2. Kjennichs 7

Elisa sien Wuat en de Noot

1Oba Elisa säd to am: Horch emol waut de Har sajcht: Dit es waut de Har sajcht: Morjen om dise Tiet woat eena fief Kilo Weitmäl ooda uk tieen Kilo Joascht fa een Selwastekj kjeepen kjennen, hia en daut Puat von Samaria. #(1 un 2) 2Kjen 7,19 2Dan säd de Kapitän dee met däm Kjennich wia: Soogoa wan de Har Fenstren en däm Himmel op muak, woo kunn soont sennen? Un Elisa säd: Du woascht daut selfst seenen, oba du woascht nich doavon äten.

3Nu wieren doa vea Mana bie daut Stautspuat, dee aula Lepra Krankheit hauden. Un eena von dee säd: Wuarom bliew wie hia bat wie stoawen? #3Mo 13,46 4Hia woa wie boolt vehungren. Oba wan wie en de Staut nengonen woa wie doa uk vehungren. Well wie emol en de Aramäa äa Loaga gonen. Wan see ons doot moaken, sent wie doot. Un wan see ons läwen loten, dan kjenn wie läwen. 5Dan aus daut diesta wort, jinjen see no de Aramäa äare Zelten. Un aul bie de ieeschte Zelten sagen see daut doa kjeene Menschen wieren. 6De Har haud de Aramäa loten een grootet Jelud hieren von Pieed un Woages un eene groote Armee. Un see hauden sikj jesajcht daut de Kjennich von Israel haft de Hetita Kjennichs un de ägiptische Kjennichs aunjenomen, daut see jäajen ons komen. #2Kjen 19,7 7Un see sagen, daut see met äa Läwen doavon kjeemen. See leeten äare Zelten, Pieed un Äsels, un daut Loaga, krakjt soo aus daut wia un veleeten soo bosich aus see kunnen. 8Aus de Lepra kranke Mana bat aum Loaga kjeemen, jinjen see en een Zelt nenn un eeten un drunken doa, un neemen Selwa un Golt un Kjleeda un jinjen un vestuaken sikj daut. Dan jinjen see no een aundret Zelt un neemen, von daut waut doa wia, un vestuaken daut uk noch. 9Dan beräden see sikj oba, daut dit nich rajcht wia. Dit es een wichtja Dach, säden see, un wie sent waut sea goodet enjeworden. Wan wie dit stell hoolen bat daut dach woat, dan woa wie doafäa noch lieden motten. Well wie fuaz gonen un däm Kjennich siene Menschen dit weeten loten. 10Un see jinjen no daut Stautspuat opptoo un roopten de Wajchta. See säden an: Wie wieren bie de Aramäa äa Loaga, oba wie hieeden doa kjeen Mensch, un sagen doa uk kjeenem. Oba de Zelten stonen noch aula, un de Pieed un Äsels sent noch aunjebungen aus eemol. 11Un de Wajchta biem Puat roopten eena dän aundren, un boolt säden see daut en däm Kjennich siene Hiesa.

12Un de Kjennich stunt opp, aus daut noch diesta wia, un säd to siene Mana: Ekj woa junt sajen, waut de Aramäa väa haben. See weeten daut wie hungren, un see haben sikj een wesset bat opp de Stap trigj jetrocken, soo daut wie woaren rutkomen, un dan kjennen see ons aunjriepen un en onse Staut nenn komen. 13Un eena von siene aunjestalde säd: Well wie fief Mana opp Pieed schekjen, daut notoseenen. Dän jeit daut doch krakjt soo aus aulem hia. Dee sent krakjt soo veuadeelt aus aule aundre hia. 14Dan neemen see twee Woages met Pieed, un de Kjennich schekjt an, daut see de Aramäa äare Armee hinjaraun fuaren, un säd: Got un seet emol no.

15Un see fuaren an hinjaraun bat däm Jordan, un delenjd dee gaunze Strakj lagen Kjleeda un Jereetschoft, waut de Aramäa tosied jeschmäten hauden. Daut wia to seenen, daut dee sikj sea jespoot hauden aus see veleeten. Un see kjeemen trigj un säden däm Kjennich daut. 16Dan jinkj daut gaunze Volkj rut, un see bestoolen de Aramäa äa Loaga. Un krakjt soo aus de Har jesajcht haud, worden fief Kilo Weitmäl, un uk tieen Kilo Joascht fa een Selwastekj vekoft.

17De Kjennich haud dän Kapitän, dee met däm Kjennich wia, aunjestalt, daut hee bie daut Stautspuat Oppsechta sennen sull. Un aus de Lied rut jinjen, traumpelden see am unja un hee storf. Daut wort krakjt soo aus de Gottesmaun jesajcht haud, aus de Kjennich no am jegonen wia. 18Daut neem sikj krakjt soo rom aus Elisa jesajcht haud. Hee haud jesajcht: Morjen om dise Tiet woat eena, fief Kilo Weitmäl, ooda uk tieen Kilo Joascht, fa een Selwastekj kjeepen kjennen, hia en daut Puat von Samaria. 19Dan haud de Kapitän, dee met däm Kjennich wia, jesajcht: Horch emol. Uk wan de Har de Fenstren vom Himmel opmoaken wudd, woo kunn daut sennen? Un Elisa haud to am jesajcht: Horch emol. Du woascht daut selfst seenen, oba du woascht nich doavon äten. 20Un daut wort aula krakjt soo aus daut. Daut Volkj vetraumpeld am biem Stautspuat, un hee storf.

Currently Selected:

2. Kjennichs 7: PB

Highlight

Compare

Copy