatita, Asmawet von Bahurim, 32Eljachba von Schaalbon, Jonatan von Jaschen siene Säns, 33Schama von Harar, Ahiam, Scharar von Harar sien Sän, 34Elifelet, Ahasbai von Maacha sien Sän, Eliam, Ahitofel von Gilo sien Sän, #2Sam 15,12 35Hezro von Karmel, Paarai de Arabita, 36Jigal, Natan von Zoba sien Sän, Bani de Gadita, 37Zelek de Amonita, Nachrai von Beerot, dee daut Schilt druach fa Joab, Zeruja äa Sän, 38Ira de Jatirita, Gareb de Jatirita, 39Uria de Hetita. Aules toop wieren daut 37. #2Sam 11,3

Currently Selected:

2. Samuel 23: PB

Highlight

Copy

Compare