2. Kjennichs 12

De Kjennich Joasch en Juda

(2Chr 24,1-14)

1Joasch wia säwen Joa oolt aus hee Kjennich wort. 2Joasch wort Kjennich aus Jehu en sien säwendet Joa aus Kjennich deend. Joasch wia fa 40 Joa Kjennich en Jerusalem. Siene Mutta wia Zibja; see staumd von Beerscheba. 3Joasch deed en sien gaunzet Läwen waut ver däm Harn rajcht wia, wiels de Priesta Jojada unjarecht am. 4Oba see riemden nich opp met de huage Opfastäden. Daut Volkj muak noch emma Opfa un Ruakopfa opp de huage Opfastäden. #1Kjen 22,44; 2Kjen 14,4

5Un Joasch säd to de Priesta: Aul daut Jelt waut fa de jeheilichte Sachen en däm Harn sien Hus nenn kjemt, soon Jelt aus doa aule Dach jebrocht woat un aulemaun jeft, beides daut waut an oppjelajcht es un daut waut see friewellich jäwen, 6daut sellen de Priesta nämen von dee waut daut jäwen. Un see sellen doamet daut Hus vebätren soo aus see daut needich seenen, daut et to vebätren fält. 7Dan wort daut oba, daut en däm Kjennich Joasch sien 23. Joa, hauden de Priesta noch nuscht utjebätat von daut waut doa aun daut Hus fäld. 8Un de Kjennich roopt sikj dän Priesta Jojada un de aundre Priesta un säd to an: Wuarom hab jie nuscht jedonen aun daut waut aun daut Hus uttobätren fält? Jie sellen nu nich mea Jelt nämen von dee waut daut nenn brinjen. Leewa, saul daut en eene Kaus jelajcht, un jebrukt woaren toom daut Hus vebätren wua daut fält. 9Un de Priesta leeten sikj beräden, daut see nich mea wudden Jelt von de Lied nämen, un daut see nich mea brukten daut Hus utbätren.

10Un de Priesta Jojada neem eene Doos un boad doa bowen een Loch nenn, un stald dee biem Aultoa aun de rajchte Sied han wua eena en däm Harn sien Hus nenn kjemt. Un de Priesta, waut bie de Schwal Wajchta wieren, läden emma aul daut Jelt doa nenn, waut de Lied en däm Harn sien Hus brochten. 11Wan see sagen, daut doa een Deel Jelt bennen wia, dan kjeem däm Kjennich sien Schriewa un de Huagapriesta, un see talden daut Jelt, waut en däm Harn sien Hus toopjekomen wia, un see stopten daut en Sakj un bungen dee too. 12Un daut Jelt, waut see dan aufjewoagen hauden, jeewen see no dee waut de Äwasechta wieren äwa de Oabeida en däm Harn sien Hus. Un dee betolden doamet de Holtoabeida un de aundre Oabeida, waut aun däm Harn sien Hus schauften. 13Doa wieren noch de Mierasch un dee waut de Steena trajchtschneeden, un uk dee waut Holt un trajchtjehakte Steena koften, soo daut däm Harn sien Hus kunn utjebätat woaren wua daut fäld. 14Oba see brukten daut Jelt, waut no däm Harn sien Hus jebrocht wort, nich toom selwane Kommen, Kuffels, Trompeeten un Jereetschoft toom de Laumpen besorjen moaken, ooda aundre goldne un selwane Sachen fa däm Harn sien Hus. 15Daut Jelt wort bloos jebrukt toom de Oabeida betolen, waut aun däm Harn sien Hus schauften toom daut vebätren, wua daut fäld. 16Doa wort kjeene Räakjnunk velangt von dee, dee daut Jelt aun Haunt hauden un de Oabeida betolden. Dee wieren gaunz opprechtich. #2Kjen 22,7 17Oba daut Jelt, waut bie de Schultopfa un Sindopfa nenn kjeem, wort nich no däm Harn sien Hus jejäft. Daut jehieed de Priesta.

18To dee Tiet kjeem Hasael, de Kjennich von Aram, un no eenen Kaumf, neem hee Gat en. Dan plond Hasael uk noch jäajen Jerusalem to kjriejen. #2Kjen 10,32 19Dan neem Joasch, de Kjennich von Juda, aul de jeweide Sachen, dee siene Väavodasch, de Kjennichs Joschafat, Joram un Ahasja, jejäft hauden, un uk dee Sachen, dee hee selfst jeweit haud. Un hee neem uk aul daut Golt, waut hee en däm Harn sien Hus funk un en däm Kjennichs Paulaust, un schekjt daut aules no Hasael, däm Kjennich von Aram. Un Hasael trock sikj trigj von Jerusalem. #1Kjen 15,18

20Waut sest noch to Joasch siene Jeschicht jehieet, un waut hee jedonen haft, es aula en daut Buak von de Jeschicht von de Kjennichs en Juda jeschräwen. 21Joasch siene aunjestalde Mana worden ontofräd met am un muaken eenen Plon am doot to moaken. See muaken am bie daut Hus von Millo doot, doa wua daut rauf jeit no Silla. #2Kjen 14,5 22De twee, waut am ombrochten wieren: Josachar, Schimats sien Sän, un Josabad, Schomer sien Sän. Hee wort begroft, wua siene Vodasch begroft wieren, en de Davidstaut. Joasch sien Sän Amazja wort Kjennich no am. #2Kjen 14,1

Currently Selected:

2. Kjennichs 12: PB

Highlight

Compare

Copy