1. Timotäus 4
4
Wadastaunt jäajen faulsche Lieren
1De Jeist sajcht sea dietlich, daut en de latste Tiet eenje vom Gloowen auffaulen woaren un sikj aun errfierende Jeista un Lieren hoolen, dee vom Soton staumen. #Mat 24,24; 2Tess 2,3; 2Tim 3,1; 2Pet 3,3; 1Joh 2,18; Jud 1,18 2See woaren to dit jebrocht woaren derch heichlarische Läajna, dee een Brenntieekjen em Jewessen haben. 3Dise lieren, daut Menschen sikj nich befrieen sellen, un vebeeden, daut to äten, waut Gott jemoakt haft, daut dee met Dank aunnämen sellen, dee doa jleewen un de Woarheit kjanen. #1Mo 9,3; 1Kor 10,30-31; Kol 2,23 4Wiels aules, waut Gott jemoakt haft, es goot, un aules, waut eena met Dank aunnemt, brukt nich wajch jeschmäten woaren; #1Mo 1,31; Mat 15,11; Apost 10,15 5wiels daut es jeheilicht worden derch Gott sien Wuat un derch daut Jebäd.
6Wan du de Breeda dit väahoolen deist, dan woascht du Christus Jesus goot deenen, aus eena dee siene Noarunk derch dän Gloowen ut de Woarheit nemt, aun dee du die helst. #2Tim 2,15 7Hab nuscht met weltliche Foblen to doonen, met dee, de oole Frues sikj aufjäwen; eew die en jetliche Dinja. #1Tim 6,20; 2Tim 2,16.23; 4,4; Tit 1,14; 3,9 8Wiels de kjarpaliche Eewunk halpt nich aul too väl, oba en jetliche Dinja eewen halpt fa dit Läwen uk fa daut eewje Läwen. #1Tim 6,6 9Dit Wuat es woa, un loont sikj auntonämen. 10Dit es daut, wuafäa wie oabeiden un sträwen, #4,10 Eenje oole Schreften sajen oabeiden un Veachtunk lieden. wiels wie onse Hopninj opp dän läwendjen Gott jesat haben, dee een Heilant fa aule Menschen es, un besondasch fa dee, dee doa jleewen.
Timotäus aus Väabilt, Liera un Seelsorja
11Dit lia un befäl de Menschen to doonen.
12Lot kjeenem opp die rauf kjikjen doawäajen, daut du noch junk best. Sie fa de jleewende een Väabilt em Wuat, em Waundel, en Leew, em Jeist, em Gloowen un en Reinheit. #2Tim 2,22; Tit 2,15 13Hool aun, de Schreft to läsen, to prädjen un to lieren, bat ekj komen woa. 14Vejat nich von dee Gow, dee du profeetisch kjrieechst aus de Eltestasch die de Henj oppläden. #Apost 6,6; 8,17; 1Tim 1,18; 5,22; 2Tim 1,6 15Eew die en diene Oabeit, un jeff die soo doarenn han, daut de Menschen seenen, daut du doarenn toonemst. 16Sorj soo fa die selfst un fa diene Lia, daut du doabie bliewen woascht. Wan du daut doonen woascht, woascht du die selfst seelich moaken, un uk dee, dee die hieren. #Reema 11,14
Currently Selected:
1. Timotäus 4: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
