1. Samuel 14

Jonatan woacht sikj väl

1Een Dach säd Jonatan, Saul sien Sän, to dän jungen Maun dee sien Jereetschoft druach: Well wie emol no de Filista äa Loaga aun jane Sied gonen. Oba Jonatan säd sienen Voda Saul nuscht von sienen Plon. 2Saul haud sien Zelt nich wiet von Gibea unja eenen Fruchtboom bie Migron. Doa wieren bie 600 Mana bie am, 3un uk Ahija, dee dän Efod druach. Ahija sien Voda wia Ahitub, un sien Grootvoda un Uagrootvoda wieren Pinhas un Eli, de Priesta en Silo. Ahitub wia Ikabod sien Brooda. Kjeene von dise wisten daut Jonatan wajchjegonen wia. #2Mo 28,6-30; 1Sam 4,19-21; 2Sam 8,17 4Om no de Filista äa Loaga to gonen must Jonatan delenjd dän Michmas Wajch derch de Boaj. Doa wieren twee steile Boaj, eena aun jieda Sied von däm Wajch. De Boajch aun de eene Sied heet Bozez, un de Boajch aun de aundre Sied heet Senne. 5De Boajch aun de nuadne Sied von däm Wajch wia dicht bie Michmas, un de Boajch aun de siedne Kaunt wia dicht bie Gibea. 6Un Jonatan säd to dän jungen Maun, dee sien Jereetschoft druach: Well wie emol no dee onbeschnädne Filista gonen. Veleicht halpt de Har ons. De Har kaun halpen auf derch een deel ooda een poa. #Rech 7,7; 2Chr 14,10 7Un de junga Maun säd: Wan die daut goot schient, dan well wie gonen. Go du veropp. Wua du han jeist, go ekj uk. 8Un Jonatan säd: Dan well wie doa han gonen un ons von an seenen loten. 9Wan dee to ons sajen: Wie sellen fa an wachten, dan well wie bliewen un nich an entjäajen gonen. 10Oba wan see sajen: Komt häa, dan well wie no an gonen. Daut es een Tieekjen daut de Har ons an en onse Macht jejäft haft. 11Un see leeten sikj beid von de Filista seenen. Un de Filista säden: Kjikjt emol, eenje Hebräa sent ut äare Lajcha jekomen, wua see sikj vestuaken. 12Un see roopten Jonatan un sienen Deena un säden: Komt emol häa. Wie woaren junt waut wiesen. Un Jonatan säd to däm Jereetschoft Dräaja: Komm mie hinjaraun. De Har haft jane en Israel äare Macht jejäft. 13Un Jonatan kroop opp Henj un Feet nopp no de Filista äa Loaga opptoo, un de Deena am hinjaraun. Un Jonatan schluach de Filista dol, un sien Deena schauft dee no am auf. 14Un en dise ieeschte Schlacht, brocht Jonatan bie 20 Mana om, en ojjefäa een haulwet Aka. 15Dit brocht eene groote Forcht en daut Loaga un opp de Filista en dee Jäajent. De Kjrieja un de Gruppen waut Israel beplindren sullen, fungen aun to zetren. De Ieed scheddad un see vewilladen un veschrocken. #1Sam 7,10

16Un Saul siene Wajchta en Gibea en de Jäajent von Benjamin sagen daut de Filista vewillat romranden. 17Un Saul säd: Seet emol no, wäa von onse Kjrieja wajch es. Un aus see nosochten, sagen see daut Jonatan un dee waut sien Jereetschoft druach, nich doa wieren. 18Un Saul säd to Ahija: Brinj Gott siene Kjist häa, un froag däm Harn no sien Rot. Gott siene Kjist wia to dee Tiet bie de Israeliten. #1Sam 21,10 19Un aus Saul noch met dän Priesta räd, vewilladen de Filista sikj noch emma dolla. Un Saul säd to däm Priesta: Nu brukst aul nich mea. 20Un Saul roopt aul siene Mana un see reffelden sikj daut see en de Schlacht jinjen. De Filista worden soo vewillat daut see kjeen Wadastaunt jeewen un schluagen sikj uk unjarenaunda dol. #Rech 7,22; 2Chr 20,23 21Eenje Hebräa, dee äwa no de Filista äare Sied jegonen wieren, kjeemen nu trigj un holpen Saul un Jonatan. 22Eenje waut sikj mank de Boaj en Efraim vestoaken hauden, hieeden daut de Filista oppe Flucht wieren, un kjeemen nu uk en de Schlacht halpen. 23De Israeliten juagen de Filista hinjaraun, bat Bet Awen un wieda. Soo holp de Har Israel aun dän Dach.

24Un de Israeliten worden dän Dach sea meed, wiels Saul haud met een Eit bestalt: Mucht een Fluch komen opp irjent wäm, dee doa waut at ver Owent un ekj mie aun miene Fiend jerajcht hab. Kjeene Kjrieja hauden dän Dach waut jejäten. 25Un aus de Mana bat en däm Woolt kjeemen, sagen see doa Honnich oppe Ieed, 26waut doa utjerant wia. Oba see ferchten sikj fa dän Eit un kjeena eet von dän Honnich em Woolt. 27Jonatan, oba, haud nich jehieet, daut Saul daut Volkj met dän Eit daut äten veboden haud. Un hee schapt waut Honnich met de Spetz von sienen Stock, dän hee en de Haunt druach, un eet doavon. Doamet feeld hee sikj fuaz stoakja. 28Un eena von de Mana säd to Jonatan: Dien Voda haft met een Eit ons daut äten vondoag veboden. Doawäajen sent de Mana soo blaus. 29Un Jonatan säd: Mien Voda haft daut schwoa jemoakt fa daut Volkj. Ekj feel mie soo väl bäta, wiels ekj waut Honnich jejäten hab. 30Daut wia väl bäta jewast, wan de Menschen frie hauden kunt von daut äten, waut see von de Filista enneemen. Woo väl mea haud wie kunt doonen, wan see aula jejäten hauden. 31Dän Dach schluagen see de Filista dol von Michmas bat Ajalon. Un de Mana wieren sea meed un utjehungat.

32Un see randen no daut waut see von däm Fient jeplindat hauden. See neemen de Schop un Rinda un Kjalwa un schlachten dee doa oppe Ieed un eeten daut Fleesch met daut Bloot doa noch bennen. #3Mo 3,17 33Un eenje säden to Saul: Horch emol, de Mana haben sikj vesindicht doaderch daut see daut Fleesch äten met daut Bloot doa noch bennen. Un Saul säd to de Kjrieja: Jie schaufen jäajen ons. Rolt emol eenen grooten Steen bat hia. 34Un dan säd Saul: Got aulawäajen mank daut Volkj un sajcht dee: Lot eenen jiedren sien Oss ooda sien Schop häa brinjen, daut wie daut schlachten un äten. Un sindicht nich jäajen däm Harn doamet daut jie Fleesch äten met daut Bloot doabennen. Un soo brochten see aula äa Vee aun dän Owent un schlachten daut doa. 35Un Saul recht doa eenen Aultoa opp fa däm Harn. Daut wia de ieeschta Aultoa, waut hee fa däm Harn opprecht.

36Un Saul säd: Well wie nu enne Nacht gonen de Filista aunjriepen un dee bat däm Morjenroot beplindren, un dee aula ombrinjen. Un see auntwuaden am un säden: Doo waut du jleefst waut goot es. Oba de Priesta säd: Well wie ieescht Gott aunbäden. 37Un Saul bäd un fruach Gott auf hee sull de Filista hinjaraun joagen, un auf Gott an wudd de Macht äwa dee jäwen. Oba Gott auntwuad dän Dach nich. #1Sam 14,18; 23,9-12 38Un Saul säd to de Leidasch en daut Volkj: Komt häa, un well wie noseenen, daut wie weeten kjennen, woo wie ons vesindicht haben. 39Ekj saj hia ver däm Harn, dee Israel jewennen halpt, daut deejanja, bie wäm de Sind jefungen woat, saul onbedinjt stoawen, un wan daut mien Sän Jonatan es. Nich eena von en daut Volkj säd waut doatoo. 40Dan säd Saul to daut Volkj: Jie woaren aun eene Sied sennen un ekj un Jonatan woaren aun de aundre Sied stonen. Un de Menschen säden: Doo waut die daut baste schient. 41Un Saul bäd: Har, dee du Israel äa Gott best, wuarom hast du ons vondoag nich jeauntwuat? Har, dee du Israel äa Gott best, wan de Schult opp mie ooda opp mienen Sän Jonatan licht, dan wies ons daut met Urim; oba wan dien Volkj Israel schuldich es, dan wies daut met Tummim. Un Gott wees opp Jonatan un Saul, un daut Volkj wia frie. #2Mo 28,30; 4Mo 27,21; 5Mo 33,8; 1Sam 28,6 42Un Saul säd: Nu wies ons tweschen mienen Sän un mie. Un daut wort opp Jonatan jewäsen. 43Un Saul säd to Jonatan: Waut hast du jedonen? Un Jonatan säd: Ekj eet een bät Honnich opp däm Enj von mien Stock dän ekj en de Haunt haud. Hia sie ekj; ekj sie reed toom stoawen. #Jos 7,19 44Un Saul säd: Mucht Gott siene Strof opp mie komen, wan du, Jonatan, nich fa dit stoafst. 45Un de Menschen säden to Saul: Woascht du Jonatan aufschaufen, dee vondoag disen grooten Siech en Israel jewonnen haft. Sea lang nich! Soo secha aus doa een läwendja Gott es, woat hee nich een Hoa von opp sienen Kopp velieren. Hee haft vondoag met Gott siene Help daut mäajlich jemoakt daut wie jewennen kunnen. Soo muak daut Volkj Jonatan frie, un hee brukt nich stoawen. 46Un Saul jinkj de Filista nich mea hinjaraun, un de Filista jinjen trigj no äare Jäajent.

47Aus Saul Kjennich äwa Israel wort muak hee Kjrich met aul siene Fiend dee runtom am wieren. Hee kjriejd met de Moabita, de Amonita, de Edomita un jäajen de Kjennichs von Zoba, un uk jäajen de Filista. Un hee jewonn aul dee Kjriej. 48Un Saul deed browe Dinja, un hee jewonn uk dän Kjrich met de Amalekita, un hee rad Israel von dee, dee an beplindren wullen.

49Saul siene Säns wieren: Jonatan, Jischwi, un Malkischua. Un hee haud twee Dajchta; de elre heet Merab, un de jinjre heet Michal. #1Chr 9,39 50Saul siene Fru heet Ahinoam. See wia Ahimaaz siene Dochta. De Kommandaunt von sien Kjrichsvolkj wia sien Fada Abner, sien Onkel Ner sien Sän. #1Sam 17,55 51Saul sien Voda wia Kisch, un Abner sien Voda wia Ner, un äa Grootvoda wia Abiel. #1Chr 9,36.39

52Un en de gaunze Tiet daut Saul Kjennich wia, wia doa väl Trubbel met de Filista. Un jiedatsmol wan Saul eenen stoakjen browen Maun sach, neem hee däm en siene Armee.

Currently Selected:

1. Samuel 14: PB

Highlight

Copy

Compare