2. Kjennichs 16

De Kjennich Ahas en Juda

(2Chr 28)

1En daut 17. Joa aus Pekach, Remalja sien Sän, Kjennich wia, wort Ahas, Jotam sien Sän, Kjennich von Juda. #(1-4) 2Chr 28,1-6 2Ahas wia 20 Joa oolt aus hee Kjennich wort, un hee wia Kjennich en Jerusalem fa 16 Joa. Hee deed nich waut fa däm Harn rajcht wia, soo aus sien Staumvoda David rajcht jedonen haud. 3Hee haundeld soo aus de Kjennichs von Israel. Hee vebrend sienen ieejnen Sän en een Opfa, soo aus de Velkja, dee de Har ver de Israeliten utroden deed, en äare oppscheiselje Sitten deeden. #3Mo 18,21 4Hee brocht Opfa un Ruakopfa opp aul de huage Opfastäden, un opp jieda Boajch, un unja jieda jreenen Boom.

5Dan kjeemen Rezin, de Kjennich von Aram, un Pekach, Remalja sien Sän, de Kjennich von Israel, jäajen Jerusalem to kjamfen. See muaken äa Loaga rom Jerusalem, oba see kunnen de Staut nich ennämen. #Jes 7,1-9 6En dise Tiet neem de Kjennich von Edom de Staut Elat wada trigj un juach de Menschen von Juda doa wajch. Dan kjeemen de Edomita un wonden en de Staut, soo aus see vondoag noch doonen. #2Kjen 14,22 7Un Ahas schekjt eene Norecht no däm Kjennich Tiglat Pileser von Assierien. Hee säd: Ekj woa die deenen, un dien Sän sennen. Komm bat hia un halp mie jäajen de Macht von däm Kjennich von Aram un däm Kjennich von Israel. Dee sent jäajen mie jekomen. #(7-20) 2Chr 28,16-27 8Ahas schekjt däm Kjennich von Assierien een Jeschenkj von Selwa un Golt woont hee ut däm Harn sien Hus un von daut, waut de Kjennich haud, neem. #1Kjen 15,18 9Un de Kjennich von Assierien horcht no am un trock met siene Armee jäajen Damaskus. Hee neem de Staut en un schlapt de Lied von doa wajch un brocht däm Kjennich Rezin om.

10Dan aus de Kjennich Ahas no Damaskus jinkj om Tiglat Pileser to trafen, sach hee en Damaskus dän Aultoa. Un Ahas schekjt däm Priesta Uria de Moten un dän Plon, krakjt woo de Aultoa jemoakt wia. 11Un de Priesta Uria bud eenen Aultoa, krakjt soo aus de Kjennich Ahas am von Damaskus jeschekjt haud. Hee muak dän foadich ea Kjennich Ahas trigj kjeem von Damaskus. 12Dan aus de Kjennich von Damaskus kjeem, bekjikjt hee sikj dän Aultoa un jinkj nopp bat aun dän, 13un muak een Brauntopfa un Ätesopfa, un goot sien Drinkjopfa doa nopp un sprezt daut Bloot von de Dankopfa, dee hee brocht, aum Aultoa naun. 14Un hee neem dän bronsnen Aultoa, dee ver däm Harn stunt, wajch, soo daut dee nich tweschen sienen Aultoa un däm Harn sien Hus stunt. Un hee sad däm biesied sienen Aultoa, aun de nuadne Sied. 15Un de Kjennich Ahas säd däm Priesta Uria: Du saust daut Brauntopfa, waut du zemorjes brinjst, un daut Mälopfa, waut du zeowes brinjst, un uk däm Kjennich sien Brauntopfa un Ätesopfa, un daut Brauntopfa fa daut gaunze Volkj en daut Launt, un äa Ätesopfa un Drinkjopfa, opp disen grooten Aultoa vebrennen. Un du saust aul daut Bloot von de Brauntopfa un de aundre Opfa aun disen Aultoa spretzen. Oba dän bronsnen Aultoa woa ekj brucken, wan mie Rot fält. 16Un de Priesta Uria deed aules soo aus Ahas am säd. 17Un de Kjennich Ahas neem de Leesten un dän Foot von unja de Kommen wajch, un uk de bronsne Rinda, dee unja de groote Komm, woone see daut Mäa nanden, wajch, un stald dee opp eenen steenanen Foot. #1Kjen 7,23-39 18Un hee endad dän bedakjten Sabat Engank em Paulaust om, un uk dän Kjennich sien Engank aun däm Harn sien Hus, om däm assierischen Kjennich sient haulwen.

19Daut äwaje von de Jeschicht von Ahas un waut hee jedonen haft, es en daut Buak von de Jeschicht von de Kjennichs en Juda jeschräwen. 20Un Ahas storf un wort begroft, wua siene Väavodasch en de Davidstaut begroft wieren. Un sien Sän Hiskia wort Kjennich no am. #2Kjen 18,1

Currently Selected:

2. Kjennichs 16: PB

Highlight

Compare

Copy