2. Kjennichs 23

De Tempel woat derchjebut un de Bunt woat oppjefrescht

(2Chr 34,3-7)

1Un de Kjennich leet aul de Leidasch von Juda un Jerusalem sajen, daut see sikj ver am vesaumlen sullen. 2Un de Kjennich un aul de Mana von Juda un aul de Lied von Jerusalem jinjen no däm Harn sien Hus. Doa wieren de Priesta un de Profeeten un daut gaunze Volkj von kjlien bat groot. Un hee laus ut daut Buak von däm Bunt, daut see en däm Harn sien Hus jefungen hauden, soo daut see daut aula hieren kunnen. 3Un de Kjennich stunt ver daut Volkj un muak eenen Bunt met däm Harn un vespruak daut see soo läwen wudden, aus däm Harn daut jefoll. Hee vespruak de Jebooten, Jesazen un Väaschreften truhoatich un vollens to hoolen un daut see de Lieren von däm Bunt volstendich utfieren wudden, soo aus dee en daut Buak wieren. Un daut gaunze Volkj neem dän Bunt opp sikj. #2Mo 24,3-8; Jos 24,25

4Un de Kjennich velangd von däm Huagenpriesta Hilkija un dän tweeden Priesta un de Priesta, waut bie de Schwal Wajchta wieren, daut see sullen aul de Dinja ut däm Harn sien Tempel rut riemen, dee fa Baal un de Aschera un fa dee, dee em Himmel Macht eewen, jemoakt wieren. Un see vebrenden dee buta de Staut em Kidron Tol, un druagen daut Ausch no Betel. #2Kjen 21,3 5Un aul de Priesta fa de Jetta, woone de Kjennichs von Juda aunjestalt hauden toom opp de huage Opfastäden Opfa brinjen en Juda un rom Jerusalem, leend hee auf. Hee leend uk de Priesta auf, waut fa Baal, fa de Sonn un Mon un Stierns, un fa dee, dee em Himmel Macht eewen, opfaden. 6Un hee brocht daut Ascherabilt ut däm Harn sien Hus rut bat buta Jerusalem no däm Kidron un vebrend daut un schluach daut en fiene Bieta. Un daut Stoff schmeet hee opp dän Graufhoff von de Staut. #2Kjen 21,7 7Un hee bruak de Hiesa von de Tempelhuara dol, waut biem Harn sien Hus wieren, doa wua de Frues de Aschera Dakjen muaken. #1Kjen 14,24 8Hee leet aul de Priesta von en de Städa en Juda komen, un hee vedorf de huage Opfastäden, wua de Priesta jeopfat hauden. Hee deed dit von Geba gaunz bat Beerscheba. Un hee bruak de huage Opfastäden dol, waut bie daut Puat von Josua, däm Stauts Vewaulta, wieren. Dee wieren aun de linkje Sied, wan eena derch daut Stautspuat en de Staut nenn jinkj. 9Oba de Priesta von de huage Opfastäden durwen nich opp däm Aultoa fa däm Harn en Jerusalem Opfa brinjen. See eeten onjesuadet Broot met äare Breeda. 10Hee muak daut Tofet em Ben Hinnom Tol, soo daut et nich to brucken wia un daut kjeena mea von sienen Sän ooda siene Dochta wudd een Opfa fa Moloch moaken. #3Mo 18,21; 2Kjen 17,17 11Hee schauft de Pieed auntsied, woone de Kjennich von Juda to de Sonn jeweit haud. Dee wieren wua de Aunjestalda Netan Melech siene Stowen haud. Un hee vebrend de Woages, waut fa de Sonn jeweit wieren, en daut Fia. 12Un hee bruak de Aultoaren dol opp daut bowaschte Dak von de Ahas Stowen, un uk de Aultoaren, waut Manasse en de twee Väahäw von däm Harn sien Hus jemoakt haud. Hee bruak dee dol un schmeet daut Stoff en däm Kidron Riefa. #2Kjen 21,4-5; 2Chr 28,24 13Un de Kjennich muak de huage Opfastäden, waut oosten von Jerusalem wieren, sieden vom Vedoawens Boajch, dee Salomo jebut haud fa Astarte, de oppscheiselja Aufgott von Sidon, un fa Kemosch dän oppscheiseljen Aufgott von Moab un fa Milkom dän oppscheiseljen Aufgott von de Amonita, daut dee nich to brucken wieren. #1Kjen 11,7 14Hee bruak uk de Steenmols dol un hakt de Ascherabilda dol un muak de Städen voll Menschen Knoakes.

15Un hee bruak uk dän Aultoa bie Betel dol opp de huage Opfastäd dee Jerobeam, Nebat sien Sän, jemoakt haud. Hee schluach de Steena von däm Aultoa twei en fiene Bieta un hee vebrend daut Ascherabilt. #1Kjen 12,32 16Un aus Josia sikj omdreid, sach hee de Jräwa, waut doa opp däm Boajch wieren. Un hee schekjt un leet de Knoakes von en de Jräwa brinjen un vebrend dee opp däm Aultoa soo daut de Aultoa nich mea to brucken wia. Daut wia krakjt soo aus de Har derch dän Gottesmaun jesajcht haud, aus hee daut aul em verut säd. #1Kjen 13,2 17Un hee säd: Waut es jan Graufsteen, waut ekj doa see? Un de Lied von de Staut säden to am: Daut es daut Grauf von däm Gottesmaun dee von Juda kjeem un em verut säd waut du met däm Aultoa bie Betel jedonen hast. #1Kjen 13,30-32 18Un hee säd: Lot am ligjen. Kjeena sull däm siene Knoakes vestieren. Un soo bleewen siene Knoakes onvestieet met de Knoakes von däm Profeet, dee von Samaria jekomen wia.

19Un hee bruak aul de huage Opfastäden en Samaria dol, woone de Kjennichs von Israel jemoakt hauden, un met woone see dän Harn jereizt hauden. Josia deed met dee krakjt soo aus hee en Betel jedonen haud. 20Un aul de Priesta, waut bie de huage Opfastäden wieren, brocht hee opp de Aultoaren om, un hee vebrend Knoakes von Menschen opp de Aultoaren. Dan kjeem hee trigj no Jerusalem.

Passafast en Jerusalem

(2Chr 35,1-19)

21Un de Kjennich säd to daut Volkj: Hoolt aula daut Passamol fa däm Harn junen Gott, soo aus daut en daut Buak von däm Bunt jeschräwen es. #5Mo 16,1-8; Jos 5,10-11 22Doa wia kjeen Passamol jehoolen worden von don aus de Rechta en Israel rechten deeden, derch de gaunze Tiet von de Kjennichs von Israel un de Kjennichs von Juda. #Rech 2,10.16-17 23Dan en daut 18. Joa von däm Kjennich Josia wort en Jerusalem daut Passamol fa däm Harn jehoolen.

24Un Josia muak een Enj met aul dee, dee met de Vestorwne räden un butajeweeneljen Rot hauden, met de Jetta un aul de aundre oppscheiselje Dinja, waut en Juda un en Jerusalem to seenen wieren. Soo fieed hee daut ut, waut de Priesta Hilkija en daut Buak, waut see en däm Harn sien Hus jefungen hauden, jeläst haud. #3Mo 20,27; 5Mo 29,16-17

25Ver Josia wia nich noch een soon Kjennich aus hee, dee sikj soo met sien gaunzet Hoat un Seel un Krauft däm Harn jeef, krakjt soo aus Moses sien Jesaz säd. Un no am wia uk nich noch eena soo aus Josia. #5Mo 6,5; 2Kjen 18,5 26Oba de Har jeef nich opp met sienen grooten Oaja, dee wäajen Juda äwa am jekomen wia, derch aul daut, met waut de Kjennich Manasse am jereizt haud. #2Kjen 21,11-16 27Un de Har säd: Ekj woa Juda uk von ver mie veschmieten, soo aus ekj Israel hab, un ekj woa dise Staut, Jerusalem, venichten un uk daut Hus von woont ekj jesajcht hab: Mien Nomen saul doa sennen. #1Kjen 8,29; 2Kjen 17,18

28Daut äwaje, waut von Josia to sajen es, un aules waut hee jedonen haft, es en daut Buak von de Jeschicht von de Kjennichs en Juda jeschräwen.

29Aus Josia Kjennich wia, kjeem de Kjennich Necho von Ägipten aun, wiels hee wull jäajen däm assierischen Kjennich biem Eufrat Riefa kjamfen. Un de Kjennich Josia jinkj däm entjäajen un hee wort von Necho doot jemoakt bie Megiddo, aus see sikj bejäajenden. 30Un siene Mana neemen sienen Kjarpa en eenen Woagen von Megiddo no Jerusalem un begrowden am doa en sien Grauf. Un daut Volkj neem Joahas, Josia sien Sän un saulwden am en un muaken am toom Kjennich en sienen Voda siene Städ.

De Kjennichs Joahas un Jojakim en Juda

(2Chr 36,2-8)

31Joahas wia 23. Joa oolt aus hee Kjennich wort, un hee wia fa dree Moonat de Kjennich. Siene Mutta wia Hamutal, Jirmeja von Libna siene Dochta. 32Un Joahas deed waut däm Harn schlajcht jefoll, soo aus siene Vodasch. 33Oba de Kjennich Necho von Ägipten stopt am en Ribla, daut en de Hamat Jäajent es, en daut Jefenkjnis, soo daut hee nich lenja Kjennich en Jerusalem sennen kunn. Un de ägiptischa Kjennich läd eenen Taks opp daut Launt. Hee velangd 3.000 Kilo Selwa un 30 Kilo Golt von Juda. #Hes 19,4 34Un de ägiptischa Kjennich Necho muak Eljakim, Josia sien Sän, toom Kjennich en sienen Voda Josia siene Städ un hee veendad däm sienen Nomen no Jojakim. Hee neem Joahas met no Ägipten, un dee storf doa. #1Chr 3,15 35Un Jojakim jeef däm ägiptischen Kjennich Selwa un Golt. Hee läd een Taks opp daut Volkj om daut Jelt nenn to brinjen, waut de ägiptischa Kjennich velangd. Jojakim velangd Selwa un Golt von aule Menschen en daut Launt, doano aus hee daut aufschazt, soo daut hee däm ägiptischen Kjennich daut jäwen kunn. #2Kjen 15,20 36Jojakim wia 25 Joa oolt aus hee Kjennich wort, un hee wia fa alw Joa de Kjennich en Jerusalem. Siene Mutta wia Sebuda, Pedaja von Ruma siene Dochta. 37Un hee deed waut däm Harn schlajcht jefoll, soo aus siene Vodasch jedonen hauden.

Currently Selected:

2. Kjennichs 23: PB

Highlight

Compare

Copy