ROMENA 6

IRITA VI SA MA VIYNA MA MUƊI ƊIGERA

Slugota but san goy kay gorvota vi sulukŋa

Kol 3:1-10

1La nala nay ma di mige? Nay ma lak hay sulukŋa kay slugota fi muɗ ŋol suwa su? 2May noŋɗi. Nay sa miti tam sulukŋa, nay ma lak hayam tuwa lo arige?

3Lebo, nay kaf sa fi baptisma hay Kristu Yesu, nay fi baptisma kayni tam mitta valamu, nigi bay wi nala su? 4Nala kaw hay baptisma, nay piy gaa hiɗi namu tam mitta valamu, kay Kristu dayay kulo'o hay mitta pa hiɗi gajijita vi Bumna, nala nay kaw ma poy hay irita wulita.

5Kay la nay muɗi mi so'ol ma kepna hiɗi namu kuɗ ŋrata vaya hiɗi mitta valamu, nay ma muɗ ŋray ca hiɗi namu kuɗ dayta-kulota valamu kaw. 6Kay nay wi ala sana vaya ma busayna ɓalay kat grakŋa hiɗi namu, kay tuwna ma sulukŋa ma ɓulak goyo, kay nay ma li gorvona vi sulukŋa loɗi; 7kay sa ma mitawana, nam buti goy kay sulukŋa. 8May la nay mitawa hiɗi Kristu, nay vi ala nay ma lak iriya hiɗi namu kaw. 9Kay nay wi ala Kristu ma dayay kulo'o hay mitta pana as mit loɗi; kay gaŋeraŋa vi mitta tay kalam loɗi. 10Kay nam ay mitiya, nam mit sem kep kay sumun kaf kay sulukŋa, wulini nam ka iriya, nam musi iriya kay Lawna. 11Nala nigi kaw ma ŋa tuwgi ki miti tam sulukŋa, may iriya tam Lawna hay Kristu Yesu.

12Nala hingi sulukŋa li gaŋeraŋi kay tuwgi ma mit goynɗi, humgi kuɗ darta valamɗi kaw. 13Vul ɓetna vi tuwgi goy tam sulukŋa ki kaway-ma-duura vi bay-ɗigerta naɗi, may vulgi tuwgi goy tam Lawna ki sum sa mitiya muɗi iriya, vul ɓetna vi tuwgiya goy ki kaway-ma-duura vi ɗigerta nala tam Lawna. 14Kay sulukŋa ma li gaŋeraŋ kigiɗi, kay nigi may gaa kuɗ vun-ma-gatna loɗi, may kuɗ slugota.

15La nalan litige? Nay as li sulukŋa kay nay may kuɗ vun-ma-gatnaɗi, may kuɗ slugota su? May noŋɗi. 16Hay li ma nigi vul tuwgi gorvo hay ɓam sa'a kay hum kuɗumu, nigi muɗi si gorvona vi sa namna, la kuɗ sulukŋa ma nar (san) tam mitta, la kuɗ hum-vunda ta nar san tam ɗigerta kaw. Nigi may wi kaynɗi su? 17May gi deɓ mi Lawna, a nigi sa ay jewe sa sunda vi sulukŋa, may hay dikgiya nigi humawa kuɗ hatta ta nigi hata'ta. 18May nigi butawa goy hay sunda vi sulukŋa nigi kalawa hay sunda vi ɗigerta yo. 19-- Nan law kayn ki sumun var nala, kuɗ maŋayta vi sliwna vigiya. -- Kay ki nigi vul ɓetna vi tuwgi goyo kay sun bay-ɗigerta hiɗi jiw-zlata, kay co tam jiw-zlata, wulin kayni, nigi ma vul ɓetna vi tuwgi goyo kay li gorvo vi ɗigerta, kay co tam lita-peldetta.

20Kay hay li ma nigi ay gorvona vi sulukŋa tuwa, lawta vi ɗigerta may kigiɗi. 21Vuɗna vigiya hay na'ta mi mige? Vuɗna vi slen kayni ti zulota ta nigi ka haya' wulini. Kay dabta vi slen kayni ti mitta. 22May wulini, nigi buti goy kay sulukŋa, nigi muɗi si gorvona vi Lawna, vuɗna vi slen kayni ti lita-peldetta, dabta vi kayni ti irita vatɗita may. 23Kay wurakŋa vi sulukŋa vul mitta, may vulda-slugota vi Lawna kayni ti irita vatɗita hay Yesu Kristu Bum-Sumuna vaya.

Currently Selected:

ROMENA 6: Massana

Highlight

Copy