الرُّؤْيَا 3

الْفَصْلْ التَّالْتْ

الرِّسَالَة لْلْكْنِيسَة فْسَارْدِسْ

1وْكْتَبْ لْلْمَلَاكْ دْيَالْ كْنِيسْةْ سَارْدِسْ: «هَا مَا كَيْݣُولْ هَادَاكْ اللِّي عَنْدُه الْأَرْوَاحْ السّْبْعَة اللِّي كَيْخَدْمُو لْلَّهْ وْعَنْدُه النّْجْمَاتْ السّْبْعَة: كَنْعْرَفْ كُلّْ مَا كَتْدِيرْ، رَاكْ كَتْبَانْ حَيّْ وَلَكِنْ نْتَ مْيّْتْ. 2سْهَرْ وْتّْقُوَّى مْنْ جْدِيدْ فْدَاكْشِّي اللِّي بْقَى لِيكْ قْبَلْ مَا يْمُوتْ، حِيتْ دَاكْشِّي اللِّي كَتْدِيرْ مَا لْقِيتُوشْ كَامْلْ قُدَّامْ اللَّهْ. 3إِيوَا تْفَكّْرْ دَاكْشِّي اللِّي تْعَلّْمْتِيهْ وْسْمَعْتِيهْ، وْدِيرْ بِيهْ وْتُوبْ، حِيتْ إِلَا مَا سْهَرْتِيشْ غَنْجِي لِيكْ بْحَالْ الشّْفَارْ، وْمَا غَتْعْرَفْشْ آشْ مْنْ سَاعَة فَاشْ غَنْجِي عْلَى غَفْلَة.#متى 24‏:43‏،44؛ لوقا 12‏:39‏،40؛ الرؤيا 16‏:15 4وَلَكِنْ عَنْدْكْ نَاسْ قْلَالْ فْسَارْدِسْ مَا وَسّْخُوشْ حْوَايْجْهُمْ، هَادُو هُمَ اللِّي غَيْمْشِيوْ مْعَايَ بْحْوَايْجْ بِيضِينْ عْلَاحْقَّاشْ كَيْسْتَاهْلُو. 5اللِّي غْلَبْ غَيْلْبَسْ حْوَايْجْ بِيضِينْ، وْمَا غَادِيشْ نْمْحِي سْمِيتُه مْنْ كْتَابْ الْحَيَاةْ. وْغَنْعْتَرْفْ بْسْمِيتُه قُدَّامْ بَّا وْالْمَلَايْكَة دْيَالُه.#الرؤيا 20‏:12؛ متى 10‏:32؛ لوقا 12‏:8 6إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».

الرِّسَالَة لْلْكْنِيسَة فْفِيلَادِلْفْيَا

7وْكْتَبْ لْلْمَلَاكْ دْيَالْ كْنِيسْةْ فِيلَادِلْفْيَا: «هَا مَا كَيْݣُولْ الْمْقَدّْسْ اللِّي هُوَ الْحَقّْ، اللِّي عَنْدُه السَّارُوتْ دْيَالْ دَاوُدْ، اللِّي كَيْحَلّْ وْحْتَّى وَاحْدْ مَا يْقْدَرْ يْسَدّْ، وْكَيْسَدّْ وْحْتَّى وَاحْدْ مَا يْقْدَرْ يْحَلّْ: 8كَنْعْرَفْ كُلّْ مَا كَتْدِيرْ، هَانِي حْلِّيتْ قُدَّامْكْ بَابْ حْتَّى وَاحْدْ مَا يْقْدَرْ يْسَدُّه، عْلَاحْقَّاشْ وَاخَّا الْقُوَّة دْيَالْكْ قْلِيلَة، رَاكْ دْرْتِي بْكْلَامِي وْمَا نْكَرْتِيشْ الْإِسْمْ دْيَالِي. 9هَا مَا غَنْدِيرْ بْهَادُوكْ اللِّي مْنْ دَارْ الْعِبَادَة دْيَالْ الشِّيطَانْ، اللِّي كَيْݣُولُو بْلِّي هُمَ يْهُودْ وْهُمَ مَاشِي يْهُودْ وَلَكِنْ غِيرْ كَيْكْدْبُو، غَنْجِيبْهُمْ بَزّْزْ بَاشْ يْسَجْدُو قُدَّامْ رْجْلِيكْ وْغَيْعَرْفُو بْلِّي أَنَا كَنْبْغِيكْ. 10وْعْلَاحْقَّاشْ دْرْتِي بْكْلَامِي وْصْبَرْتِي، حْتَّى أَنَا غَنْحْمِيكْ فْسَاعْةْ الْمْحْنَة اللِّي غَتْدُوزْ فِيهَا الدّْنْيَا كُلّْهَا بَاشْ يْتّْجَرّْبُو بِيهَا ݣَاعْ سُكَّانْ الْأَرْضْ. 11هَانِي جَايْ دْغْيَا. إِيوَا تْبَتْ مْزْيَانْ فْدَاكْشِّي اللِّي عَنْدْكْ بَاشْ حْتَّى وَاحْدْ مَا يْخْطَفْ لِيكْ التَّاجْ دْيَالْكْ. 12اللِّي غْلَبْ، غَنْرَدُّه سَارْيَة فْبِيتْ اللَّهْ الْإِلَاهْ دْيَالِي، وْعَمّْرُه مَا غَيْخْرُجْ مْنُّه، وْغَنْكْتَبْ عْلِيهْ إِسْمْ الْإِلَاهْ دْيَالِي وْسْمِيّْةْ مْدِينْةْ الْإِلَاهْ دْيَالِي، اللِّي هِيَ أُورْشَلِيمْ الجّْدِيدَة النَّازْلَة مْنْ السّْمَا مْنْ عَنْدْ الْإِلَاهْ دْيَالِي، وْغَنْكْتَبْ عْلِيهْ الْإِسْمْ دْيَالِي الجّْدِيدْ.#الرؤيا 21‏:2؛ إشعيا 65‏:15 13إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».

الرِّسَالَة لْلْكْنِيسَة فْاللَّاوُدِكِيَّة

14وْكْتَبْ لْلْمَلَاكْ دْيَالْ كْنِيسْةْ لَاوُدِكِيَّة: «هَا مَا كَيْݣُولْ اللِّي هُوَ الْحَقّْ#3‏:14 اللِّي هُوَ حَقّْ: فْالْأَصْلْ "آمِينْ"، الشَّاهْدْ الْأَمِينْ الصَّادْقْ، أَصْلْ الْخَلِيقَة دْ اللَّهْ. 15كَنْعْرَفْ كُلّْ مَا كَتْدِيرْ، بْلِّي رَاكْ مَا بَارْدْ مَا سْخُونْ. كُونْ غِيرْ كْنْتِ بَارْدْ وْلَا سْخُونْ! 16وْعْلَاحْقَّاشْ نْتَ دَافِي، وْمَا بَارْدْ مَا سْخُونْ، رَانِي غَنْتْقِيَّاكْ مْنْ فُمِّي، 17حِيتْ كَتْݣُولْ: أَنَا لَبَاسْ عْلِيَّ وْزْدْتْ خِيرْ عْلَى خِيرْ، وْمَا بْقَى خَاصّْنِي وَالُو، وَلَكِنْ مَا كَتْعْرَفْشْ بْلِّي رَاكْ مْتْعُوسْ، وْمْحْݣُورْ، وْفَقِيرْ، وْعْمَى، وْعْرْيَانْ. 18كَنّْصْحَكْ تْشْرِي مْنْ عَنْدِي الدّْهَبْ الْمْصَفِّي بْالْعَافْيَة بَاشْ تْوَلِّي لَبَاسْ عْلِيكْ، وْتْشْرِي حْوَايْجْ بِيضِينْ بَاشْ تْلْبَسْهُمْ وْتْسْتَرْ الْعْرَا دْيَالْكْ وْمَا تْبْقَاشْ مْحَشّْمْ. وْالْكْحُلْ تْكَحّْلْ بِيهْ عِينِيكْ بَاشْ تْقْدَرْ تْشُوفْ. 19ݣَاعْ اللِّي كَنْبْغِيهْ، كَنْخَاصْمْ عْلِيهْ وْكَنْرَبِّيهْ. إِيوَا دِيرْ جَهْدْكْ وْتُوبْ.#العبرانيين 12‏:6 20هَانِي وَاقْفْ عَنْدْ الْبَابْ وْكَنْدَقّْ، إِلَا شِي وَاحْدْ سْمَعْ صُوتِي وْحَلّْ الْبَابْ، غَنْدْخُلْ لْعَنْدُه وْغَنْتّْعَشَّى مْعَاهْ وْهُوَ مْعَايَ. 21رَاهْ اللِّي غْلَبْ غَنْعْطِيهْ الْحَقّْ بَاشْ يْݣْلَسْ مْعَايَ عْلَى الْعَرْشْ دْيَالِي، كِيفْمَا غْلَبْتْ حْتَّى أَنَا وْݣْلَسْتْ مْعَ بَّا عْلَى الْعَرْشْ دْيَالُه. 22إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».

Currently Selected:

الرُّؤْيَا 3: MSTD

Highlight

Copy

Compare