1. Samuel 29

David brukt de Filista nich halpen

1De Filista vesaumelden äare gaunze Armee bie Afek, un de Israeliten loagaden met äare bie de Kjwal en Jesreel. #Jos 15,53.56; 1Sam 4,1 2Dan aus de Leidasch von de Filista sikj weesen bie äare hundade un dusende, kjeemen David un siene Mana mank de latste, toop met däm Kjennich Achisch. #Jos 13,3 3Un de Kommandaunten von de Filista fruagen: Waut doonen dise Hebräa hia? Un Achisch säd: Dit es David. Hee wia eent von Kjennich Saul siene aunjestalde en Israel. Oba nu es hee aul äwa een Joa mank ons jewast un ekj hab de gaunze Tiet nuscht aun am jefungen daut mie nich jefelt. #1Sam 27,7 4Un de Kommandaunten von de Filista Armee worden sikj doll met am un säden: Schekj disen Maun trigj. Dee kaun trigj no de Staut gonen, dee du am jeefst. Dee saul nich met ons en däm Kjrich gonen. Dee kunn met eemol en däm Kaumf jäajen ons sennen. Woo kunn hee sikj bäta bie sienen Kjennich beleeft moaken aus met een poa von onse Läwes nämen? 5Dit es dee David von wäm see en äaren Daunz sungen: Saul haft siene dusende jeschloagen, un David siene tieendusende? #1Sam 18,7 6Dan roopt Achisch David un säd to am: Soo secha aus de Har läft, best du opprechtich to mie jewast, un mie schient daut rajcht, daut du met ons sust en däm Kaumf gonen. Von däm Dach aus du no mie kjeemst bat vondoag, hab ekj noch nuscht aun die jefungen, waut mie nich jefelt, oba de Volkjsleida wellen die hia nich haben. 7Doawäajen mott ekj nu sajen: Go frädlich trigj, un doo nuscht waut miene Volkjsleida oppräajen woat. 8Un David säd to Achisch: Hab ekj irjent waut orrajcht jedonen? Es doa irjent waut von don aus ekj no die kjeem bat vondoag, daut ekj nich saul jäajen dienen Fient kjamfen, mien Har un Kjennich? 9Un Achisch säd to David: Soo aus ekj die kjan, best du soo tru to mie jewast aus de Enjel to Gott. Oba de Kommandaunten von de Filista haben sikj beschloten, daut du nich met an saust en däm Kjrich gonen. #2Sam 14,17 10Zemorjes tiedich saust du die met diene israelitische Mana toop reed moaken un met daut ieeschte Doages Licht veloten. 11Dan tiedich dän näakjsten Morjen saden David un siene Mana loos, un jinjen trigj en de Filista äare Jäajent nenn. Oba de Filista jinjen no Jesreel.

Currently Selected:

1. Samuel 29: PB

Highlight

Copy

Compare