يُوحَنَّا اللّْوّْلَى 4
4
الْفَصْلْ الرَّابْعْ
كِيفَاشْ نْعَرْفُو رُوحْ الْحَقّْ وْرُوحْ الْبَاطْلْ
1آ خُوتِي الْعْزَازْ، مَا تِّيقُوشْ فْكُلّْ وَاحْدْ كَيْݣُولْ بْاللِّي عَنْدُه الرُّوحْ الْقُدُسْ، وَلَكِنْ جَرّْبُو الْأَرْوَاحْ اللِّي عَنْدْهُمْ بَاشْ تْعَرْفُو وَاشْ هُمَ مْنْ اللَّهْ، عْلَاحْقَّاشْ بْزَّافْ دْ الْأَنْبِيَا الْكْدَّابِينْ جَاوْ لْلدّْنْيَا. 2وْهَا كِيفَاشْ تْعَرْفُو رُوحْ اللَّهْ: كُلّْ رُوحْ كَيْعْتَرْفْ بْلِّي يَسُوعْ الْمَسِيحْ جَا فْالدَّاتْ رَاهْ هُوَ مْنْ اللَّهْ، 3وْكُلّْ رُوحْ مَا كَيْعْتَرْفْشْ بْيَسُوعْ، رَاهْ مَاشِي مْنْ اللَّهْ، وَلَكِنْ هُوَ الرُّوحْ دْيَالْ الْعْدُو دْ الْمَسِيحْ اللِّي سْمَعْتُو بْلِّي جَايْ، وْدَابَا رَاهْ هُوَ كَايْنْ فْالدّْنْيَا. 4نْتُمَ مْنْ اللَّهْ آ وْلِيدَاتِي، وْرَاكُمْ غْلَبْتُو الْأَنْبِيَا الْكْدَّابِينْ، عْلَاحْقَّاشْ هَادَاكْ اللِّي فِيكُمْ قْوَى مْنْ هَادَاكْ اللِّي فْالدّْنْيَا. 5هُمَ مْنْ هَادْ الدّْنْيَا، وْعْلَى هَادْشِّي كَيْتّْكَلّْمُو بْالْهَضْرَة دْيَالْ الدّْنْيَا، وْالدّْنْيَا كَتْسْمَعْ لِيهُمْ. 6حْنَا مْنْ اللَّهْ، وْاللِّي كَيْعْرَفْ اللَّهْ كَيْسْمَعْ لِينَا، وْاللِّي مَاشِي مْنْ اللَّهْ مَا كَيْسْمَعْشْ لِينَا. وْهَكَّا كَنْعَرْفُو الْفَرْقْ بِينْ رُوحْ الْحَقّْ وْرُوحْ الْبَاطْلْ.
اللَّهْ مْحَبَّة
7آ خُوتِي الْعْزَازْ، خَاصّْنَا نْبْغِيوْ بْعْضِيَّاتْنَا، عْلَاحْقَّاشْ الْمْحَبَّة كَتْجِي مْنْ اللَّهْ، وْاللِّي كَيْحَبّْ رَاهْ تّْوْلَدْ مْنْ اللَّهْ وْكَيْعْرَفْ اللَّهْ. 8وْاللِّي مَا كَيْحَبّْشْ مَا كَيْعْرَفْشْ اللَّهْ، عْلَاحْقَّاشْ اللَّهْ مْحَبَّة. 9وْهَا كِيفَاشْ بَانْتْ مْحَبَّةْ اللَّهْ فِينَا: اللَّهْ صِيفْطْ وَلْدُه الْوْحِيدْ لْلدّْنْيَا بَاشْ نْحْيَاوْ بِيهْ. 10وْهَادِي هِيَ الْمْحَبَّة: مَاشِي حْنَا اللِّي بْغِينَا اللَّهْ، وَلَكِنْ هُوَ اللِّي بْغَانَا وْصِيفْطْ وَلْدُه دْبِيحَة تْقَدّْمَاتْ بَاشْ يْتّْغَفْرُو بِيهَا دْنُوبْنَا.
11آ خُوتِي الْعْزَازْ، إِلَا اللَّهْ بْغَانَا حْتَّى لْهَادْ الدَّرَجَة، رَاهْ خَاصّْنَا حْتَّى حْنَا نْبْغِيوْ بْعْضِيَّاتْنَا. 12عَمّْرْ شِي حَدّْ مَا شَافْ اللَّهْ، وْإِلَا كَنْبْغِيوْ بْعْضِيَّاتْنَا، اللَّهْ تَابْتْ فِينَا، وْمْحَبّْتُه مْكْمُولَة فِينَا.#يوحنا 1:18 13هَكَّا كَنْعَرْفُو بْلِّي حْنَا تَابْتِينْ فْاللَّهْ وْهُوَ فِينَا، عْلَاحْقَّاشْ عْطَانَا مْنْ الرُّوحْ دْيَالُه. 14وْحْنَا شْفْنَا وْكَنْشَهْدُو بْلِّي الْآبْ صِيفْطْ وَلْدُه بَاشْ يْنَجِّي ݣَاعْ النَّاسْ. 15وْكُلّْ مْنْ كَيْعْتَرْفْ بْلِّي يَسُوعْ هُوَ وَلْدْ اللَّهْ، اللَّهْ كَيْتْبَتْ فِيهْ وْهُوَ كَيْتْبَتْ فْاللَّهْ. 16وْحْنَا كَنْعَرْفُو وْكَنْآمْنُو بْلِّي اللَّهْ كَيْبْغِينَا.
اللَّهْ مْحَبَّة، وْاللِّي كَيْتْبَتْ فْالْمْحَبَّة، كَيْتْبَتْ فْاللَّهْ وْاللَّهْ كَيْتْبَتْ فِيهْ. 17وْهَا كِيفَاشْ كْمْلَاتْ فِينَا الْمْحَبَّة: خَاصّْ تْكُونْ عَنْدْنَا تِقَة كْبِيرَة فْيُومْ الْحِسَابْ، عْلَاحْقَّاشْ حْيَاتْنَا كَتْشْبَهْ لْحَيَاةْ الْمَسِيحْ فْهَادْ الدّْنْيَا. 18الْخُوفْ مَا كَايْنْشْ فْالْمْحَبَّة، وَلَكِنْ الْمْحَبَّة الْمْكْمُولَة كَتْخَرّْجْ الْخُوفْ عْلَى بْرَّا، عْلَاحْقَّاشْ الْخُوفْ كَيْجِي مْلِّي كَيْكُونْ الْعِقَابْ. وْاللِّي كَيْخَافْ رَاهْ مَازَالْ مَا كْمْلَاتْ فِيهْ الْمْحَبَّة. 19حْنَا كَنْبْغِيوْ اللَّهْ، عْلَاحْقَّاشْ هُوَ اللِّي بْغَانَا اللّْوّْلْ. 20إِلَا شِي وَاحْدْ ݣَالْ: «أَنَا كَنْبْغِي اللَّهْ» وْكَيْكْرَهْ خُوهْ، رَاهْ هُوَ كْدَّابْ، حِيتْ اللِّي مَا كَيْبْغِيشْ خُوهْ اللِّي كَيْشُوفُه، كِيفَاشْ يْقْدَرْ يْبْغِي اللَّهْ اللِّي عَمّْرُه مَا شَافُه؟ 21وْهَادِي هِيَ الْوْصِيَّة اللِّي عْطَاهَا لِينَا اللَّهْ: اللِّي كَيْبْغِي اللَّهْ كَيْبْغِي خُوهْ حْتَّى هُوَ.
Currently Selected:
يُوحَنَّا اللّْوّْلَى 4: MSTD
Highlight
Copy
Compare
Share
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
