ROMENA 8

Sum sa hay Yesu Kristuna kitata may kisiɗi

Gal 3:13-14; 5:16-25

1Kay na'ta kitata tam ba-goyta may loɗi kay nisi sa ka hay Yesu Kristu. Nisi sa poy kuɗ kuɗ darta vi sliwnɗi, may kuɗ Ŋusta. 2Kay vun-ma-gatna vi ŋusta vi irita hay Yesu Kristu butanawa goyo hay vun-ma-gatna vi sulukŋa hiɗi mitta kaw. 3Kay Lawna ka kitata kay sulukŋa hay sliwna, kay kuɗ sulukŋa nam gi Goora valamiya hay tuw ma ŋray hiɗi sulukŋa, -- Kayni mi va ma vun-ma-gatna as a liɗi kay nam bay dono'o kuɗ sliwna -- 4Kay ɗigerta vi vun-ma-gatna fi li goy hay naya, nay sa ka poy kuɗ sliwnaɗi, may kuɗ ŋusta.

5Kay nisi sa ka kuɗ sliwna min slena vi sliwna, may nisi sa ka kuɗ ŋusta min slena vi ŋusta kaw. 6Kay darta vi sliwna kayni ti mitta, may darta vi ŋusta kayni irita hiɗi toyta. 7Kay darta vi sliwna kayni ɦeɗem tam Lawna, kay na' may hum kuɗ vun-ma-gatna vi Lawnɗi, na' as kay va noŋɗi kaw. 8Nisi sa ka hay sliwna as li kir Lawn ŋaa'a noŋɗi.

9May nigiya, nigi may hay sliwnɗi, may hay Ŋusta, kay Ŋusta vi Lawn ka mus haygiya. May la sa ka'a ma Ŋusta vi Kristu may hayamɗina, nam may ir valamɗi. 10May la Kristu ka haygiya, tuwna kayni mitawa hay sulukŋa may ŋusta ka iriya kay ɗigerta. 11May la Ŋusta vi nam ma day Yesu hay mitta pa mus haygiya, nala kaw nam ma day Kristu Yesu kulo'o hay mitta pana nam ma muɗgi tuwgi ma mitina goy iriya lo hiɗi Ŋusta valamu ta musi haygita.

12Kay na'ta ɓosiyonna, bal may kaya tam sliwna loɗi, a nay ma poy kuɗ darta vi sliwna loɗi. 13May la nigi poy kuɗ sliwna, nigi ma mita, may la nigi ci lita vi tuwta goyo kuɗ Ŋusta, nigi ma lak iriya. 14Kay nisi kaf sa Ŋusta vi Lawna ɗopsina, nisi kayni si gurona vi Lawna. 15Kay nigi fi Ŋusta gorvotaɗi, nala nigi ma li nar loɗi, may nigi fi Ŋusta vi goora ma vuɗina, hiɗi na'a nay siwel ala: Baba bunu. 16Ŋusta kay tuwa'a li di-goyta tam ŋusta vaya ala nay si gurona vi Lawna. 17May la nay si gurona, nay si sa yaw vocota kaw, sa yaw vocota vi Lawna, sa tap yaw voco'o hiɗi Kristu, la nay tap hiɗi namu hay lasta, kay nay ma fi gajijita hiɗi namu kaw.

Gajijita ta min ma'a

Yoh 10:27-30

18Kay nan var ala lasta ta hay liyn ma wulinna san as ŋra' hiɗi gajijita ta min ma'a, ta vul tuwa'a goy kirayt ɗawnɗi. 19Kay sle ma kotina kaf ka lakay jiger kay cub buur ma gurona vi Lawna ma vul tuwsi goy haraŋi. 20Kay sle ma kotina kaf vuli hay gaŋeraŋa vi waata, -- May kuɗ minda valamɗi, may kuɗ minda vi nam ma vulum hay gaŋeraŋ namna -- 21hiɗi cubta-sle'ta ala nam sle ma kotina kaw ma but goyo hay gorvota vi ɓulak-goyta, kay fi liyn jar butta-goyta vi gajijita vi gurona vi Lawna. 22Kay nay wi ala, ta-ta vaydi sle ma kotin kaf ka tiya, ka ci lasi kaw ki cata ta ka puk nala. 23May nam kepɗi kaw, may nay kaw sa vun-jafna ma niy jewna vi Ŋusta ka kaya, nay kaw ka yor hayay kalafi, hay li ma nay ka cub vu'da vaya, kayni ti butta-goyta vi tuwaya. 24Kay nay fi su'da kayni hiɗi cubta-sle'ta, ta ir sa as wi'e kayni may ti cubta-sle'taɗi, va ma san wum hiɗi iramu nam as cubum hiɗi sle'ta lo su? 25La nay cub va ma nay bay wumna hiɗi sle'ta, nala nay ma cubum hiɗi ŋalda.

26Nala kaw Ŋusta gut kuɗaya hay maŋayta vaya, kay nay wi va ma nay ma siɗawa hay liyam ɗigerɗi. May Ŋusta kay tuwa'a siɗaw kaya hiɗi slen ma vunay as dumɗi; 27may nam ma fek dikga nam wi darta vi Ŋusta kaw, kay na' siɗawa kay sa peldetna kuɗ minda vi Lawna.

28Nay wi ala slen kaf tap tuwam kayni kay li ŋaa'a tam nisi sa min Lawna, nisi sa nam yisi kuɗ ŋaɓta valamu. 29Kay nisi sa nam wisi goy jewe, nam ŋaɓsi goy jewe kay nisi ma muɗ sli tuw Goora valam nala, kay Goora valamu ma lin mi ma vu'ɗi jewna jar ɓosiyom-tuwsin ŋolo. 30Nisi sa nam ŋaɓsi goy jewna, nam yisiyawa kaw, nisi sa nam yisiyawa, nam lisi goy ɗigere, nisi sa nam lisi goy ɗigere, nam vulsi gajijitawa kaw.

31La nala nay ma di mige kay slen kayni? La Lawna ka hiɗi naya, sa ma gaw hiɗi naya mi gige? 32Namu ma ŋay Goora valam goy kayɗi, may vulum goyo kay kafe, nala nam min vulay slen kaf kuɗumɗi su? 33Sa ma min pi lawt kay sa vileki-goyna vi Lawna mi gige? Lawna nam mi ma muɗ san ɗigere. 34Sa ma tun kitat kisin mi gige? Kristu ma mitiya, suw kayni lo, nam ma dayay kulo'o, nam ka hay gal ɓam ma jufna vi Lawna, nam siɗaw kaya kaw. 35Sa ma as ɓuraway jaray nay goy hiɗi ti-kamda vi Kristu gige? Zumalda lebo, narta lebo, lasta lebo, mayta lebo, nalata lebo, mitta lebo, kew-gaferaŋa su? 36Ki ɗo'ay nala:

Kuɗaŋ naŋu, nisi ka cuma' goyo hay buurta kaf,

Nisi ɗuwma'a ki fok-dimina ma tuɗum ŋatam goyn nala.

37May kuɗ slen kayni kaf nay kol suwa kuɗ nam ma minayna. 38Kay na wi goy gasi ala: La mitta lebo, irita lebo, sa sunda wuralawna lebo, donota lebo, sle ma ka wulini lebo, sle ma min ma'a lebo, 39gaŋeraŋa lebo, liyn ma kulona lebo, slen ma gaa zulla lebo, slen ma kotina mara'a lebo, la mi mige kaw as munay jaray nay goy hiɗi ti-kamda vi Lawna hay Yesu Kristu Bum-Sumuna vayaɗi.

Currently Selected:

ROMENA 8: Massana

Highlight

Copy