1. Samuel 18
18
David bie de Kjennichs Famielje
1Aus David met Saul utjerät haud, wia Jonatan siene Seel eent jeworden met David siene. Jonatan jleicht am soo sea aus hee sikj selfst deed. 2Un von däm Dach aun, leet Saul David nich trigj no sien Voda sien Tus gonen. #1Sam 16,22; 17,15 3Un Jonatan muak eenen Bunt met David, daut see sikj emma unjarenaunda biestonen wudden, wiels Jonatan hilt soo väl von David aus von sikj selfst. #1Sam 19,1; 20,17; 23,18; 2Sam 1,26; 21,7 4Jonatan neem sienen Rock auf un jeef David dän. Hee jeef am uk siene Schutzkjleeda un soogoa sien Schwieet un sien Boagen un sien Mauntel.
5David haud gooden Erfolch met jieda Oppgow, dee Saul am oppjeef, soo daut Saul am äwa de Kjrichsmana sad. Un aule Menschen jefoll daut, un uk aule Deena en däm Kjennich sien Hus jefoll daut. 6Aus daut Kjrichsvolkj no Hus kjeem un David trigjkjeem von däm Kaumf met dän Filista, kjeemen de Frulied äwadäl von aule Städa en Israel. See bejreesten Kjennich Saul met schaftje Leeda un met Drommeln un Zimbeln un Daunzen. #Rech 11,34 7To äaren Daunz sungen see: Saul haft siene dusende jeschloagen, un David siene tieendusende. #1Sam 21,12; 29,5 8Un de Wieed oajaden Saul un hee wort sea doll. Hee säd: David räakjnen see tieendusende aun, un mie dusende. Aules waut am noch fält, es daut hee Kjennich woat. 9Von don aun paust Saul sea opp no David.
10Aum näakjsten Dach kjeem een beesa Jeist von Gott äwa Saul, un hee jinkj sea aun en sien Hus. David späld aul fa am oppe Hoap, soo aus hee aule Dach deed. Un Saul haud eenen Spies enne Haunt. #1Sam 16,14.23 11Un Saul docht bie sikj: Däm David woa ekj aun de Waunt naunspalden, un hee schmeet sien Spies no am. Oba David kjeem am tweemol ut däm Stich. #1Sam 19,10; 20,33 12Nu haud Saul Angst fa David, wiels de Har wia met David un haud am oba veloten. 13Dan schekjt Saul am wajch un stald am aun aus een Kommandaunt äwa 1.000 Mana, un hee jinkj ver siene Truppen. 14David haud gooden Erfolch en aules waut hee deed, wiels de Har met am wia. #1Sam 18,5 15Aus Saul sach daut de Har met David wia, enjst hee sikj noch dolla. 16Aule Menschen en Israel un en Juda jleichten David wiels hee soon gooda Leida wia.
17Un Saul säd to David: Hia es miene elre Dochta, Merab. Ekj jäw die dee daut see diene Fru kaun sennen. Du brukst bloos fa mie enstonen un een browa Kjrieja sennen, un fa däm Harn en däm Kaumf gonen. Oba ieejentlich docht hee: Daut es bäta wan ekj am nich dolschlo. Lot de Filista daut doonen. 18Un David säd to Saul: Wäa sie ekj, un wäa sent mien Frintschoft? Wäa sent mien Voda siene Famielje, daut ekj sull däm Kjennich sien Schwieesän woaren? #2Sam 7,18 19Oba aus de Tiet kjeem daut Merab, Saul siene Dochta, haud sult David siene Fru woaren, wort see Adriel, däm Meholatita, jejäft aus siene Fru.
20Nu kjeem daut oba, daut Michal, Saul siene Dochta, sikj aun David veleeft haud, un aus Saul daut hieed jefoll am daut. 21Dan säd Saul to sikj: Ekj woa David miene Dochta Michal jäwen, daut see eene Schlenj fa am sennen woat, daut de Filista am woaren doot moaken. Doaderch kjeem daut, daut Saul toom tweeden mol to David säd: Du saust mien Schwieesän sennen. 22Un Saul säd to siene Deena, daut see stell met David räden sullen un am sajen, daut de Kjennich am jleicht un aule aunjestalde am jleichten, un daut hee nu sull däm Kjennich sien Schwieesän woaren. #1Sam 22,14 23Un Saul siene Deena jinjen un räden met David, un David säd: Jleew jie, daut et soo eefach es däm Kjennich sien Schwieesän woaren, wan ekj doch oam sie un goanich aunjeseenen? 24Un Saul siene Deena vetalden Saul, waut David jesajcht haud. 25Un Saul säd: Sajcht am, daut de Kjennich wenscht sikj sest nuscht fa ar aus de Väahut von 100 Filista. Soo kaun hee mie halpen aun miene Fiend Rach to eewen. Oba Saul docht daut David wudd veleicht selfst dootjemoakt woaren von de Filista, wan hee doano jinkj. 26Dit wort David uk jesajcht, un am jefoll daut, daut hee soo kunn däm Kjennich sien Schwieesän woaren. Ea de Tiet dan äwa wia, 27jinkj David, met siene Mana toop, un see schluagen 200 Filista doot. Un David brocht däm Kjennich de Väahut von jieda eenem von dee waut hee jeschloagen haud. Un hee tald dee ut ver däm Kjennich aus siene Tolinj, daut hee kunn däm Kjennich sien Schwieesän woaren. Soo jeef Saul siene Dochta Michal no David, daut see siene Fru wort.
28Aus Saul sach daut de Har met David wia un daut siene Dochta David jleicht, 29enjst hee sikj noch dolla fa David. Von don aun hilt Saul David emma aus sien Fient. #1Sam 18,12 30De Volkjsleida von de Filista kjeemen rut toom kjriejen, un jiedatsmol haud David mea Jlekj aus Saul siene aundre Truppenleida. Soo kjrieech David emma mea Aunerkjanunk.
Currently Selected:
1. Samuel 18: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
