Ap CHIK'B'AB'L
CHIK'B'AB'L
Aju' yol Apokalipsis a tz'elpuna'ju' ye'k'u'n. Kyej q'o'n u'j lu mankb'il tej kyb'aj kub'nk'u'n kykyaqil txqantl u'j toj Ak'a'j Tu'jil, qu'n mankb'ilxi' kub' tz'ib'a'na'. Xi' nyolina'xi'x kyi'j naku'j witzik' ex kyi'j ti'xti' b'aj tzaj tyek'u'n Dyos, tuk'i'l txqan techlal ex nim txqan yol junxi'tlchaq tz'elpuna' tz'ib'a'n mujqa kyuk'i'l techlal, toj jun ttxolil intoq kane toj kywitzju' okslal eb'jaw ẍch'inte toju' tq'ijlalil lu, ex nimqe'tl xjal min nkanetoq toj kywitz tojxju' tq'ijlalil lu, kse'nx toju' tq'ijlalil ja'lo min nche kane toj qwitz ajtjaw qẍch'i'n. ¿Titiqu'ntzun tz'ib'a'na' tuk'i'l techlal? Qu'n kub' tz'ib'a'n toj jun tq'ijlalil ljo'ntoq toj kyq'iju' okslal kuwxi'x tjaq' kykawb'il aj Rom. Qu'mtzun iltoqti'j tu'n kyonetju' okslal toj kyokslab'l ex tu'n tqe kyk'u'j ti'j Dyos, tuk'i'l txqan ti'xti' tb'anilxi'xte techlal ex tilb'ilal, aju' tzaj ye'k'u'n qa nakuxwitloj che kanb'alju' tipumalj taq'wixil, atzunte' kanb'ab'l te b'ajsb'il aju' te Dyos tuk'i'l Jesukrist. Qu'mtzun atitoq tu'n tkub' kywab'a'nkyib' toju' yajb'ilkye tu'n tpaj ljo'n tojkyqi'j kyu'n xjal.
Iky matxi' tz'ok q'o'na' b'inchb'ente u'j lu kse'n jun aq'untl nkub' yek'un tuk'i'l tq'ojq'ojel chnab'. Qu'n ti'jxi'ju' tq'ojq'ojel chik'b'ab'l (tnej jun tqek' jun pomni toj wajxaq: 1.1-8) tzula' juntl tnej tq'ojq'ojel chnab' twitz tx'otx', nyolin tej tyek'u'njtz Krist nimaq toklen ex kyi'ju' u'j b'ajx tz'ib'a'n kyeju' wuq k'loj okslal (tnej jun tqek' b'eljoj pomni toj tnej oxe' tqek' junaq kab'e': 1.9—3.22). Ex ljo'ntlu' juntl tnejtl tq'ojq'ojel toj kya'j (tnej kyaje' ex jwe'). Aju' tnejel ti'xti' xi' nyolina' kyi'ju' wuq sey (tnej qaq tqek' jun pomnix toj tnej wajxaq tqek' jun: 6.1—8.1) ajnb'aj tyolin (toj tnej wuq) kyi'ju' nok q'o'n kyechlal tu'n Dyos. Atzu'n tkab' ti'xti' xi' nyolina' kyi'ju' wuq chun ex kyi'ju' oxe' jiq'cha'n tnej wajxaq tqek' kab'e' pomnix toj tnej kyajlajoj tqek' winqi'n (8.2—14.20), ex ati juntl nyolin ti'jxju' lu kyxolju' tnej ntma'n tzalu (tnej lajoj tqek' jun pomnix toj tnej junlajoj tqek' oxlajoj: 10.1—11.13). Atzu'n toxi'n ti'xti' atzu' nyolina' kyi'j wuq b'as tnej o'lajoj tqek' jun pomnix toj tnej qaqlajoj tqek' junaq jun (15.1—16.21). Atzu'n tnej tku'x kyxol axtzu' lepchika' ti'ju' toxi'n ti'xti' ex nyolin ti'ju' b'ajsb'il twitz tx'otx' (tnej wuqlajoj pomni toj tnej winqi'n tqek' o'lajoj: 17.1—20.15). Atzu'n ti'xti' te b'ajsb'il: nyolin ti'ju' ak'a'j tnam Jerusalen (tnej junaq jun tqek' jun pomnix toj tnej junaq kab'e' ex tqek' o'lajoj), yajxi'tzuntl nyolin te b'asb'il, a ntma'nju': ¡Kutzaja, Taye Jesus! chij.
Tnejelxi'x nyolinju' tu'jil Ye'k'u'n ti'j tkyaqilju' ntoq b'aj toju' tq'ijlalil tej tkub' tz'ib'a'n, mujqa tej ch'inxtltoq tb'aju' tnejel jo'naq ab'q'i tulen Qajaw. Intoq yolin b'a'nxi'x kyeju' okslal toju' tq'ijlalil tej tkub' tz'ib'a'n, mya jun tqanilwit ti'ju' kse'n toju' tq'ijlalil ja'lo. Mixti' ntma'n jun tqanil ti'ju' tzul yajxi'tl, atzunju' tpakb'al ntma'n toju' u'j lu nim toklen kyeju' xjal toj tkyaqil tq'ijlalil. Intma'n toju' u'j lu qa maskye nimtoj tq'ijlalil naku'j jaku' che kanb'anju' tipumal tajaw il, layx che kanb'an qu'n ate Dyos kkanb'al tejumajx kyib'aj, tu'nel Qajaw Jesukrist. Atzun yolju' lu te q'uqb'ab'l qk'u'j, te kuwsb'ilqe ex tu'n tokqe qk'u'j ti'j kse'n ntma'nju' b'ajsb'il u'j te Xjan Tu'jil.
Currently Selected:
Ap CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999