2. Kjennichs 15

De Kjennich Asarja (Usija) en Juda

(2Chr 26,1-23)

1Aus Jerobeam en sien 27. Joa aus Kjennich en Israel wia, wort Asarja, Amazja sien Sän Kjennich äwa Juda. #(1-7) 2Chr 26,1-23; 2Kjen 14,21 2Hee wia 16 Joa oolt aus hee Kjennich wort un wia 52 Joa Kjennich en Jerusalem. Siene Mutta wia Jecholja von Jerusalem. 3Asarja deed waut ver däm Harn rajcht wia, soo aus sien Voda Amazja jedonen haud, 4buta daut hee nich de huage Opfastäden wajchneem. Daut Volkj brocht noch emma Opfa un Ruakopfa opp de huage Opfastäden. #2Kjen 14,3-4 5De Har jeef däm Kjennich Lepra Krankheit von woont hee nienich loos kjeem. Hee wond oppoat fa sikj en een Hus, un sien Sän Jotam wia de Leida em Kjennichs Paulaust un hee rejieed daut Volkj en daut Launt. #3Mo 13,46 6Daut äwaje von de Jeschicht von Asarja un waut hee aules jedonen haft, es aules en daut Buak von de Jeschicht von de Kjennichs en Juda jeschräwen. 7Aus Asarja storf, begrowden see am wua siene Vodasch begroft wieren, en de Davidstaut. Un sien Sän Jotam wort Kjennich no am. #2Kjen 15,32

Von de latste Kjennichs en Israel

8Dan en daut 38. Joa daut Asarja Kjennich en Juda wia, wort Secharja, Jerobeam sien Sän, Kjennich äwa Israel. Hee wia fa sas Moonat Kjennich en Samaria. #2Kjen 14,29 9Secharja deed waut däm Harn schlajcht jefoll, soo aus siene Vodasch jedonen hauden. Hee hieed nich opp met de Sinden met dee Jerobeam, Nebat sien Sän, Israel haud toom sindjen veleit. #1Kjen 12,28-30; Amos 7,9 10Schalum, Jabesch sien Sän, muak eenen Plon am omtobrinjen. Hee schluach am ver de Menschen doot un wort Kjennich no am. 11Daut äwaje, waut eena von Secharja sajen kunn, es aules en daut Buak von de Jeschicht von de Kjennichs en Israel jeschräwen. 12Dit wia soo aus de Har Jehu daut vesproaken haud, aus hee säd daut vea Jennerazionen von siene Famielje wudden Kjennich sennen. Un nu wia daut krakjt soo jeworden. #2Kjen 10,30

13Schalum, Jabesch sien Sän, wort Kjennich aus Usija en sien 39. Joa aus Kjennich äwa Juda wia. Schalum wia eene Moonat Kjennich en Samaria. 14Menahem, Gadi sien Sän, von Tirza kjeem dan no Samaria un brocht Schalum doa om. Un Menahem wort Kjennich no am. 15Daut äwaje von de Jeschicht von Schalum un woo hee dän Plon jäajen däm Kjennich muak, es aula en daut Buak von de Jeschicht von de Kjennichs en Israel jeschräwen. 16To dee Tiet schluach Menahem de Staut Tifsach un de Menschen, dee doa bennen wieren, un uk de Jäajent von Tirza, wiels see sikj am nich äwajeewen. Hee vebrend de Staut un leet aul dee, dee schwanga wieren opschnieden. #Jos 12,24; 2Kjen 8,12

17Aus Asarja en sien 39. Joa aus Kjennich äwa Juda wia, wort Menahem, Gadi sien Sän, Kjennich äwa Israel. Hee wia Kjennich fa tieen Joa en Samaria. 18Hee deed waut däm Harn schlajcht jefoll. Hee hieed en siene gaunze Tiet nich opp met de Sinden met dee Jerobeam, Nebat sien Sän, Israel toom sindjen veleit haud. 19Pull, de Kjennich von Assierien, kjeem jäajen Israel. Un Menahem jeef Pull 30.000 Kilo Selwa, soo daut Pull am unjastetten wudd, un am wudd halpen siene Macht aus Kjennich hoolen. #2Kjen 15,29 20Menahem velangd daut Jelt von de Menschen en Israel. Jieda Maun dee goot auf wia, must een haulwet Kilo Selwa jäwen fa dän assierischen Kjennich. Dan jinkj de Kjennich von Assierien trigj, un bleef nich en Israel. #2Kjen 23,35 21Daut äwaje von de Jeschicht von Menahem, un waut hee jedonen haft, es aula en daut Buak von de Jeschicht von de Kjennichs en Israel jeschräwen. 22Aus Menahem storf, wort hee begroft, un sien Sän Pekachja wort Kjennich no am.

23Aus Asarja en sien 50. Joa aus Kjennich von Juda wia, wort Pekachja, Menahem sien Sän, Kjennich äwa Israel. Hee wia Kjennich fa twee Joa en Samaria. 24Un hee deed waut däm Harn schlajcht jefoll. Hee hieed nich opp met dee Sinden met woone Jerobeam, Nebat sien Sän, Israel haud toom sindjen veleit. 25Pekachja sien Kapitän, Pekach, Remalja sien Sän, muak eenen Plon Pekachja omtobrinjen. Hee jinkj met 50 Mana von Gilead no Samaria un schluach däm Kjennich, un uk Argob un Arje, doot en de Kjennichstow en däm Paulaust. Un Pekach wort Kjennich no am. #2Kjen 15,10.15.30 26Daut äwaje von de Jeschicht von Pekachja un waut hee jedonen haft es aula en daut Buak von de Jeschicht von de Kjennichs en Israel jeschräwen.

27Aus Asarja en sien 52. Joa aus Kjennich en Juda wia, wort Pekach, Remalja sien Sän, Kjennich en Israel. Un hee wia fa 20 Joa de Kjennich en Samaria. 28Hee deed waut däm Harn schlajcht jefoll. Hee hieed nich opp met de Sinden met woone Jerobeam, Nebat sien Sän, Israel haud toom sindjen veleit. 29Daut wia en dee Tiet aus Pekach Kjennich en Israel wia, aus Tiglat Pileser, de Kjennich von Assierien kjeem un neem Ijon, Abel Bet Maacha, Janoach, Kedesch, Hazor, Gilead, un von Galiläa de gaunze Jäajent von Naftali. Un hee veschlapt de Menschen no Assierien. #1Chr 5,26 30Un Hoschea, Ela sien Sän, muak eenen Plon jäajen Pekach, Remalja sien Sän, un schluach am doot. Dan wort Hoschea de Kjennich. Dit wia aus Jotam, Usija sien Sän, en sien 20. Joa aus Kjennich en Juda wia. #2Kjen 15,25; 17,1 31Daut äwaje von de Jeschicht von Pekach, un waut hee aules jedonen haft, es en daut Buak von de Jeschicht von de Kjennichs en Israel jeschräwen.

De Kjennich Jotam en Juda

32Aus Pekach, Remalja sien Sän, en sien tweedet Joa aus Kjennich en Israel wia, wort Jotam, Usija sien Sän, Kjennich äwa Juda. #(32-35) 2Chr 27,1-7 33Hee wia 25 Joa oolt aus hee Kjennich wort, un hee wia Kjennich fa 16 Joa en Jerusalem. Siene Mutta wia Jeruscha, Zadok siene Dochta. 34Un hee deed waut rajcht wia ver däm Harn, soo aus sien Voda Usija jedonen haud. #(34 un 35) 2Kjen 15,4 35Bloos hee riemd nich opp met de huage Opfastäden. De Menschen brochten noch emma Opfa un Ruakopfa opp de huage Opfastäden. Hee bud daut bowaschte Puat bie däm Harn sien Hus. 36Daut äwaje von waut Jotam jedonen haft, es en daut Buak von de Jeschicht von de Kjennichs en Juda jeschräwen. 37To dee Tiet, funk de Har aun, daut hee Rezin, dän Kjennich von Aram, un Pekach, Remalja sien Sän, leet jäajen Juda gonen. #2Kjen 16,5 38Dan storf Jotam, un see begrowden am wua siene Vodasch begroft wieren en de Davidstaut. Un sien Sän Ahas wort Kjennich no am.

Currently Selected:

2. Kjennichs 15: PB

Highlight

Compare

Copy