Lc CHIK'B'AB'L
CHIK'B'AB'L
Ate' tpakb'al b'a'n tu'n Lukas nyolin ti'j Jesus, mya naqx Klolkyeku' xjal aj Israel, ex ikx Klol kye xjal toj tkyaqil twitz tx'otx'. Atzu' toju' tpakb'al b'a'n lu nq'ancha'lixa' tb'is tk'u'ju' kub' tz'ib'ante tqanil ti'j tchwinqlal Jesus. Aju' tz'ib'alte u'j lu ntchik'b'a'n toju' tnejel tnej qa macheb'aj tjyo'nju' u'j tz'ib'a'n nche b'ajyolin ti'j tchwinqlal Jesus, macheb'aj tka'yinju' tb'inchb'aj ex macheb'aj ttz'ib'a'ntzuntz nk'u'mile tten (1.1-4). Qu'mtzun a toju' tpakb'al b'a'n lu nimxi'xju' tqanil ti'ju' titz'jlen Jesus ex tej tch'iy kyetwitz toju' u'j kub' ttz'ib'a'n Matey, ex ikx ti'j tchwinqlal Xwan Jawsal a' (1.5—2.52). Qu'n nimqeju' tqanil o'kx tqe'ya' toju' tpakb'al b'a'n lu. Ex ikx junx kyuk'i'l tpakb'al b'a'n tu'n Matey ex tu'n Kuẍ, ajxi' kb'aj yolin ti'ju' tpakb'ab'l Xwan Jawsal a' (3.1-20) ti'j tej tjaw a' twi' Jesus ex ti'j tej tok toj joyb'ilti'j tu'n tajaw il (3.21—4.13), nche yolintzuntz ti'ju' tpakb'ab'l Jesus kwitz kkyaqil xjal toj Kaliley (4.14—9.50). Ikxu' se'n kab'e'tl tpakb'al b'a'n, ex ikx ntma'nju' se'n kyoju' kab'e'tl tpakb'al b'a'n tej tokx Jesus toj Kaliley tu'n tpon toj Jerusalen (9.51—19.27), aju' sman te b'is (19.28—23.56) ex nyolin ti'ju' tjatzlen anq'in Jesus kxol kyimni, tej tkub' tyek'u'ntib' ex tej txi' toj kya'j (cap. 24).
Atzu' toju' tpakb'al b'a'n lu nel yalaju' tqanil ti'ju' taq'un Jesus kwitz txqan xjal ex tej tpon toju' tja k'u'lb'il toj Nasaret, expe' majx ntma'n qa yolin ti'ju' tyol Dyos tz'ib'a'n tu'n Isayiy toju' tuj tej tyolin toj tja k'u'lb'il, ex se'n tmaya' Jesus qa atiju' Xewb'aj te Qman Dyos toj tu'n tq'onte b'a'n tqanil kyeju' prow. Atzu' toju' tpakb'al b'a'n lu nq'ancha'lixa' qa nlaqj tk'u'j Jesus kyi'ju' prow, kyi'ju' nche yajt ex kyi'ju' nche el ik'u'n. Tu'nju' nyolin titi' b'aj tej titz'ji Qajaw Jesukrist ex tej tjawx toj kya'j, aju' tpakb'al b'a'n lu nyolin ti'ju' tzalajb'il. Aye'ju' techlal nche yolin ti'ju' b'a'n xjal aj Samarya ex ti'ju' manb'aj nkub' tnajsa'n tilju' tk'wal, o'kxtzu' nel yala' toju' tpakb'al b'a'n lu. Ex majx q'ancha'l inxi'x yolin ti'ju' na'j Dyos, Xewb'aj Xjan, ti'ju' najsb'il il ex ti'ju' kyaq'un qya toju' taq'un Qman Dyos.
Currently Selected:
Lc CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999