2. Chronik 5

1Soo wort aule Oabeit to Enj jefieet, waut Salomo aun däm Harn sien Hus deed. Un Salomo brocht aule Gowen toop waut sien Voda David däm Harn jeweit haud, un läd daut Selwa un Golt un aul daut Jereetschoft bie daut Kaptol em Gotteshus. #1Chr 18,11; 29,2-4

De Bundeskjist woat en dän Tempel jebrocht

(1Kjen 8,1-13)

2Dan vesaumeld Salomo aule Leida von Israel, aule Veträda von de Volkjsstam un Volkjsgruppen von Israel no Jerusalem, om dän Harn siene Bundeskjist von de Davidstaut no däm Zionsboajch en dän Tempel to brinjen. 3Un aule Mana von Israel vesaumelden sikj biem Kjennich toom Fast, waut en de säwende Moonat jefieet woat. #3Mo 23,34 4Un aus aule Leida von Israel toopjekomen wieren, hoowen de Leviten de Bundeskjist opp äare Schulren 5un druagen dee nom Tempel. Un de Priesta un Leviten brochten uk daut Vesaumlungszelt un aul daut heilje Jereetschoft, waut doatoo jehieed, doa han. 6De Kjennich Salomo un de gaunze Vesaumlunk von Israel, waut bie am ver de Bundeskjist vesaumelt wia, opfaden Schop un Rinda, soo väl, daut dee kjeena talen ooda beräakjnen kunn. 7Soo brochten de Priesta däm Harn siene Bundeskjist no de Städ, waut fa dee väajeseenen wia, en däm hinjaschten Rum vom Tempel, daut Aulaheilichste, unja de Flichten von de Cheruben, 8daut de Cheruben äare Flichten äwa dee Städ utbreeden un de Bundeskjist un äare Droagstangen von bowen bedakjten. 9De Droagstangen oba wieren soo lank, daut de Enja von de Stangen ut däm Rum, waut daut Heilje jenant woat, waut ver däm hinjaschten Rum es, to seenen wieren, oba von buten wieren dee nich to seenen. Un dee sent doa bat disen Dach soo. 10En de Kjist wieren bloos de beid Toflen, waut Moses aum Gottesboajch Horeb doa nenjelajcht haud. Dit wieren de Toflen von däm Bunt, waut de Har met Israel jeschloten haud, aus see ut Ägipten trocken. #5Mo 10,5; Heb 9,4 11De Priesta jinjen wada ut däm Tempel rut, wiels to disen Dach hauden sikj aule Priesta, dee sikj enjefungen hauden, reed jemoakt daut see rein wieren, uk dee, dee no äare Ordnunk deenstfrie wieren. #2Chr 8,14; Luk 1,8-9 12Uk de Sinja hauden sikj aula enjefungen: De Leviten Asaf, Heman un Jedutun met aul äare Säns un Breeda. See druagen Kjleeda von feinet wittet Lienzeich, un stunden aun de oostne Sied vom Aultoa met äare Zimbeln, Zitta un Hoapen, un bie an 120 Priesta met Trompeeten. #1Chr 15,19; 16,37.41-42 13Dise fungen aula tojlikj aun met Trompeeten blosen, sinjen, taktschlonen un aundre Instrumenten spälen, daut sikj daut soo hieed, aus wan ut een Mul dän Harn jeloft un jedankt wort. Dee Stemm von Trompeeten, Zimbeln un Seidenspell hoowen sikj un lowden däm Harn met: “De Har es goot to ons; siene truhoatje Leew hieet niemols opp!” Dan wort däm Harn sien Hus met eene Wolkj jefelt, #1Chr 16,34; Psa 106,1 14soo daut de Priesta wäajen de Wolkj nich nenn gonen kunnen toom Deenst, wiels däm Harn siene Harlichkjeit feld daut Gotteshus. #2Mo 40,35; 2Chr 7,1-3

Currently Selected:

2. Chronik 5: PB

Highlight

Compare

Copy