Ap 2
2
Tpakb'al kye okslal aj Epeso
1Tz'ib'anxa teju' anjl kyxol okslal aj Epeso kyjalu: Intma'nju' ate' wuq che'w toj tb'a'nq'ob' ex nb'et kyxolju' wuq kykb'el kantil q'anpwaqqe', kjalu: 2Wojtzqi'ne' tkyaqilju' ntb'incha'na; wojtzqi'ne' nxi'x aq'unana nim ex ljo'n tu'na, ex wojtzqi'ne' min nche tk'mo'na b'inchal taq'wix. Ex wojtzqi'ne' matxi' tzik'twitza kyi'ju' nok kyq'o'n kyib' te apostl extzun mya apostlqe', matz'el tnik'a kyi'j chalyolqe'. 3Matxi' tz'ok tilil tu'na ex matxi' yajtiya tu'n npaje', ex min nsiktiya. 4Naqtzun o'kxju' ati jun tila nwitze': mixti'tlju' tk'u'jlalila atitoq tnejel. 5Qu'mtzun na'ntza jaxkub'a tz'aqa, kutanjtz ti'j tanmiya ex b'inchamtla ntoq tb'incha'na tnejel. Qatzun min, chin ule' ti'ja ex k'elel wiq'i'ne' kykb'el tkantila jata'ya. 6Ajun b'a'n ntb'incha'na, in nel tik'u'na kyb'inchb'aju' nikolayit, ikxwe' nel wik'u'ne'. 7¡Alkyete ati t-ẍkyin, b'imju' ntma'n Xewb'aj Xjan kye okslal! Alkyete makub'ti'j tu'n, kxe'l nq'o'ne' anb'il te tu'n twan ti'ju' tze te chwinqlal ati toj tnajb'il Dyos, chiku'ya, chij.
Tpakb'al kye okslal aj Esmirna
8Tz'ib'anxa te anjl ati kyxol okslal aj Esmirna kjalu: Intma'nju' T-xetnejel ex te B'ajsb'il, aju' kyim ex jaw anq'in, kjalu: 9Wojtzqi'ne' yajb'il ex prowil nik'xtu'na, q'inun tzunta. Ex kanli nwitze' myab'a'n kyyolju' nok kyq'o'n kyib' te aj Juda ti'ja, extzun jun k'loj ajb'elqe' te tajaw il. 10Lalun xob'a teju' tzul ti'ja, qu'n che okyex jpu'n junjunkye' tu'n tajaw il, tu'n kyokye' kykyaqile' toj joyb'ilkyi'je'; ex che yajtel lajoj q'ije'. Qama tz'okqe kyk'u'je' wi'je' tzmax ajkykyime', kxe'l nq'o'ne' kykanb'ab'le' aju' chwinqlal tejumajx. 11¡Alkyete ati t-ẍkyin, b'imju' ntma'n Xewb'aj Xjan kye okslal! Alkyetzunte makub'ti'j tu'n lay yajtitl tu'n tkab' kamik, chiku'ya, chij.
Tpakb'al kye okslal aj Perkamo
12Tz'ib'anxa te anjl kyxol okslal aj Perkamo kjalu: Intma'n q'i'n tk'uẍtx'e'nb'il ch'ut te kab'e' plaj twitzte, kjalu: 13Kanli nwitze' najliya toju' tnam jata' tq'uqb'il tajaw il; ex luya q'uqli tk'u'ja wi'je'. Min nkub' tewa'na tokslab'la wi'je', tk'i'xpe'wt tej tkub' b'yo'n Antipas tziyalxi'x wi'je' toju' nintnam lu janajla' tajaw il. 14Naq o'kx junjun tilju'ya nwitze': ate' junjun kyxole' min nkyej kykoli'n t-xnaq'tzb'il B'alaam, ju' q'onte tnab'l B'alak tu'n kyxitq'o'n aj Israel toj il tej kyok tchq'o'n tu'n t-xikywan wab'j kub'ni q'o'n kywitz witzleb' ex tu'n tel kypa'n kyib' ti'j Dyos. 15Ex ate' junjun kyxole' min nkyej kykoli'n kyxnaq'tzb'il nikolayit. 16Qu'mtzun kutanjtz ti'j tanmiya; qatzun min, lwiyxi'x chin ule' ti'ja, ex chin q'ojile' kyi'je' tuk'i'l k'uẍtx'e'nb'il netz toj ntziye'. 17¡Alkyete ati t-ẍkyin, b'imju' ntma'n Xewb'aj Xjan kye okslal! Alkyete makub'ti'j tu'n, kxe'l nq'o'ne' twa ti'ju' wab'j e'wa'n te toj kya'j; ex kxel nq'o'ne' jun saq ab'j te, jatz'ib'a'nka' jun ak'a'j b'iyj mix-a'lo' ojtzqilte, o'kx ojtzqilteju' mak'monte, chiku'ya, chij.
Tpakb'al kye okslal aj Tyatira
18Tz'ib'anxa te anjl ati kyxol okslal aj Tyatira kjalu: Luju' Tk'wal Dyos, ikyqe' twitzju' kse'n tqantaq' q'aq' ex ikyqe' tqan kse'n q'ank'uxb'il ẍtilsa'n, intma'n kjalu: 19Wojtzqi'ne' tkyaqilju' ntb'incha'na; kanli nwitze' ati tk'u'jlalila, ati tokslab'la, nnajb'ena ex ljo'n tu'na, nxi'x aq'unana ja'lo kyetwitz tnejel. 20Naq o'kx tiljuya weye': nxitq'o'na anb'il te' qya Jesab'el, nok tq'o'ntib' te t-sanjelal Dyos, extzun nche t-sb'u'n nmajine' tu'n t-xnaq'tzb'il, nche oktchq'o'n tu'n kyb'inchan ajpaji'n ex tu'n t-xikywan wab'j kub'ni q'o'n kywitz witzleb'. 21Matxi' txinq'o'ne' anb'il te tu'n tanjtzti'j tanmi; mixtzunti'x nanjtzti'j tanmi ex min nkyajtq'o'n ajpaji'n. 22-23Qu'mtzun ktzajel nq'o'ne' yab'il ti'ju' qya lu, ex che kb'el nb'yo'ne' nche k'monte t-xnaq'tzb'il ex nelkypa'n kyib' ti'j Dyos. Qatzun ma tz'antzti'j kyamni ex ma kyanjsa kyib' tuk'i'l Dyos, lay kub' ntz'e'ysa'ne' kywitz. Ikytzu'n k'elela' kynik' kykyaqil okslal qa wojtzqi'ne' kynab'l ex toj kyanmi, ex kxe'l nq'o'ne' tu'me'l t-xel kye kse'nxju kyb'inchb'aj. 24Aye'tzunkye' najlqe'ye' toj tnam Tyatira, aye'ye' min ljo'n xnaq'tzb'il lu kyu'ne' ex min nche xnaq'tzane' ti'ju' t-xnaq'tzb'il tajaw il, ju' nkyma'n junjun qa nim nab'l tajb'il, lay kub' nq'on juntl iqtze' kyib'aje'. 25Naq o'kx kytzyume' atitl kyeye' tzmax ajwule'. 26Alkyete makub'ti'j tu'n ex ntb'incha'n wajb'ile' tzmax ajtjapun mankb'il q'ij, kxe'l nq'o'ne' toklen kyib'aj nimaqtnam, 27kse'nte Nmane' matzaj tq'o'n woklene'; kkawil kyib'aj nimaqtnam tuk'i'l k'uxb'il b'aston, ex che b'elttxiju'n kse'n tx'otx' k'wil. 28Ex kxe'l nq'o'ne' sqixun che'w te. 29¡Alkyete ati t-ẍkyin, b'imju' ntma'n Xewb'aj Xjan kye okslal! chiku'ya, chij.
Currently Selected:
Ap 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999