2. Chronik 23
23
Atalja woat rutjestat un daut Kjennichrikj von David siene Nokomen woat wada häajestalt
(2Kjen 11,4-20)
1Oba en daut säwende Joa foot Jojada dän Moot un muak eenen Bunt met de Truppenleida: Asarja, Jeroham sien Sän, Jischmael, Johanan sien Sän, Asarja, Obed sien Sän, Maaseja, Adaja sien Sän, un Elischafat, Sichri sien Sän. 2Dee reisden derch aule Städa von Juda un brochten de Leviten un de Leida von de Volkjsgruppen en Israel no Jerusalem toop. 3Un de gaunze Vesaumlunk schloot em Gotteshus eenen Bunt met däm Kjennich. Dan säd Jojada to an: De Kjennichs Sän saul Kjennich sennen, soo aus de Har daut fa David siene Säns toojesajcht haft. 4Wie woaren nu soo väagonen: Een Dreddel von junt, Priesta un Leviten, waut aum Sabat äaren Deenst aunträden, saul de Puaten bewoaken, 5un een Dreddel daut Kjennichshus un daut latste Dreddel daut Gruntpuat; un de Mana ut däm Volkj besaten de Väahäw vom Tempel. 6Kjeena Buta de Priesta un de Leviten, waut Deenst haben, sellen en däm Harn sien Hus gonen; dee sent fa dän Deenst jeweit. Un aul daut Volkj saul däm Harn siene Väaschreften beachten. 7Un de Leviten sellen sikj met äare Jewäaren enne Henj runt om dän Kjennich romstalen. Un wäa doa prooft em Tempel nenn to komen, woat dootjemoakt! Un see sellen rom dän Kjennich sennen, wan hee rut ooda nenn jeit.
8De Leviten un aule vesaumelde Mana von Juda befoljden de Aunwiesungen von däm Priesta Jojada gaunz jeneiw. Een jiedra roopt siene Lied toop, dee waut aum Sabat aunträden, uk dee, dee aum Sabat aufträden deeden. Wiels de Priesta Jojada leet de Aufdeelungen nich utenaunda gonen. 9Un de Priesta Jojada jeef de Truppenleida de Spiessen un Schilten un Jewäaren vom Kjennich David, waut em Tempel wieren. 10Un hee stald aul daut Volkj opp, jieda eena met een Jewäa enne Haunt, von de rajchte Sied vom Tempel em Sieden bat aun de linkje Sied em Nuaden ver däm Aultoa un däm Tempel rom dän Kjennich rom. 11Dan brochten see däm Kjennich sienen Sän rut un saden am de Kroon opp un jeewen am de Ordnunk un muaken am toom Kjennich. Jojada un siene Säns saulwden am un schrieejen: De Kjennich läft! 12Aus oba daut Volkj toopstreemd un däm nieen Kjennich met een Freiden Jeschrech tooroopen deed, hieed Atalja daut Jeschrech, un jinkj no daut Volkj, daut biem Harn sienen Tempel wia. 13Un dort sach see Joasch, dee aum Engank opp dän Kjennichs Plauz stunt, omkjrenst von de Truppenleida un Trompeeten Spälasch. Un aul daut Volkj vom Launt wia froo, un see blosden met de Trompeeten. De Sinja met aule Sorten Seidenspell stunden doa un jeewen daut Tieekjen toom Freidenjesank. Dan vereet Atalja äare Kjleeda un schrieech: Opprua, Opprua! 14Oba de Priesta Jojada säd to de Truppenleida, waut äwa daut Häa jesat wieren: Brinjt ar tweschen de Rieejen rut! Wäa ar hinjaraun jeit, woat met een Schwieet dootjemoakt! Wiels de Priesta haud jesajcht, see sullen ar nich em Tempel dootmoaken. 15Un see jreepen Atalja, un brochten ar no daut Pieets Puat aum Kjennichshus, un muaken ar doa doot.
16Jojada schloot eenen Bunt tweschen däm Harn un daut gaunze Volkj un däm Kjennich, daut see däm Harn sien Volkj sennen sullen. #2Chr 15,12 17Un dan jinkj daut gaunze Volkj no däm Tempel Baal un reet däm dol. See schluagen de Aultoaren un Jettabilda entwei un schluagen däm Baals Priesta Matan, ver de Aultoaren doot. 18Jojada jeef de Amta biem Tempel en de Priesta un Leviten äare Henj, waut David fa däm Tempel enjedeelt haud, om dän Harn Brauntopfa to brinjen, soo aus em Jesaz Moses jeschräwen steit. See sellen äaren Deenst met Freiden un met Jesank verechten, soo aus David daut aunjeordnet haud. #2Chr 7,6; 29,25-30 19Un Jojada stald uk Wajchta aun bie de Puaten aum Tempel, daut kjeena nenkjeem, waut sikj aun irjentwaut orrein jemoakt haud. 20Un dan neem Jojada de Befälshaba äwa 100, de väaschte un aunjeseene Mana un daut gaunze Volkj met sikj, om dän Kjennich vom Tempel derch daut bowaschte Puat rauf nom Kjennichshus to bejleiten. Un dort durf hee sikj opp dän kjennichlichen Stool saten. 21Un daut gaunze Volkj em Launt freid sikj, un de Staut bleef ruich, uk wan see Atalja hanjerecht hauden.
Currently Selected:
2. Chronik 23: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
