Mt CHIK'B'AB'L
CHIK'B'AB'L
Teyile junjunju' pakb'alte tpakb'al b'a'n kub' ttz'ib'anju' tuj tuk'i'l jun tb'is tk'u'j ex se'nxju' kane toj twitz. Aju' tnejel tu'jil tpakb'al b'a'n kub' ttz'ib'a'n Matey xi' nyolina' ti'j Jesus qa ate Kristju' Klolqe tzaj tchq'o'n Dyos tu'n tjapunju' tzajni ttziya'n teju' ttanam toj Ojtxi' Tu'jil. Nk'u'mile ttenju' tz'ib'a'n toju' u'j lu, tzajni qex kyi'ju' tyajilb'en Jesus exju' titz'jlen, ex nkyajten junaq lajoj (30) ab'q'i txol, nxitljo'ntl tyolin ti'ju' taq'un Xwan jawsal a' ul nej q'malte tpakb'alil ti'j Jesus (1.1—3.12). Atzu' tzyeta' taq'un Jesus tej tjaw a' twi' kywitz kykyaqil xjal ex tej tok toj joyb'ilti'j tu'n tajaw il (3.13—4.11). Xi' nyolina'xi'xju' u'j lu ti'ju' taq'un Jesus toj tx'otx' Kaliley, japakb'ana', xnaq'tzana' ex jaeq'aneta' yab' tu'n (4.12—18.35), tzmax tej tpon mankb'il maj toj Jerusalen (caps. 19 ex 20). Ex nyolin ti'ju' b'aj ti'j Jesus toj mankb'il sman ex npon b'aj tej tjaw q'o'n Jesus twitz krus ex tej tjaw anq'in, ex tej tkub' tyek'u'ntib' kywitzju' t-xnaq'tzb'en, intma'n toju' tnej (caps. 21-28). In pon b'aju' u'j lu ti'ju' tchaq' Jesus kyeju' eb'jo'k lpe ti'j, tu'n txi' kyma'n tyol kye xjal toj tkyaqil twitz tx'otx' tu'ntzun kyok te t-xnaq'tzb'en Jesus.
Aju' tu'jil tpakb'al b'a'n lu in tyek'u'n a Jesus jun xnaq'tzal nimaq toklen, tuk'i'l toklen tu'n tpjunteju' tkawb'il Dyos ex tu'n tq'onte xnaq'tzb'il ti'ju' tkawb'il. Pa'n ttenju' t-xnaq'tzb'il toj jwe' tu'me'l kjalu: Tnejel aju' tpakb'ab'l twi' witz, nyolin ti'j tu'me'l qchwinqlal, tiju' tu'n qb'inchante, ti'ju' ntzaj tq'o'n Dyos qe ex ti'ju' kb'ajil kyi'ju' xjal toj tkawb'il Dyos toj kya'j, (caps. 5-7); Tkab' nyolin ti'ju' chik'b'ab'l xitq'o'n Jesus kyeju' kab'lajoj t-xnaq'tzb'en tej kxi' pakb'alte tyol kye xjal (cap. 10); Toxi'n nyolin kyi'ju' techlal ti'j tkawb'il Dyos toj kya'j (cap. 13); Tkyaji'n nyolin tib'aju' se'n tu'n qoka' te t-xnaq'tzb'en Jesus (cap. 18) Tjwe'yi'n xnaq'tzan tib'aju' mankb'il tq'ijlalil ex aju' tulel tkawb'il Dyos (caps. 24 ex 25).
Currently Selected:
Mt CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999