2. Chronik 24
24
De Kjennich Joasch sorcht fa dän Tempel
(2Kjen 12,1-17)
1Joasch wia säwen Joa oolt, aus hee Kjennich wort; un rejieed 40 Joa en Jerusalem. Siene Mutta heet Zibja, un staumd ut Beerscheba. 2Un Joasch deed waut däm Harn jefoll, soolang aus de Priesta Jojada läwd. 3Hee fried sikj twee Frues, waut Jojada fa am utjesocht haud, un haud Säns un Dajchta von an.
4Dan neem Joasch sikj väa, däm Harn sien Hus derch to oabeiden. 5Hee roopt de Priesta un Leviten toop un säd to an: Got derch aule Städa von Juda un saumelt Jelt von de Israeliten, om jieda Joa daut needje aun junen Gott sienen Tempel uttobätren; un spoot junt doabie! Oba de Leviten leeten sikj Tiet. 6Dan roopt de Kjennich dän Huagenpriesta Jojada no sikj un säd to am: Wuarom kjikjst du doa nich no, daut de Leviten de Aufgowen von Juda un Jerusalem enbrinjen? Moses, däm Harn sien Deena, un de gaunze Jemeent haben an aunjeordnet, daut see sellen von de Israeliten fa daut Vesaumlungszelt toopsaumlen? #2Mo 30,12-13 7Wiels de gottloose Atalja un äare Säns haben daut Gotteshus vefaulen jeloten, un haben soogoa de Gowen, waut fa däm Harn sien Hus jeweit wieren, fa de Baal Jetta vebrukt. #2Chr 22,3-4
8Opp de Aunordnunk vom Kjennich wort een Kausten jemoakt un biem Tempel aum Puat oppjestalt. 9Dan wort en Juda un Jerusalem bekauntjemoakt, daut jieda eena de Aufgowen enbrinjen sull, waut Moses, däm Harn sien Deena, don en de Wiltnis de Israeliten oppjelajcht haud. 10Dise Oppfodrunk wort von de väaschte Mana en Israel un daut gaunze Volkj met Freiden oppjenomen. See brochten äare Gowen un läden dee en däm Kausten, bat dee voll wia. 11Un jiedatsmol, wan de Leviten dän Kausten no däm Kjennich siene Vewaultasch brochten un dan sagen, daut doa väl Jelt bennen wia, dan kjeem däm Kjennich sien Schriewa un dee, dee vom Huagenpriesta jeschekjt wia, un see schedden daut ut däm Kausten rut un druagen däm wada trigj no sienen Plauz. Soo deeden see daut aule Dach un brochten väl Jelt toop. 12De Kjennich un Jojada jeewen daut Jelt de Bumeistasch, waut aun däm Harn sien Hus oabeiden deeden. Dise stalden Steen Hakasch un Buoabeida, un uk soone waut Iesa un Brons schmäden deeden aun, om dän Tempel nie to derchoabeiden un aul daut waut een Schoden jekjräajen haud uttobätren. 13Un de Bumeistasch sorjden doafäa, daut de Vebätrungsoabeit, waut see deeden, uk wieda kjeem. Un see stalden daut Gotteshus wada soo häa aus daut verhäa jewast wia. 14Un aus de Oabeit aufjeschloten wia, brochten de Bumeistasch daut äwajebläwne Jelt däm Kjennich un Jojada trigj. Un Jojada leet doavon Tempel Jereetschoft moaken, Kommen un aundre goldne un selwane Dinja, soo aus dee fa dän Gottesdeenst un bie de Brauntopfa jebrukt worden. Un see opfaden en däm Harn sienen Tempel pinkjlich Brauntopfa, soolang aus Jojada läwd.
15Jojada wort oolt un läwenssaut, un storf. Hee wia 130 Joa oolt, aus hee storf. #1Chr 29,28 16Un see begrowden am en de Davidstaut bie de Kjennichs, wiels hee aun Israel un aun Gott un sienen Tempel goodet jedonen haud.
De Kjennich Joasch velat dän rajchten Wajch
(2Kjen 12,18-22)
17No däm aus Jojada jestorwen wia kjeemen de väaschte Mana von Juda un veieeden däm Kjennich; un von doa aun leet hee sikj von an beroden. 18Un daut fieed doatoo, daut de Lied von Juda opphieeden, en däm Harn sienen Tempel to gonen om äare Vodasch äaren Gott to veieren, un deenden de Aschera un Jetta Bilda. Dan kjeem Gott sien Oaja äwa Juda un Jerusalem wäajen dise Schult. 19De Har schekjt an oba Profeeten, om an to woarnen un trigjtoroopen no am, oba see horchten nich no dee.
20Dan kjeem de Jeist Gottes opp Secharja, dän Priesta Jojada sienen Sän. Un dee jinkj bat ver daut Volkj un säd to an: Soo sajcht Gott: Wuarom doo jie däm Harn siene Jebooten äwaträden, un junt selfst em Ojjlekj brinjen? Jie haben däm Harn veloten, un doawäajen woat hee junt uk veloten! #(20 un 21) Mat 23,35; Heb 11,37 21Oba see muaken eene Veschwierunk jäajen Secharja un deeden am opp dän Kjennich sien Wuat em Väahoff vom Tempel steenjen. 22De Kjennich Joasch docht nich aun daut Metleet, waut Jojada, Secharja sien Voda, am bewäsen haud, un leet däm sienen Sän doot moaken. Un aus Secharja storf, säd hee: De Har woat daut seenen un bestrofen. #2Chr 23,1-21
23Aum Aunfank vom näakjsten Joa kjeem eene Grupp Kjrichsvolkj von de Aramäa. See kjeemen no Juda un Jerusalem un brochten aule leidende Mana em Volkj om, un schekjten aul daut jestolne Kaptol no däm Kjennich von Damaskus. #(23-27) 2Kjen 12,18-22 24Uk wan de Aramäa äa Häa uk mau met weinich Mana kjeem, jeef de Har een sea grootet Häa en äare Macht, wiels Juda däm Harn, äare Vodasch äaren Gott, veloten haud. Soo fieeden see aun Joasch daut Strofjerecht derch. 25Aus dee wada aufreisden, leeten see Joasch schwoa vewunt trigj. Un dan veschwuaren siene Hoffdeena sikj jäajen am wäajen däm Mort aun däm Priesta Jojada sienen Sän, un schluagen am opp sien Krankenbad doot. Un see begrowden am en de Davidstaut, oba nich en de Kjennichs äare Jräwa. #2Chr 21,20 26De Aunstefta von de Veschwierunk jäajen am wieren: Josachar, de Sän von de amoritische Fru Schimat, un Josabad, de Sän von de moabitische Fru Schomer. 27De List von siene Säns un de Somm von dän Taks, waut am oppjelajcht worden, un de Bu aum Tempel, daut steit jeschräwen en de Jeschichten em Buak von de Kjennichs. Un sien Sän Amazja wort Kjennich en siene Städ.
Currently Selected:
2. Chronik 24: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
