1. Samuel 15

Saul sien Jehuarsom woat aufjeprooft

1Un Samuel säd to Saul: De Har schekjt mie emol die aus Kjennich äwa daut Volkj Israel entosaulwen. Soo dan nu horch no waut de Har to die sajcht. #1Sam 10,1 2De Har, dee aules rejieet, sajcht: Ekj woa Amalek strofen doafäa daut see Israel Jäajenstaunt jeewen aus see von Ägipten kjeemen. #(2 un 3) 2Mo 17,8-16; 5Mo 25,17-19 3Go met een Kjrich jäajen Amalek, un venicht aules waut see haben. Lot nuscht äwa un brinjt aules om: de Mana, de Frues, de Kjinja, un Bäbes, un uk daut Vee, de Schop, de Kameelen, un Äsels. 4Un Saul roopt sien Kjrichsvolkj toop bie Telem, un tald dee. Doa wieren 200.000 Kjrieja von Israel un 10.000 von Juda. 5Dan jinkj hee met siene Mana no de Amalekita äare Staut un vestuak sikj doa em Tol. 6Un Saul leet de Kenita weeten daut see sullen nich mank de Amalekita bliewen, sest wudden see uk omjebrocht woaren. De Kenita wieren de Israeliten toojedonen jewast aus see von Ägipten kjeemen. Un de Kenita jinjen wajch von mank de Amalekita. #Rech 1,16 7Un Saul kjriejd jlekjlich äwa de Amalekita, von Hawila gaunz bat Schur. Schur licht oosten von Ägipten. 8Hee neem däm Amalekita Kjennich, Agag, läwendich faust, un brocht aul de Menschen om met daut Schwieet. 9Oba Saul un sien Kjrichsvolkj leeten däm Kjennich Agag aum Läwen un uk de baste Schop un daut baste Vee, un uk de baste Lama un Kjalwa. Un see hilden uk sest noch waut goot wia, oba waut an kjeenen Wieet haud, venichten see gaunz.

10Un de Har säd to Samuel: 11Daut es mie leet daut ekj Saul toom Kjennich jemoakt hab, wiels hee haft sikj wajch jedreit von mie un haft miene Jebooten nich jehorcht. Un Samuel wia sea vestieet, un bäd de gaunze Nacht ver däm Harn. #1Mo 6,6 12Un Samuel jinkj tiedich aum näakjsten Morjen, daut hee met Saul räden kunn. Un am wort jesajcht, daut Saul no Karmel jekomen wia un haud doa een Denkjmol fa sikj oppjestalt. Dan wia hee no Gilgal jegonen. #Jos 15,55 13Un Samuel jinkj no Saul, un Saul bejreest am un säd: Mucht de Har die, Samuel, säajnen. Ekj sie däm Harn jehuarsom jewast. 14Un Samuel fruach: Wuarom hia ekj dan noch Vee un Schop? 15Un Saul säd: See haben dee von de Amalekita jebrocht. Daut Volkj hilt de baste Schop un daut baste Vee toom een Opfa moaken fa däm Harn, dienen Gott. Daut äwaje hab wie aula venicht. 16Nu wacht een bät, säd Samuel. Ekj woa die sajen waut de Har mie latste Nacht säd. Un Saul säd: Saj emol. 17Un Samuel säd: Du räakjenst die selfst veleicht nich väl, oba best du nich de Leida von de israelitische Stam? De Har haft die aus Kjennich enjesäajent äwa Israel. #1Sam 9,21 18De Har säd doch aus hee die schekjt, daut du sust de sintelje Amalekita gaunz venichten. Hee säd du sust met dee kjriejen bat see gaunz wajch wieren. 19Wuarom hast du däm Harn sien Wuat nich jehorcht? Wuarom neemst du noch daut Vee un de Sachen von an, soont waut däm Harn schlajcht jefoll? 20Un Saul säd to Samuel: Ekj jehorcht däm Harn. Ekj jinkj soo aus hee mie säd. Ekj hab däm Kjennich Agag trigj jebrocht un ekj hab aule Amalekita aufjeschauft. 21Oba de baste Schop un daut baste Vee haben miene Mana nich aufjeschauft. See haben dee hia no Gilgal jebrocht om een Opfa to moaken fa däm Harn, dienen Gott. 22Un Samuel säd: Jefaulen däm Harn de Opfa soo sea aus am jehuarsom sennen? Kjikj. Jehuarsom es bäta aus Opfa. No am horchen es bäta aus Bockfat opp een Aultoa. #Jes 1,11-17; Jer 7,22; Hos 6,6; Amos 5,21-22; Micha 6,6-8; Sach 7,5-7; Mat 9,13; 12,7 23Jäajenaun sennen es soo schlemm aus Hakjsarie, un stieekoppich sennen soo schlemm aus waut beeset doonen un aus waut no de Jetta opfren. Doawäajen daut du däm Harn sien Wuat veacht hast, haft hee die uk veacht aus Kjennich. #1Sam 16,1 24Un Saul säd to Samuel: Ekj hab jesindicht. Ekj sie jäajen däm Harn sien Jeboot un jäajen dien Wuat jegonen, wiels ekj mie fa miene Mana enjst un no an horcht. 25Un ekj pracha die nu: Vejeff mie miene Sind un go met mie, daut ekj kaun däm Harn aunbäden. 26Oba Samuel säd to Saul: Ekj woa nich met die gonen, wäajen du däm Harn sien Wuat veacht hast. Un de Har haft die veacht aus Kjennich äwa Israel.

27Aus Samuel sikj omdreid wieda to gonen, kjrieech Saul Samuel sienen Rock to hoolen, un dee reet en. 28Un Samuel säd to Saul: De Har haft daut Kjennichrikj vondoag von die jeräten, un haft daut eenen aundren jejäft dee bäta es aus du. #1Sam 28,17 29Israel äa harlicha Gott licht nich, un hee nemt sien Wuat uk nich trigj. Hee es nich soo aus een Mensch, dee sien Wuat mott trigjnämen. #4Mo 23,19 30Un Saul säd: Ekj hab jesindicht. Oba iea mie hia ver de Leidasch von mien Volkj un ver Israel. Go trigj met mie daut ekj däm Harn, dienen Gott, aunbäden kaun. 31Un Samuel jinkj met Saul, un Saul bäd däm Harn aun.

32Un Samuel bestald: Brinjt däm Amalekita Kjennich, Agag, hia no mie. Un Agag zettad aus hee ver am kjeem. Hee docht: Ekj sto ver eenen betren Doot. 33Samuel säd: Soo aus du met dien Schwieet hast väle Mitta äare Säns jenomen, soo woat diene Mutta nu onen äa Sän sennen. Un doa, en Gilgal, en jehuarsom fa däm Harn, hakt hee Agag en Stekja. 34Un Samuel jinkj no Rama, un de Kjennich Saul jinkj no sien Hus en Gibea. 35Samuel sach Saul nich wada ea Saul storf, oba Samuel wia daut schod om Saul. Daut wia däm Harn schod daut hee Saul haud toom Kjennich jemoakt äwa Israel.

Currently Selected:

1. Samuel 15: PB

Highlight

Copy

Compare