2. Kjennichs 2

Gott nemt Elia, Elisa woat Profeet

1Aus de Har Elia en eenen stoakjen Wint wull nom Himmel nämen, jinjen Elia un Elisa von Gilgal wajch. 2Un Elia säd to Elisa: Bliew du hia. De Har haft mie no Betel jeschekjt. Oba Elisa säd: Soo secha aus de Har läft un du läfst, velot ekj die nich. Dan aus see no Betel kjeemen, 3kjeemen dee waut bie Betel de Profeeten äare Jinja wieren, Elisa entjäajen. Un see säden: Weetst du daut de Har vondoag woat dienen Harn von die wajchnämen? Un hee säd: Jo ekj weet daut. Rät doa bloos nich von. 4Un Elia säd to am: Elisa, bliew du hia. De Har haft mie no Jericho jeschekjt. Oba hee säd: Soo secha aus de Har läft un du läfst, ekj velot die nich. Aus see dan no Jericho kjeemen, 5kjeemen de Profeeten äare Jinja en Jericho no Elisa un säden to am: Weetst du uk daut de Har vondoag woat dienen Harn von die wajchnämen? Un hee säd: Jo ekj weet daut. Rät bloos nich doavon. 6Un Elia säd to am: Bliew du hia. De Har haft mie no däm Jordan jeschekjt. Oba hee säd: Soo secha aus de Har läft, un du läfst, ekj velot die nich. Soo jinjen de twee wieda. 7Un 50 von de Profeeten äare Jinja jinjen an een Enj auf hinjaraun, un sagen Elia un Elisa bie däm Jordan stonen. 8Dan neem Elia sienen Mauntel, rold däm toop un schluach doamet daut Wota. Un daut Wota deeld sikj no beid Sieden, soo daut see beid opp drieejet Launt doa derch jinjen. #2Mo 14,21-22; Jos 3,16 9Aus see bat de aundre Kaunt wieren, säd Elia to Elisa: Saj waut du noch von mie west, ea ekj von die wajchjenomen woa. Un Elisa säd: Lot mie daut dobbelde von dienen Jeist kjrieen. #5Mo 21,17 10Un hee säd: Du hast no waut schwoaret jefroacht. Oba wan du daut seenen woascht, woo ekj von die wajchjenomen woa, dan woat daut soo woaren. Wan nich, dan woat daut nich woaren. 11Un aus see soo wieda jinjen un räden, sagen see met eemol eenen fieejen Woagen met fieeje Pieed tweschen an, un Elia wort en dän stoakjen Wint nopp jenomen nom Himmel. #1Mo 5,24

12Elisa sach waut doa wort un hee schrieech: Mien Voda, mien Voda! Israel äa Woagen un Ritta! Un hee kjrieech siene Kjleeda to hoolen un reet dee en twee Stekja. #2Kjen 6,21; 13,14 13Un hee hoof Elia sienen Mauntel opp, dee am wia wajchjefollen, un jinkj trigj bat aum Jordan. 14Un hee jinkj bat aum Wota un schluach daut Wota met däm Mauntel dän Elia wajchjefollen wia. Un hee säd: Wua es de Har, Elia sien Gott? Un aus hee daut Wota jeschloagen haud, deeld sikj daut Wota no beid Sieden, un hee jinkj derch no de aundre Sied. 15Aus de Profeeten äare Jinja doa bie Jericho dit sagen, säden see: De Jeist dee opp Elia wia, es nu opp Elisa. See jinjen am entjäajen un kjneeden sikj ver am un bekjten sikj bat opp de Ieed. 16Un see säden to am: Horch emol. Hia sent 50 stoakje Mana, dee diene Deena sent. Lot an gonen dienen Harn sieekjen. Veleicht haft däm Harn sien Jeist am jenomen un opp irjent eenen Boajch ooda en irjent een Tol faulen loten. Oba Elisa säd: Lot dee nich gonen. 17Doch see hilden aun bat hee nojeef un säd: Lot see gonen. Un see schekjten 50 Mana un dee sochten dree Doag no Elia. Oba dee fungen am nich. 18Un see kjeemen trigj no Elisa, dee noch en Jericho wia. Un hee säd to an: Säd ekj junt nich, daut jie nich gonen sullen?

19De Mana von Jericho kjeemen no Elisa un säden: Horch emol. Soo aus du seenen kaust, onse Staut es opp eene feine Städ. Oba daut Wota es schlajcht un daut Launt drajcht nich goot. 20Un hee säd: Brinjt mie eene niee Komm un doot doa Solt nenn. Un see brochten am daut. 21Dan jinkj hee no de Kjwal von äa Wota un schmeet daut Solt doa nenn un säd: Dit es waut de Har sajcht: Ekj hab dit Wota jesunt jemoakt. Daut saul nienich wada wäm Doot moaken ooda daut Launt schlajcht droagen moaken. 22Un daut Wota wort jesunt, un es soo bat däm vondoagschen Dach, krakjt soo aus Elisa daut säd.

23Un Elisa jinkj von doa no Betel. Un aus hee opp däm Wajch wia, kjeemen waut kjliene Junges ut de Staut rut un vespotten am. See säden: Go nopp, Kolkopp! Go nopp, Kolkopp! 24Un hee dreid sikj no an, un aus hee an sach, spruak hee eenen Fluch opp an en däm Harn sienen Nomen. Dan kjeemen twee Boaren utem Woolt un vereeten 42 von de Kjinja. 25Von doa jinkj hee opp däm Karmel Boajch nopp un dan trigj no Samaria.

Currently Selected:

2. Kjennichs 2: PB

Highlight

Compare

Copy