1. Samuel 16
16
De Har wält sikj David
1Un de Har säd to Samuel: Samuel, woo lang woascht du äwa Saul truaren, no däm daut ekj am tosied jesat hab aus Kjennich äwa Israel? Nemm dienen Huarn un fell däm met Eelj un go no Isai von Betlehem. Ekj hab mie beschloten daut eent von däm siene Säns saul Kjennich sennen. #1Sam 15,23.35 2Un Samuel säd: Woo kaun ekj doahan gonen? Wan Saul daut to hieren kjricht, woat hee mie ombrinjen. Un de Har säd: Nemm die eene junge Koo vom Vee met, un saj du best jekomen om een Opfa fa däm Harn to moaken. 3Lod Isai en to daut Opfamol, un ekj woa die doa weeten loten, waut du doonen saust. Du saust fa mie däm ensaulwen, däm ekj die wiesen woa.
4Un Samuel deed waut de Har am säd. Aus hee no Betlehem kjeem, kjeemen de Stautsvodasch am ut Angst entjäajen. See fruagen am auf hee frädlich no an kjeem. 5Un hee säd: Jo, ekj well een Opfa moaken fa däm Harn. Moakt junt rein un dan ät jie daut Opfamol met mie toop. Un hee lod Isai un siene Säns en un sach doano daut dee sikj rein muaken, daut see kunnen to daut Opfamol komen. 6Aus dee dan kjeemen un hee dän Eliab sach, säd Samuel to sikj selfst: Dee, wäm de Har jesaulft well haben, steit nu secha ver am. 7Un de Har säd to am: Recht die nich no woo am daut lat, ooda doano woo groot hee jewossen es. Disen hab ekj tosied jesat. De Har recht nich soo aus de Mensch deit. Een Mensch sitt woo eena von buten lat; oba de Har kjikjt no daut Hoat. #Jer 17,10; Apost 10,34; Opb 2,23 8Dan roopt Isai dän Abinadab, daut dee ver Samuel kjeem. Un hee säd: De Har haft disen uk nich jewält. 9Dan leet Isai Schama väakomen. Un hee säd: De Har haft disen uk nich jewält. 10Un Isai leet säwen von siene Säns ver Samuel komen, oba hee säd: De Har haft dise uk nich jewält. #1Sam 17,12; 1Chr 2,13-15 11Un Samuel säd to Isai: Sent dit aul diene Säns? Un Isai säd: Doa es noch ons jinjsta, David. Dee deit Schop heeden. Un Samuel säd to Isai: Schekj doahan, daut dee häa kjemt. Wie woaren ons nich hansaten, ea dee es häa jekomen. #1Sam 17,14 12Un hee schekjt doahan un leet däm komen. De jinjsta wia rodlich un haud dache Uagen; am leet daut schmock. Un de Har säd to Samuel: Nu sto opp, un saulw däm en. Dit es de rechtja. 13Un Samuel neem dän Huarn met de Eelj, un saulwd David doa en, aus hee doa mank siene Breeda wia. Un däm Harn sien Jeist bewees sikj en Krauft opp David von däm Dach aun. Un Samuel jinkj trigj no Rama. #2Sam 2,4; 5,3; Psa 89,21
14Nu kjeem daut, daut däm Harn sien Jeist Saul veleet. Un een beesa Jeist vom Harn kjeem un juach am Forcht en. #1Sam 18,10 15Un Saul siene Deena säden to am: Horch emol. Doa es een beesa Jeist von Gott, dee die soo enjsten deit. 16Lot onsen Harn sajen, daut een Mensch saul jesocht woaren, dee goot kaun met de Hoap spälen. Dan wan de Jeist von Gott die aunfajchten deit, kaun dee spälen, un du woascht die wada goot feelen. 17Un Saul säd to siene Deena: Got un sieekjt mie soonen Mensch un brinjt däm häa. 18Un eena von de aunjestalde säd: Ekj hab eenen Sän von Isai von Betlehem jeseenen, un dee es sea jeschekjt met siene Hoap. Daut es een browa Maun un een Kjrieja. Hee kaun goot räden un am lat daut goot. Un de Har es met am. 19Dan schekjt Saul Mana daut dee no Isai jinjen un säden: Schekj mie dienen Sän David, dee bie de Schop es. 20Un Isai belod een Äsel met Broot un een Lada voll Wien un eene junge Kos, un schekjt dee met sienen Sän David no Saul. 21Un David kjeem no Saul un wort däm sien Deena. Saul jleicht David sea, un hee stald am aun aus eena von dee, dee sien Jewäa druagen. 22Un Saul schekjt eene Norecht no Isai un fruach auf David nich bie am bliewen kunn un am deenen kunn, wiels am dän jefoll. 23Un jiedatsmol wan de beesa Jeist, dän Gott schekjt, opp Saul kjeem, neem David de Hoap un späld doabowen. Dan feeld Saul sikj wada bäta un de beesa Jeist veleet am.
Currently Selected:
1. Samuel 16: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.