2. Kjennichs 8

Elisa halpt de Fru wada

1Elisa haud to de Fru, dee äa Sän hee daut Läwen wadajejäft haud, jesajcht: Moak die reed un trakj met diene Famielje un bliew aundatwäajes, wua du kaust. De Har woat eene Hungaschnoot no dit Launt schekjen. Dee woat säwen Joa aunhoolen. #2Kjen 4,35 2De Fru muak sikj reed un trock wieda, soo aus Elisa ar jesajcht haud. See trock en de Jäajent von de Filista un bleef doa fa säwen Joa. 3Aus de säwen Joa äwa wieren, kjeem de Fru trigj von de Filista Jäajent. Un see jinkj no däm Kjennich un wull haben, hee sull ar halpen äa Hus un Launt trigj to kjrieen.

4Oba jrod don räd de Kjennich met Gehasi, Elisa sien Deena. Un de Kjennich säd: Vetal mie emol aul de groote Dinja waut Elisa jedonen haft. 5Un krakjt aus hee am vetald, woo Elisa eenem toom läwen brocht dee jestorwen wia, kjeem krakjt dee Fru, dee äa Sän hee daut Läwen jejäft haud. See fruach däm Kjennich no äa Hus un äa Launt. Un Gehasi säd: Mien Har un Kjennich. Dit es dee Fru, un hia es äa Sän, dän Elisa wada Läwen jeef. 6Un de Kjennich fruach de Fru doano, un see vetald am daut. Dan stald de Kjennich eenen von siene Beaumte aun un säd to am: See doano daut see aules trigj kjricht, waut ar jehieet. Un see uk doano, daut see aul dän Vedeenst von daut Launt fa de säwen Joa kjricht, fa dee gaunze Tiet, daut see wajch wia.

7Eemol jinkj Elisa no Damaskus. De Kjennich von Aram, Kjennich Ben Hadad, wia don krakjt krank. Un see säden dän Kjennich: De Gottesmaun es häa jekomen. 8Un de Kjennich säd to Hasael: Nemm waut Jeschenkja un go no däm Gottesmaun un lot am dän Harn froagen, auf ekj dise Krankheit woa loos woaren. 9Un Hasael jinkj no Elisa un neem Jeschenkja von veschiedne diere Sachen von Damaskus met. Hee brukt 40 Kameelen om daut aula to fieren. Un aus hee no Elisa kjeem, säd hee: Dien Deena Ben Hadad, de Kjennich von Aram, schekjt mie no die. Hee frajcht, auf hee von dise Krankheit woat bäta woaren. 10Un Elisa säd to am: Go un saj am, hee woat jesunt woaren. Oba de Har haft mie jewäsen, daut hee stoawen woat. 11Un de Gottesmaun kjikjt een langet stoot sea iernst, un hield. #(11 un 12) Luk 19,41-44 12Dan säd Hasael: Wuarom hielst du, mien Har? Un hee säd: Ekj hiel wiels ekj weet, waut von Schoden du Israel aundoonen woascht. Du woascht äare Städa met Mieren aunstekjen un vebrennen un woascht äare junge Mana met daut Schwieet ombrinjen. Du woascht äare kjliene Kjinja doot schlonen un woascht de Frues opschnieden, dee schwanga sent. #2Kjen 10,32 13Un Hasael säd: Woo kaun ekj, dien Deena, dee doch bloos een Hunt es, soone jewaultje Dinja doonen? Un Elisa säd: De Har haft mie daut weeten jeloten, daut du woascht Kjennich äwa Aram sennen. #1Kjen 19,15 14Un Hasael jinkj wajch von Elisa un jinkj no sienen Kjennich. De Kjennich säd dan to am: Waut haft Elisa die jesajcht? Un hee säd: Hee säd du wurscht bäta woaren. 15Dän näakjsten Dach neem Hasael eene Dakj un dukt dee en Wota. Un hee spreed dee äwa däm Kjennich sien Jesecht un dee storf. Dan wort Hasael Kjennich äwa Aram.

De Kjennichs Joram un Ahasja en Juda

(2Chr 21,1-20)

16Aus Joram, Ahab sien Sän, en sien feftet Joa aus Kjennich äwa Israel wia, wort Joram, de Sän von Joschafat, dee noch Kjennich en Juda wia, de Kjennich äwa Juda. #1Kjen 22,51 17Joram wia 32 Joa oolt aus dit wort, un hee wia acht Joa Kjennich. 18Hee wia soon Kjennich aus de Kjennichs en Israel jewast wieren, un soo aus Ahab jewast wia. Siene Fru wia eene von Ahab siene Dajchta. Un hee deed waut däm Harn schlajcht jefoll. 19Oba de Har wull Juda nich venichten, om David sient haulwen, dee am tru jewast wia. De Har haud David jesajcht daut David un siene Säns wudden emma een Licht en Jerusalem fa am sennen. #2Sam 7,11-16; 1Kjen 11,36

20Un en de Tiet aus Joram Kjennich wia, muaken de Edomita sikj loos von Juda un stalden äaren ieejnen Kjennich äwa sikj. 21Dan jinkj Joram met aul siene Kjrichswoages no Zair, un enne Nacht jreep hee de Edomita, dee rom am wieren un uk de Kommandaunten äwa de Woages, aun. Un de Soldoten randen aula no Hus. 22Un Edom bleef onaufhenjich von Juda, soo aus daut uk noch vondoag es. Libna muak sikj en dee Tiet uk frie. 23Waut noch to de Jeschicht von Joram jehieet, un aules waut hee jedonen haft, es aules en daut Buak von de Jeschicht von de Kjennichs en Juda jeschräwen. 24Un Joram storf un wort begroft, wua siene Vodasch begroft wieren, en de Davidstaut. Sien Sän Ahasja wort Kjennich no am. #2Chr 22,1-6

25En daut twalfte Joa daut Joram, Ahab sien Sän, Kjennich en Israel wia, wort Ahasja, Joram sien Sän, Kjennich äwa Juda. 26Ahasja wia 22 Joa oolt aus hee Kjennich wort, un hee wia een Joa Kjennich. Siene Mutta wia Atalja, dee eene Grootdochta wia aun däm Kjennich Omri von Israel. #2Kjen 11,1 27Hee haundeld soo aus Ahab un siene Nokomen deeden, un deed waut däm Harn schlajcht jefoll. 28Hee jinkj met Kjennich Joram, Ahab sien Sän, toom jäajen Hasael, däm Aramäa Kjennich, to kjamfen wäajen Ramot en Gilead. Doa wort Joram von de Aramäa vewunt. 29Un de Kjennich Joram jinkj no Jesreel, daut hee sikj von siene Wunden veholen kunn. Hee haud de Wunden en Rama en dän Kjrich jäajen Hasael, dän Kjennich von de Aramäa jekjräajen. Un de Kjennich Ahasja von Juda, Joram sien Sän, jinkj no Jesreel om Joram, Ahab sienen Sän, to besieekjen, aus hee doa krank lach. #2Kjen 9,14-16

Currently Selected:

2. Kjennichs 8: PB

Highlight

Compare

Copy