2. Chronik 21
21
Joram siene gottloose Rejierunk
1Aus Joschafat storf, wort hee biesied siene Vodasch en de Davidstaut begroft. Un sien Sän Joram wort Kjennich en siene Städ.
Kjennich Joram
(2Kjen 8,16-24)
2Joram haud miere Breeda, waut Joschafat siene Säns wieren: Asarja, Jehiel, Secharja, Asarja, Michael un Schefatja. Dit wieren aules Joschafat, däm Kjennich von Juda, siene Säns. 3Äa Voda jeef an väl Gowen von Selwa, Golt un wieetvolle Sachen, un doatoo noch fauste Städa en Juda. Oba dän Kjennichstroon jeef hee Joram, wiels hee de Ieeschtjebuarna wia. 4Aus Joram oba daut Kjennichsaumt von sienen Voda äwanomen haud un de Macht enne Haunt haud, leet hee aul siene Breeda met Schwieed ombrinjen, un uk noch eenje von de väaschte Mana en Israel.
5Joram wia 32 Joa oolt, aus hee Kjennich wort; un hee rejieed acht Joa en Jerusalem 6un waundeld no daut Biespel soo aus de Kjennichs von Israel deeden, besondasch soo aus Ahab siene Famielje jedonen haud, wiels hee Ahab siene Dochta to Fru haud. Hee deed waut däm Harn schlajcht jefoll. 7Oba de Har wull David sien Kjennichshus nich utroden, wiels hee met David eenen Bunt jeschloten un am vesproaken haud, am un siene Nokomen een Licht to jäwen fa aule Tieden. #2Sam 7,12; 1Kjen 11,36; Psa 132,17
8En Joram siene Rejierungstiet säden de Edomita sikj von Juda loos un saden sikj äaren ieejnen Kjennich en. 9Dan jinkj Joram met siene Truppenleida un met aul siene Kaumf Woages no Edom. Un de Edomita omkjrensten an un äare Kaumf Woages, oba hee muak sikj de Nacht opp un schluach de Edomita, waut am omkjrenst hauden, un de väaschte äwa de Woages. 10Un doch bleewen de Edomita onaufhenjich von Juda bat disen Dach. En de selwje Tiet foll Libna uk von Juda auf, wiels Joram haud däm Harn, siene Vodasch äaren Gott veloten.
11Joram muak uk Opfastäden opp de Boaj en Juda un veleid Juda un de Enwona von Jerusalem toom de Jetta deenen.
12Don kjrieech hee eenen Breef von däm Profeet Elia. Doabennen stunt: Soo sajcht de Har, dien Staumvoda David sien Gott: Du hast die nich aun daut jehoolen waut dien Voda Joschafat un dien Grootvoda Asa deeden, 13un best daut schlajchte Biespel von de Kjennichs en Israel jefolcht un hast Juda un de Enwona von Jerusalem to Aufjettarie veleit, to soone aus Ahab sien Kjennichshus eewen deit. Un doatoo hast du uk diene ieejne Breeda, dien Voda siene Famielje, omjebrocht, waut bäta wieren aus du. 14Doawäajen woat de Har die met eene groote Ploag schlonen aun dien Volkj, aun diene Kjinja, aun diene Frues un aun aul dien Kaptol. 15Du oba woascht schwoa krank woaren aun dienen Buck un lang lieden motten, bat die daut Enjeweide ut däm Buck rutkjwalen woat.
16De Har jeef de Filista un de Arabastam, waut dicht bie de Lied von Kusch wonden, em Senn, Joram auntojriepen. 17Un see kjeemen jäajen Juda opp un drenjden sikj doa nenn un neemen aulet Kaptol wajch, waut em Kjennichshus to finjen wia. See veschlapten uk siene Säns un siene Frues, soo daut sest kjeen Sän äwableef, buta Joahas, de jinjsta.
18No dit leet de Har däm Kjennich krank woaren. Un daut wia eene onheelboare Krankheit en sienen Buck, 19waut sikj lang vetrock. Un no twee Joa kwollen siene Enjeweide rut, un hee storf en eene furchtboare Noot. Un daut Volkj muak kjeenen grooten Braunt am to Iea, soo aus see fa siene Vodasch jedonen hauden. #2Chr 16,14 20Hee wia 32 Joa oolt, aus hee Kjennich wort; un rejieed acht Joa en Jerusalem. Hee storf, onen daut am wäa betruad. Un see begrowden am en de Davidstaut, oba nich en de Kjennichs Jräwa. #2Chr 24,25
Currently Selected:
2. Chronik 21: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
