2. Kjennichs 13
13
De Kjennichs Joahas un Joasch en Israel
1Aus de Kjennich Joasch, Ahasja sien Sän, en sien 23. Joa aus Kjennich von Juda wia, wort Joahas, Jehu sien Sän, Kjennich äwa Israel. Hee wia 17 Joa Kjennich en Samaria. #2Kjen 10,35 2Hee deed soont waut däm Harn schlajcht jefoll. Hee läwd en de Sinden met woone Jerobeam, Nebat sien Sän, Israel haud toom sindjen veleit. Hee hieed nich met dee opp. #1Kjen 12,28-30 3Un de Har oajad sikj äwa Israel, un de gaunze Tiet leet hee Hasael un sienen Sän, Ben Hadad, dee Kjennichs von Aram, äare Macht äwa Israel eewen. #2Kjen 10,32 4Un Joahas prachad däm Harn, daut hee an halpen sull. Un de Har horcht no am, wiels hee sach woo schwoa daut fa Israel wia, soo aus de Kjennich von Aram Israel toosad. #1Mo 16,13 5Un de Har jeef Israel eenem dee an raden kunn, un dee muak an frie von de Aramäa äare Macht, un see kunnen wada en äare Hiesa wonen, soo aus ea. #2Kjen 14,27 6Oba daut Volkj jeef nich opp un bleef en de Sinden met dee Jerobeam un siene Nokomen daut Volkj toom sindjen veleit haud. Un daut Ascherabilt bleef uk en Samaria stonen. #1Kjen 16,33 7Joahas siene Armee wia sea kjlien jeworden, wiels de Kjennich von Aram haud dee omjebrocht; see wieren soo aus daut Sprie oppem Draschplauz. Hee haud aul mau 50 Mana opp Pieed, tieen Kjrichswoages, un 10.000 Soldoten. 8Daut äwaje von de Jeschicht von Joahas met aules waut hee jedonen haft un woo brow hee wia, es aula en daut Buak von de Jeschicht von de Kjennichs en Israel jeschräwen. 9Aus Joahas storf, begrowden see am en Samaria. Joahas sien Sän Joasch wort Kjennich no am.
10Joasch, Joahas sien Sän, wort Kjennich äwa Israel aus de Kjennich Joasch en sien 37. Joa aus Kjennich en Juda wia. Joasch, Joahas sien Sän, wia fa 16 Joa Kjennich en Samaria. 11Hee deed waut däm Harn schlajcht jefoll, hee hieed nich opp met de Sinden met dee Jerobeam, Nebat sien Sän, Israel haud toom sindjen veleit. Hee läwd wieda en dee. 12Daut äwaje von de Jeschicht von Joasch un waut hee jedonen haft un woo brow hee wia aus hee jäajen Amazja, däm Kjennich von Juda kjamfen deed, es aula en daut Buak von de Jeschicht von de Kjennichs en Israel jeschräwen. #2Kjen 14,8-16 13Aus Joasch storf, begrowden see am en Samaria, met de Kjennichs von Israel, un Jerobeam kjeem opp däm Troon to setten. #2Kjen 14,23
14Aus Elisa krank wort, met eene Krankheit von woone hee storf, dan jinkj Joasch, de Kjennich von Israel, han un hield ver am un säd: Mien Voda, mien Voda! Israel äa Woagen un Ritta! #2Kjen 2,12 15Un Elisa säd to am: Nemm eenen Boagen un Feilen. Un aus de Kjennich dän Boagen un Feilen neem, 16säd Elisa to däm Kjennich von Israel: Nemm diene Haunt un hol däm Boagen aun. Un hee hold dän Boagen aun met siene Haunt. Un Elisa läd siene Haunt opp däm Kjennich siene Haunt, 17un säd: Moak daut oostne Fensta op. Un hee muak daut opp. Un Elisa säd: Scheet. Un hee schoot. Un Elisa säd: Eene jewennende Feil vom Harn. Eene jewennende Feil jäajen Aram. Du woascht de Aramäa bie Afek dolschlonen bat see oppjeriemt sent. 18Un Elisa säd: Nemm de Feilen. Un aus hee dee neem, säd hee toom Kjennich von Israel: Schlo dee opp de Ieed. Un hee schluach dee dree mol opp de Ieed. 19Dan wort de Gottesmaun doll un säd: Wan du doch fief ooda sas mol jeschloagen hautst, dan hautst du de Aramäa doljeschloagen bat see oppjeriemt wieren. Oba nu woascht du an mau dree mol dolschlonen.
20Aus Elisa jestorwen wia, begrowden see am. To dee Tiet kjeemen doa jieda Joa Baunden von Moabita en daut Launt nenn. 21Un dan kjeem daut emol soo rom, daut aus see eenen Maun begrowen wullen, sagen see waut Moabita. Un see schmeeten däm Dooden schwind en Elisa sien Grauf nenn. Aus de Doodja Elisa siene Knoakes aunschieed, läwd hee wada opp un hee stunt opp, opp siene ieejne Been.
22En de gaunze Tiet aus Joahas läwd, leeden see väl von Hasael, däm Kjennich von Aram. 23Oba de Har wia an jenstich un hee erboarmd sikj äwa an. Hee kjemmad sikj om an wäajen sienen Bunt met Abraham, Isaak un Jakob, un hee leet daut nich too, daut see gaunz doljeschloagen worden. Hee haft an uk bat dän vondoagschen Dach nich von sikj jeschmäten. #3Mo 26,42 24Aus de Kjennich Hasael von Aram storf, wort sien Sän Ben Hadad Kjennich no am. 25Joasch jewonn dree mol dän Kaumf jäajen Ben Hadad, Hasael sien Sän, un soo kjrieech hee de Städa trigj fa Israel, woone de Aramäa en sienen Voda Joahas siene Tiet enjenomen hauden. #2Kjen 13,19
Currently Selected:
2. Kjennichs 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
