2. Kjennichs 3

De Kjennich Joram von Israel un Elisa

1Joram, Ahab sien Sän, wort Kjennich en Samaria äwa Israel en daut 18. Joa aus Joschafat Kjennich en Juda wia. Joram rejieed twalw Joa. #2Kjen 1,17 2Hee deed, waut däm Harn schlajcht jefoll, oba hee wia nich soo aus sien Voda ooda siene Mutta. Hee schauft daut steenane Denkjmol von Baal, woont sien Voda oppjestalt haud, tosied. #1Kjen 16,32 3Oba hee hilt sikj aun de Sinden dee Jerobeam, Nebat sien Sän, jedonen haud, dee Israel toom sindjen veleid. Hee hieed nich opp met dee. #1Kjen 12,28-30

4Mescha, de Kjennich äwa de Moabita, haud väl Schop, un hee must jieda Joa 100.000 Lama, un de Woll von 100.000 Schop aun dän Kjennich von Israel leewren. 5Oba dan aus Ahab storf, stald de moabitischa Kjennich sikj jäajen dän israelitischen Kjennich. 6Un de Kjennich Joram roopt daut gaunze Israel opp un trock met dee ut Samaria rut. 7Hee schekjt uk eene Norecht no Joschafat, dän Kjennich von Juda, un säd: De Kjennich von de Moabita haft sikj jäajen mie jestalt. Komm met mie om jäajen an to kjamfen. Un dee säd: Ekj kom. Ekj sie met die, un mien Volkj es dien Volkj, un miene Pieed sent diene Pieed. #1Kjen 22,4 8Un Joram säd: Woonen Wajch well wie doahan nämen? Un Joschafat säd: Dän Wajch derch de Edom Wiltnis.

9Dan trocken de Kjennich von Israel, de Kjennich von Juda, un de Kjennich von Edom rut. Un aus see säwen Doag opp däm Wajch wieren, hauden see nich mea Wota fa äare Mana un fa de Tieren, dee äare Sachen druagen. 10Dan säd de Kjennich von Israel: Dit es eene schlemme Sach! De Har haft dise dree Kjennichs jeroopt, daut hee dee kunn en de Moabita äare Jewault jäwen. 11Oba Joschafat säd: Es doa kjeen Profeet von däm Harn hia, daut wie dän Harn derch am froagen kjennen? Dan säd eena von de Mana von Israel: Hia es Elisa, Schafat sien Sän. Dee deend Elia emma, un goot am Wota äwa siene Henj. #1Kjen 19,19-21; 22,5.7 12Joschafat säd: Dee haft däm Harn sien Wuat bie sikj. Dan jinjen de Kjennich von Israel, un Joschafat, un de Kjennich von Edom rauf no am. 13Elisa säd to däm Kjennich von Israel: Wuarom kjemst du no mie? Go doch no de Profeeten, dee dien Voda un diene Mutta hauden. De Kjennich von Israel säd: Nä. Daut es de Har, wäa dise dree Kjennichs häa jeroopt haft un an en de Moabita äare Jewault jejäft haft. 14Un Elisa säd: Soo secha aus de Har, dee aules rejieet, läft, däm ekj deen, wan ekj nich Joschafat, däm Kjennich von Juda, wull aunerkjanen, dan wudd ekj die nich seenen wellen un nich miene Tiet jäwen. #1Kjen 18,15 15Brinjt mie emol eenen, dee opp een Instrument spält. Un aus see eenen jebrocht hauden, kjeem däm Harn siene Krauft opp Elisa, #1Sam 16,16 16un hee säd: Dit es waut de Har sajcht: Groft hia un doa Growes en dit Tol. 17De Har sajcht: Jie woaren kjeen Wint ooda Räajen seenen, doch woat dit Tol voll Wota woaren, soo daut jie un june Mana un jun Vee drinkjen kjennen. 18Dit es waut leichtet fa däm Harn to doonen. Hee woat junt uk de Moabita en june Macht jäwen, 19soo daut jie aul äare Städa met huage Mieren un äare baste Städa dolbräakjen woaren. Jie woaren aul äare goode Beem dolhaken un aul äare Borms tooschedden. Jie woaren aul äa goodet Akalaunt met Steena vedoawen. 20Dan aum näakjsten Morjen, om de Tiet daut see daut Ätesopfa opfren, kjeem doa Wota von de Rechtunk wua Edom es, un de Jäajent feld opp met Wota. #4Mo 28,4-5

21Aus de Moabita hieeden, daut de Kjennichs jäajen an kjeemen, om met an to kjamfen, roopten see aulem opp, beides junge un oole, wäa sest kunn Jewäaren droagen. Un see stalden sikj opp de Jrens han. 22Dan tiedich zemorjes, aus see sikj reedmuaken, un de Sonn äwa daut Wota oppjinkj, leet an daut Wota, waut een Enj auf wia, aus wan daut Bloot wia. 23Un see säden: Daut es Bloot. De Kjennichs haben unja eenaunda jekjamft, un haben sikj met daut Schwieet omjebrocht. Nu well wie han gonen un an beplindren. 24Oba aus see bat daut israelitische Häa kjeemen, stalden de Israeliten sikj han un schluagen de Moabita, daut see von an wajchranden. Un Israel juach an hinjaraun un brocht de Moabita om. 25Un see bruaken äare Städa dol, un een jiedra schmeet eenen Steen opp jieda goodet Akalaunt, daut et Launt voll Steena wia. Un see schedden äare Borms too un hakten aule goode Beem auf, bat bloos noch de Hauptstaut, Kir Heres, jebläwen wia. Un dee Mana, waut Schleida hauden toom Steena schmieten, jinjen von runtom de Staut, un schooten äare Steena en de Staut nenn. 26Dan aus de Kjennich von de Moabita sach, daut am de Kaumf too stoakj wia, neem hee 700 Mana, dee met daut Schwieet jeeeft wieren, un vesocht jäajen däm Kjennich von Edom derch to bräakjen. Oba see kunnen daut nich. 27Dan neem hee sienen elsten Sän, dee en siene Städ sull Kjennich woaren no am, un opfad däm en een Brauntopfa opp de Stautswaunt. Dan kjeem doa een groota Oaja äwa Israel, soo daut see sikj trigj trocken un trigj no äa Launt jinjen.

Currently Selected:

2. Kjennichs 3: PB

Highlight

Compare

Copy