1. Samuel 30

David sien Loaga woat bestolen

1Dan aum dredden Dach kjeemen David un siene Mana trigj no Ziklag, un fungen daut de Amalekita en daut Launt em Sieden Kanaan jestolen hauden un uk en Ziklag. Ziklag hauden see enjenomen un aunjestekjt. #1Sam 27,6 2See hauden uk aule Frues un dee waut met an wieren wajchjefieet, de oame un uk de rikje. See hauden kjeenem dootjemoakt, oba aulem metjenomen aus see trigjinjen. 3Aus David un siene Mana dan no de Staut kjeemen, fungen see dee utjebrent un daut äare Frues un Kjinja faustjenomen wieren. 4Un David un siene Mana schrieejen un hielden, bat see nich mea Krauft toom hielen hauden. 5David siene twee Frues wieren uk wajchjefieet, beid Ahinoam von Jesreel un Abigajil, dee Nabal von Karmel siene Fru jewast wia. #1Sam 25,42-43 6Dit wia eene schlemme Loag fa David. Siene Mana räden von am steenjen, wiels see soo jeschloagen wieren, daut äare Famieljes wajch wieren. Doch David funk Krauft en däm Harn sienen Gott. 7Un David säd to Abjatar, dän Priesta, dee Ahimelech sien Sän wia: Brinj mie dän Efod. Un Abjatar brocht David dän Efod. #1Sam 23,9 8Un David fruach däm Harn: Saul ekj dise Reiba hinjaraun joagen? Un woa ekj dee enholen? Un de Auntwuat kjeem: Go dee hinjaraun. Du woascht dee onbedinjt enholen un woascht gaunz secha de Jefangne raden. 9Dan läden David un siene 600 Mana loos un see kjeemen bat dän Riefa Besor. Doa deelden see sikj soo daut 200 Mana doa bleewen. 10David un 400 Mana juagen jane wieda hinjaraun un 200 bleewen bie dän Riefa, wiels see too meed wieren wieda to gonen.

11Dan fungen see eenen Ägipta oppe opne Stap un brochten dän no David. See jeewen am Broot to äten un Wota to drinkjen. 12Un see jeewen am een Stekj jepraste Fiejen un twee Stekja jepraste Rasienen. Aus hee jejäten haud kjeem siene Krauft trigj, wiels hee haud kjeen Broot ooda Wota jehaut fa dree Doag. 13Un David fruach am: Wäm jehieescht du, un von wua best du? Un dee säd: Ekj sie een ägiptischa Jung, un sie een Sklow fa een Amalekita. Mien Har leet mie hia dree Doag trigj, aus ekj krank wort. 14Wie bestoolen de Jäajent von de Kreeta en daut Launt em siednen Juda, un doa uk daut Kaleb Launt em Sieden. Dan stekjt wie Ziklag noch aun. #Jos 14,13; 2Sam 8,18 15Un David säd: Kaust du mie no de Baund wiesen? Un jana säd: Vespräakj mie opp eenen Eit ver Gott, daut du mie nich woascht ombrinjen un uk nich trigj no mienen Harn jäwen. Dan wies ekj die doahan, wua dee sent. 16Un de Jung wees an no de Baund. Dee hauden sikj breet vespreet opp daut Launt, un dee eeten un drunken un daunzten fa Freid wäajen aules, waut see enjenomen hauden en de Jäajent von Juda un von de Filista. 17Dän näakjsten Dach aus daut noch diesta wia, äwafoll David an un kjamft met an bat Owent. Kjeena von dee kjeem wajch, buta 400 junge Mana, dee sikj opp de Kameelen brochten un wajchranden. 18Un David rad aules waut de Amalekita jenomen hauden. Hee rad uk siene beid Frues. 19Daut fäld aun kjeent von äare Menschen, nich von oame un uk nich von de rikje, nich Junges un uk nich Mejales, un uk nuscht von daut jestolne. David brocht aules trigj. 20See fungen uk aul de Schop un daut Vee. See juagen daut ver sikj, un säden: Dit jehieet David!

21Dan kjeemen see bat doa wua de 200 Mana jebläwen wieren, dee too meed wieren toom met David gonen. Dee wieren bie däm Riefa Besor jebläwen un kjeemen David nu entjäajen. Un David kjeem noda no an un bejreest an. 22Oba aul de frajche un proste Mana, dee met David jegonen wieren, säden: Wiels dee nich dän gaunzen Wajch met ons kjeemen, woa wie an nu kjeent von daut jestolne jäwen, waut wie jekjräajen haben. Bloos äare Frues un Kjinja kjennen see nu haben. Dan motten see tofräd sennen. 23Oba David säd: Miene Breeda, soo woa wie daut nich doonen met daut, waut de Har ons enne Henj jejäft haft. Hee haft ons jeschizt un ons de Baund en onse Macht jejäft. 24Wäa kunn doch bloos met junt metstemmen? Dee waut bie onse Sachen bleewen, sellen krakjt soo kjrieen aus dee waut en däm Kaumf wieren. Jieda eena kjricht äwareen. #4Mo 31,27 25David muak daut dän Dach to eene Räajel, un daut haben see bat opp däm vondoagschen Dach noch emma soo jehoolen en Israel.

26Dan aus David no Ziklag kjeem, schekjt hee waut von daut jestolne no siene Frind, de Leidasch en Juda, met dise Norecht: Hia es eene Gow fa junt von daut jestolne von däm Harn siene Fiend. 27Hee schekjt waut no Betel, waut no Ramot en daut Launt em Sieden, waut no Jatir, 28waut no Aroer, waut no Sifmot, waut no Eschtemoa, 29waut no Karmel, waut no de Städa von de Jerachmeelita, waut no de Städa von de Kenita, #1Sam 27,10 30waut no Horma, waut no Bor Aschan, waut no Atach, 31waut no Hebron, un no aul de Städa wua David un siene Mana sikj oppjehoolen hauden.

Currently Selected:

1. Samuel 30: PB

Highlight

Copy

Compare