1. Chronik 23

David sat de Leviten äare Deenstgruppen en

1Aus David oolt un läwenssaut wia, muak hee sienen Sän Salomo toom Kjennich äwa Israel #1Kjen 1,28-40 2un leet aule väaschte Mana en Israel un de Priesta un Leviten tooproopen.

3Un David leet aule Mana von de Leviten, dee 30 Joa un doaräwa wieren, talen; un de Zol von de Mana, no de Kjap aufjetalt, wia: 38.000. 4Von dise worden 24.000 to de Oabeit aun däm Harn sien Hus aunjestalt, un 6.000 aus Beaumte un Rechta 5un 4.000 to Puatenwajchta un 4.000 aus Sinja, waut däm Harn lowen un doabie opp Instrumenten spälen sullen, waut David toom Dankleeda sinjen haud moaken loten.

6David deeld de Leviten en dree Aufdeelungen en, no de Aufstaumunk von Levi siene Säns: Gerschon, Kehat un Merari. #1Chr 6,1 7Von Gerschon wieren Ladan un Schimi. 8Ladan siene Säns wieren: Jehiel, de väaschta, un dan Setam un Joel, dise dree. #1Chr 26,21 9Schimi haud uk dree Säns: Schelomit, Hasiel un Haran, dit wieren aules Leida en de Volkjsgruppen, waut von Ladan aufstaumden. 10Schimi haud vea Säns: Jahat, Sisa, Jeusch un Beria. 11Jahat wia de ieeschta Sän, un Sisa de tweeda. Jeusch un Beria hauden mau weinich Kjinja un talden doawäajen mau to eene Volkjsgrupp, un uk mau to eene Deenstgrupp.

12Kehat siene Säns wieren dise vea: Amram, Jizhar, Hebron un Usiel. #1Chr 5,28 13Amram siene Säns wieren: Aaron un Moses. Aaron un siene Nokomen worden fa aule Tieden toom Priesta Deenst utjewält. An wieren de heilichste Oppgowen aunvetrut. Bloos see durwen fa däm Harn Opfa opp däm Aultoa vebrennen un de Vesaumlunk en däm Harn sienen Nomen säajnen. #4Mo 6,24-27; 5Mo 10,8; 1Chr 5,29; 6,34 14Oba Moses, däm Gottesmaun siene Säns, worden to däm Staum Levi jetalt. 15Moses haud twee Säns: Gerschom un Elieser. #2Mo 18,3-4 16Von Gerschom wia Schubael de ieeschta Sän. #1Chr 26,24 17De Sän von Elieser wia Rehabja. Un Elieser haud kjeene Säns mea. Oba Rehabja haud sea väl Säns. #(17-23) 1Chr 24,21-30 18Jizhar sien ieeschta Sän wia Schelomit. 19Un Hebron siene Säns wieren: Jerija, de väaschta, Amarja, de tweeda, Jahasiel, de dredda, un Jekamam, de vieeda. 20Usiel siene Säns wieren: Micha, de väaschta, un Jischija, de tweeda.

21Merari siene Säns wieren: Machli un Muschi. Machli haud twee Säns: Eleasar un Kisch. #1Chr 6,4 22Eleasar hinjaleet, aus hee storf, kjeene Säns nich, wiels hee haud bloos Dajchta; un Kisch siene Säns, äare Vadasch, neemen an to Frues. 23Muschi haud dree Säns: Machli, Eder un Jeremot.

24Dise Gruppenleida von Levi siene Nokomen worden beoppdroacht, met äare Volkjsgruppen toop dän Deenst aum Tempel to äwanämen. Aule Mana von 20 Joa un doaräwa worden jetalt un jieda eena met Nomen en de List enjeschräwen. 25David säd: De Har, Israel äa Gott, haft sien Volkj Ru veschauft, soo daut et hia bestendich wonen kaun, un hee woat uk aulen Tiet en Jerusalem wonen. #Joel 4,21 26Un nu brucken de Leviten uk nich mea däm Harn siene Woninj un daut Jereetschoft toom Deenst droagen soo aus frieejoa. 27No David siene latste Aunwiesungen worden aule Leviten, von 20 Joa un doaräwa jetalt, 28un see sullen de Priesta, Aaron siene Nokomen, to Haunt stonen em Deenst en däm Harn sien Hus. See sullen de Väahäw un de Stowen äwawoaken, un daut heilje Jereetschoft reinjen un aul de veschiedne Oabeiten doonen, waut em Tempel väakjeemen. 29See sullen daut jeweide Broot, daut Mäl toom Ätesopfa, daut plaute onjesuade Broot, de Paunen toom reeschen, un aule Wichten un Moten aun Haunt haben. 30Un jieda Morjen sullen see stonen, om dän Harn met Leeda to lowen un to danken, un krakjt soo uk aun jieda Owent. 31Un emma, wan däm Harn Brauntopfa jebrocht worden, aum Sabat, aum Niemon un opp de groote Fasta, sullen see en de väajeschräwne Zol ver däm Harn deenen. 32Soo sullen de Leviten äaren Deenst aun daut Vesaumlungszelt, un de heilje Städ verechten un de Priesta, äare Staumbreeda, bie aul äare Oppgowen unjastetten.

Currently Selected:

1. Chronik 23: PB

Highlight

Compare

Copy