2. Chronik 26
26
Kjennich Usija, siene Macht un sien Vemieejen
(2Kjen 14,21-22; 15,1-3)
1Daut gaunze Volkj von Juda neem Usija, dee 16 Joa oolt wia, un muaken am toom Kjennich en sienen Voda Amazja siene Städ. 2No däm aus sien Voda jestorwen wia, brocht hee de Staut Elat trigj aun Juda un bud dee stoakj ut. 3Usija wia 16 Joa oolt, aus hee Kjennich wort; un hee rejieed 52 Joa en Jerusalem. Siene Mutta heet Jecholja un staumd ut Jerusalem. 4Un hee deed, waut däm Harn jefoll, krakjt soo aus sien Voda Amazja jedonen haud. #2Chr 25,2 5Soolang aus Secharja läwd, dee am doatoo aunleiden deed, bemieejd hee sikj, Gott sienen Wellen to foljen. Un soo lang aus hee däm Harn jehorcht, jeef de Har am Erfolch.
6Hee unjaneem eenen Kaumf jäajen de Filista un leet de Mieren von Gat, Jabne un Aschdod dolrieten, un bud bie Aschdod un uk opp aundre Städen em Launt von de Filista fauste Schutzplaza ut. 7Gott stunt am en disen Kaumf jäajen de Filista bie, un soo uk jäajen de Araba, waut en Gur Baal wonden, un jäajen de Meunita. 8Un de Amonita tolden Usija Taks. Siene Macht wort emma jrata, soo daut sien aunseenen bat Ägipten bekaunt wort. 9En Jerusalem bud Usija Torms aum Akjpuat, aum Tolpuat un aum soojenanden Winkjel, un muak dee faust un stoakj. 10Hee bud uk en de Stapen Schutztorms un leet väl Borms growen, wiels hee haud väl Vee opp daut onjlikje Launt un uk opp de jlikje Stapen. Uk Akabuares un Wienbuares haud hee oppe Boaj un opp daut fruchtboare Launt, wiels hee väl von wirtschoften hilt. 11Usija haud uk eene Armee, dee Moot haud un fäich toom Kjrich wia, waut en Aufdeelungen toom Kaumf jinkj. Dee wieren no äare Zol oppjestalt derch däm Schriewa Jeiel un dän Vewaulta Maaseja unja de Oppsecht von Hananja, eenem von de bowaschte aum Kjennich. 12De 2.600 Leida von de Volkjsgruppen wieren de Aunfiera. 13Un unja äare Oppsecht stunt eene Armee von 307.500 sea staunthaufte Mana, waut met Jewault kjamften, om dän Kjennich jäajen siene Fiend to halpen. 14Usija rest daut gaunze Häa ut met Schilten, Spiessen, Kjrichsheed, Kjleeda met eene hoade Kjarscht, Flizboages un Schleidasteena. 15Un en Jerusalem muak hee konstvolle Maschienen, waut oppe Torms un de Akjen von de Mia stonen sullen, om met Feilen un groote Steena to scheeten. Un sien Nomen wort wiet bekaunt, wiels Gott am wundaboa holp, bat hee eene sea groote Macht haud.
Usija siene Veschuldjunk un Krankheit
(2Kjen 15,5-7)
16Aus hee oba sea majchtich jeworden wia, deed sien Hoat sikj to sien vedoawen äwahäwen. Hee vejinkj sikj jäajen däm Harn, sienen Gott, un jinkj en dän Tempel, om selfst opp dän Ruakopfa Aultoa Weiruak to brennen. #2Chr 25,19 17Oba de Huagapriesta Asarja jinkj am hinjaraun un 80 von däm Harn siene Priesta, aules Mana dee väl Moot hauden, kjeemen met am met. 18Un see deeden jäajen däm Kjennich Usija oppträden un säden to am: Daut jehieet sikj die nich, Usija, däm Harn Ruakopfa to brinjen! Daut es bloos de Priesta, Aaron siene Nokomen erlaupt, waut doatoo jeweit sent, daut Ruakopfa to brinjen. Go rut ut daut Heilichtum, wiels du hast die vegonen, un daut woat die kjeene Iea ver Gott, däm Harn, brinjen. #2Mo 30,7; 4Mo 18,7 19Oba Usija, dee aul de Paun enne Haunt hilt om daut Ruakopfa to brinjen, wort wuttich; un aus hee soo wuttich wort äwa de Priesta, bruak doa aun sienen Stiern de Lepra ut. Un daut passieed en däm Harn sienen Tempel biem Ruakopfa Aultoa, ver de Priesta äare Uagen. 20De Huagapriesta Asarja un de aundre Priesta sagen met eenen Schrakj de Lepra aun sienen Stiern. Un see dreewen Usija fuaz ut däm Tempel rut; un hee selfst spood sikj uk met rutgonen, wiels hee moakjt daut, daut de Har am jestroft haud. 21Soo bleef de Kjennich Usija leprakrank bat sienen Doot un wond aus soona en een aufjesondadet Hus, un durf en däm Harn sien Hus nich mea nenkomen. Sien Sän Jotam oba stunt daut Kjennichshus väa un rejieed daut Volkj em Launt. #4Mo 5,2
22Waut noch mea von Usija to sajen es, de ieeschte uk de lotre Jeschichten, dee haft de Profeet Jesaja, Amoz sien Sän, beschräwen. #Jes 6,1; 1,1 23Un aus Usija storf, begrowden see am opp een Launtstekj biesied de Kjennichsjräwa. Un sien Sän Jotam wort Kjennich en siene Städ.
Currently Selected:
2. Chronik 26: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
