Jer 46
46
Kub'kyi'j aj Ejipt toj Karkyemis
1Tzaj yolin Qman Dyos te Jeremiy kyi'ju' nimaqtnam. 2A tzaj tma'nju' ti'j Ejipt ex kyi'jku' t-xjal paraon Nekao te q'oj, nimaqkawil toj Ejipt, ju' atitoq Karkyemis, jata' nin a' Ewprates, ex kub' b'yo'n tu'n nimaqkawil Nab'ukodonosor aj B'ab'ilon, toj tkyaji'n ab'q'i ntoq kawin Joakyin, tk'wal Josiy, nimaqkawil aj Juda, ikjalu:
3¡Kynk'unku'ye' kykolb'ile'!
¡Kukyxi'ye' q'ojil!
4¡Kyq'onkxe' kyiqb'il b'a'nchej!
¡Kukyjawe' b'a'n che chejine' kyi'j!
¡Kq'onkxe' kolb'il kywi'ye' ex kytxolinx kyib'e'!
¡Kyjqume' kych'ute'!
¡Kyq'onke' kyktone' k'uxb'il!
5¿Titi'tzu'n nka'yi'ne'?
In anjtzkyi'j tu'n kyxob'el.
Makub' kyi'ju' kyxjal te q'oj ex mache'x slamj,
nche b'je'l oq, min nche'x ka'yin kytze'lkyi'j.
¡Ati xob'el toj tkyaqil plaj!
Ayine' Dyos Manb'aj nchin yolin.
6¡Layx b'ent kyoqu' kuw che b'et,
ex lay che tzaqpaju' kuw che q'ojin!
Inche jaw xliktz'aj ex nche kub' tz'aq
ttzi nin a' Ewprates toj tb'a'nq'ob'kya'j.
7¿Alkyetzu'n in ch'iy kse'n nin a' Nilo,
kse'n jun tnimal a' nxi'x toloq'in?
8A Ejipt nch'iy kse'n Nilo,
kse'n jun tnimal a' nxi'x toloq'in.
Nkyma'n aj Ejipt kjalu: Qo ch'iyel ex knojel twitz tx'otx' qu'n,
che b'elqxitu'n nimaqtnam kyuk'i'lxi' najlqe' kyoj, chechij.
9¡Kutzun kyxi' txqan ti'j chej!
¡Kukyxi' txqan toj karwaj!
¡Tu'n kyb'ajxju' q'ojil:
e' aj Etyopiy ex aj Lib'ya te q'oj,
iq'i'mile kykolb'il;
ju' xjal aj Lidya te q'oj,
b'a'nxi'x che smajin!
10A nq'iju'ye' lu, ayine' Dyos Manb'aj nimwipumale',
a q'iju' knq'a'ye' tu'me'l t-xel kye wajq'oje.
Che b'ajel tu'n K'uẍtx'e'nb'il tzmax ajtkanb'an,
tzmax aj tk'wan chik'.
Kna' nb'incha'we' jun b'yojxjali'n ayine' Dyos Manb'aj
toju' nintnam toj tb'a'nq'ob'kya'j, tk'etz nin a' Ewprates.
11¡Aj Ejipt,
kukyxi'ye' Kalaad jyol q'a'nb'il!
¡B'a'nqa matz'ajb'en txqan q'a'nb'il kyu'ne',
mixti'xte' tajb'en kyeye',
mixnati'tlkye' q'a'nb'il kye!
12B'i'ntlte' kyu'n nimaqtnam qa matxi' che kub'me'sa'ne',
ex in b'injtza toj tkyaqilju' tx'otx' nẍch'ina;
nche b'jo'k takpuju' q'ojil kyi'jilex,
ex junx nche kub' kyxq'ipla'nkyib' twitz tx'otx', chi Dyos.
Toktzaqpaj Nab'ukodonosor q'ojil ti'j Ejipt
13Tej xi'toq tpon Nab'ukodonosor, nimaqkawil aj B'ab'ilon, q'ojil ti'j Ejipt, tzaj yolin Qman Dyos te Jeremiy, tma:
14Kymanxe' tqanil toj Ejipt,
toj Mikdol, toj Menpis ex Tapnes:
¡B'a'nqe'xe', kyb'incham kytene'!
¡Lu k'uẍtx'e'nb'il ljo'n twan kyi'jileye'!
15¿Tiqu'n soqa' Apis, tman kwakyixe' xjan?
¿Tiqu'ntzun min xkub'we'?
Mana' kub' nxitu'ne', ayine' Dyos Manb'aj.
16Nche b'jaw trakpuju' kyxjale' te q'oj ex nche kub' tz'aq,
nkyma'ntzuntz kyxolilex:
¡Qoqe' ex tzalu, qo'qe'ye' toj qtaqnam,
toju' tx'otx' ja o'itz'ja'!
¡Qoqe' oq teju' q'oj!, chechij.
17Kymanxe' ti'j paraon, nimaqkawil toj Ejipt:
Inxi'x tyoli'ntib', ajtzun tpon tq'ijlalil, mixti'tl nnel ttzi, chechiku'ye'.
18Ayine', nimaqkawil qine',
a nb'iye' Dyos Manb'aj nimtipumal,
kxe'l nma'ne' axxi'x:
Iky ajq'oju' tzul,
kse'n witz Tab'or, nimin twe',
ex kse'n witz Karmelo, nim jawna' lq'e tib'aj ninnjab'.
19Kyb'incham kyib'e' tu'n kyexe' ti'jxi' tnam,
ju' najlqe'ye' toj Ejipt,
kna' k'okyelte' Menpis te chq'ajlaj,
kjel xitj, mixti'tl knajal toj.
20Ikyte Ejipt kse'n jun tal wakx tb'anil ka'yin,
extzun mache tzaj txqan ta'jinchej toj tb'a'nq'ob'kya'j ch'olte.
21Ikyqe' t-xjalju' te q'oj chjo'nqe'
kse'nqe' qpoj tman wakx q'u'sqe',
ex ikxkye che elex oq
ex layx che kuwan,
qu'n kpomel q'ij tu'n kykub'o'lj,
ajtpon kmoj tu'n ttz'e'yset kywitz.
22Inxi'x che xub'an aj Ejipt kse'n kan ajkykub' oq
ajkyul lq'e xjal ajq'oj
q'ojil kyi'j tuk'i'l k'uxb'il,
naku'j nche tx'emun nimaq tze.
23¡Che b'ajel kytx'emu'n kynimaqk'ul jupin!
Ayine' Dyos Manb'aj nchin yolin.
Nimxi'x kyb'aj kyekywitz ẍt'ikt'u'l,
mix-a'lo'x kb'antel tajlankye.
24Che b'el me'sa'n aj Ejipt,
ex che kb'el tjaq' tkawb'ilju' tnam te tb'a'nq'ob'kya'j, chi Qman Dyos.
25Lu xtma Qman Dyos nimtipumal nche ajb'en aj Israel te, ikjalu:
Kb'el ntz'e'ysa'ne' twitz Amon, kydyos aj Teb'as, ex kb'el ntz'e'ysa'ne' kywitz aj Ejipt kyuk'i'lxi' kydyos exqe' kynimaqkawil, ex paraon kyuk'i'lxi' q'uqlok kyk'u'j ti'j. 26Knb'incha'ye' tu'n kykub'tz'aq toj kyq'ob' kyajq'oj b'iyulqe', toj tq'ob' Nab'ukodonosor, nimaqkawil aj B'ab'ilon, ex toj kyq'ob' t-xjal. Ajtzun tik' jun tq'ijlalil, kb'el naja'n jumajtl Ejipt kse'n tnejel. Ayine' Dyos Manb'aj nchin yolin, chi Qman Dyos.
Oktkla' Qman Dyos ttanam
(Jer 30.10-11)
27Lan che xob'e' tyajajil Jakob', ju' nmajine',
lalun che xob'e' aj Israel.
Kna' che nkla'kye' kyuk'i'l kyk'wale'
teju' najchaq tnam jaẍe'xa' q'i'ne'.
K'anjetzkyi'je' najal toj nak'b'il,
mixti'te q'oj ex mix-a'lo' kxob'tzalkyeye'.
28Ayine' Dyos Manb'aj nchin yolin:
Lan che xob'e' tyajajil Jakob', ju' nmajine',
intina'we' kyuk'i'le'.
Che kb'el nxitu'ne' kykyaqil nimaqtnam
jachaq ẍeb'ajxa' nsputi'ne'.
Aye'tzunkye' lay che kub' nxitu'ne',
o'kx che kxelntzak'u'ne' toj kyile',
ilti'j kb'el ntz'e'ysa'ne' kywitze', chi Dyos.
Currently Selected:
Jer 46: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999