2. Chronik 28
28
Kjennich Ahas
(2Kjen 16,1-5)
1Ahas wia 20 Joa oolt, aus hee Kjennich wort; un hee rejieed 16 Joa en Jerusalem. Un hee deed nich waut däm Harn jefoll, soo aus sien Staumvoda David, 2un läwd no daut schlajchte Väabilt von de Kjennichs en Israel. Hee leet uk Baalsbilda jeeten 3un brocht em Hinnom Tol Ruakopfa. Hee leet soogoa siene ieejne Säns aus Opfa vebrennen un foljd doamet de oppscheiselje Sitten von de Velkja, waut de Har ver de Israeliten vedräwen haud. #5Mo 18,9-12 4Opp de Opfastäden von de framde Jetta, opp de Boaj un unja aule heilje Beem, vebrend hee Opfagowen un fieed Opfafasten. #1Kjen 14,22-23 5Doawäajen jeef de Har, sien Gott, am en de Macht von däm Kjennich von Aram. De Aramäa besiejden am un brochten väle Jefangne ut Juda no Damaskus. Un hee wort uk en de Macht von däm israelitischen Kjennich jejäft; un dee schluach am soo daut hee eenen grooten Velust hannämen must. 6Wiels Pekach, Remalja sien Sän, schluach en Juda 120.000 stoakje Kjrichsmana en eenen Dach doot, wiels see däm Harn, äare Vodasch äaren Gott, veloten hauden. 7Sichri, een Helden mootja Kjrieja ut Efraim, schluach dise doot: Maaseja, däm Kjennich sien Sän, Asrikam, däm väaschten äwa daut Kjennichshus un Elkana, däm väaschten aum Kjennich. 8De Mana von Israel neemen 200.000 Frues un Kjinja von Juda aus Jefangne met, un buta däm neemen see väl Kaptol von an un brochten daut no Samaria.
De Jefangne woaren trigjebrocht
9Dort wia oba een Profeet vom Harn, dee heet Oded. Dee jinkj rut daut Häa entjäajen, waut no Samaria kjeem, un säd to an: Kjikjt emol, wiels de Har, june Vodasch äa Gott, äwa Juda doll wie, haft hee an en june Henj jejäft; jie oba haben an met soone Wutt doljeschloagen, daut et nom Himmel schricht. #(9-15) 3Mo 19,18 10Nu well jie uk noch dise Jefangne von Juda un Jerusalem to june Sklowen un Sklowinnen moaken. Hab jie dan noch nich jenuach Schult jäajen däm Harn, junen Gott, opp junt jelot? 11Soo horcht nu no mie un brinjt de Jefangne wada trigj, waut jie von june Breeda wajchjefieet haben! Sest woat däm Harn sien Oaja jäajen junt komen. 12Uk eenje von de Leida ut de Volkjsgruppen von Efraim Asarja, Johanan sien Sän, Berechja, Meschillemot sien Sän, Jehiskija, Schalum sien Sän, un Amasa, Hadlai sien Sän, stalden sikj opp jäajen dee, dee ut däm Kaumf kjeemen, 13un säden to an: Jie sellen de Jefangne nich häabrinjen, wiels dan brinj jie Schult ver däm Harn äwa ons, soo daut jie onse Sinden un Schult bloos noch jrata moaken. Doa es aul jenuach Schult, un däm Harn sien Oaja brent aul äwa Israel. 14Dan leeten de Soldoten doa ver de väaschte Mana un ver de gaunze Vesaumlunk de Jefangne un daut jestolne Kjrichskaptol frie. 15Un de Mana, waut met Nomen aunjejäft worden, stunden opp un neemen sikj de Jefangne aun. See jeewen aul dee waut noaktich wieren, von de jestolne Sachen, Kjleeda un Schoo auntotrakjen, un jeewen an uk to äten un to drinkjen un besorjden dee waut vewunt wieren. Un aul dee, dee too schwak wieren toom gonen, saden see opp Äsels un brochten dee bat de Paulm Staut Jericho, no äare Breeda, un reisden trigj no Samaria. #2Kjen 6,22; Spr 25,21-22
Ahas socht vejäfs Help en Assierien
(2Kjen 16,7-20)
16To dee Tiet schekjt de Kjennich Ahas no däm Kjennich von Assur, un fruach däm no Help. 17Un de Edomita kjeemen wada un kjamften jäajen Juda un neemen eenje Jefangne met. 18Uk de Filista äwafollen de Städa opp daut onjlikje Launt un em Siedlaunt von Juda un neemen dise Städa en: Bet Schemesch, Ajalon, Gederot un Socho, met aul de Siedlungen, un Timna un Gimso, met äare Siedlungen, un wonden doabennen. #Jos 15,10 19De Har deed Juda wäajen Ahas, däm Kjennich von Juda, deemootjen, wiels hee en Juda een schomplooset Läwen dulden deed un selfst däm Harn ontru wia. 20Soo kjeem uk Tiglat Pileser, de Kjennich von Assur jäajen am; un sad am unja Druck enne Städ am to halpen. 21Uk wan Ahas daut Kaptol ut däm Harn sienen Tempel, ut daut Kjennichshus un ut de väaschte Mana äare Hiesa neem un daut däm Kjennich von Assur jeef, holp dee am doch nich. 22Uk en dise Tiet, wua de Kjennich Ahas sea unjadrekjt wort, deed hee sikj en siene Noot noch dolla aum Harn vesindjen 23un brocht Opfa fa de Jetta von Damaskus, dee am trigjeschloagen hauden, un säd: De Kjennichs von Aram äare Jetta holpen an; doawäajen well ekj an Opfa brinjen, daut see mie uk halpen. Oba dee brochten am un gaunz Israel toom Faul. 24Ahas brocht uk daut Jereetschoft ut daut Gotteshus toop un schluach daut entwei, un schloot de Däaren aum Tempel too un muak sikj en aule Akjen von Jerusalem Aultoaren. 25Uk en aule aundre Städa von Juda leet hee Opfastäden moaken, om aundre Jetta to opfren. Un met aul daut foddad hee däm Harn, siene Vodasch äaren Gott, sienen Oaja rut.
26Waut noch mea von Ahas to sajen es, sien Waundel von Aunfank bat Enj, daut steit jeschräwen em Buak von de Kjennichs von Juda un Israel. 27Ahas storf un wort en Jerusalem begroft, oba nich en de Jräwa von de Kjennichs en Israel. Un sien Sän Hiskia wort Kjennich en siene Städ. #2Chr 21,20
Currently Selected:
2. Chronik 28: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
