ROMENA 5

Vuɗna vi mu'da ɗigerta kuɗ vida

1 Pet 1:3-9

1Wulin kayni nay fi ɗigertawa kuɗ vida, nay toyawa hiɗi Lawna hay Bum-Sumuna vaya Yesu Kristu; 2hiɗi vida vay hay namu nay coowa tam slugota na'ta, nay as lak dono'o haya'a, nay as subur tuwaya hay cubta-sle'ta hay gajijita vi Lawna. 3may kayni kepɗi kaw, nay as li firiya hay zumalda vaya kaw: kay nay wi ala zumalda vuɗ so-tuwta, 4so-tuwta vuɗ dikga ta waki wak, dikga ta waki wak vuɗ cubta-sle'ta. 5Cubta-sle'ta hin san muɗ goy zuloɗi, kay ti-kamda vi Lawna hobawa hay dikaya kuɗ Ŋusta ta nam vulayawa.

6Kay hay li ma nay ay maŋay tuwa'a, hay li ma kaay kana, Kristu miti kay sa vi kuɗ Lawnɗina. 7Kay lop ŋolo a san hin tuwam mit hay baŋal sa ma ɗigera, li ŋalɗi san as fi kursuliya kay mit hay baŋal sa ma ŋaan kla. 8May Lawna vul ti-kamda valam goy haraŋi taya, hay li ma nay ay sa sulukŋa tuwa, Kristu miti goy kaya. 9kay nay wulini fi ɗigertawa hiɗi busuwna valamu, hay namu nay ma suɗ goyo vun ɦiyda pa kaw. 10La nay toyawa hiɗi Lawna hay mitta vi Goora valamu hay li ma gawt ay jaray hiɗi nam tuwa, bugol toyta lo, nay ma suɗ goyo kuɗ irita valamu. 11May kayn kepɗi kaw, nay as subur tuwaya hay Lawna kuɗ Bum-Sumuna vaya Yesu Kristu, nam ma nay fi toytawa hay nam wulini.

Ŋrata jar Adam hiɗi Yesu Kristu

1 Kor 15:21-22

12Kay na'ta ki sulukŋa maawa hay nagata kuɗ san kepe, mitta maawa kuɗ sulukŋa kaw, nala mitta raw voka'a tam sumun kaf, kay kaf li sulukawa. 13Kay sulukŋa ay hay nagata jew vun-ma-gatna, may hay li ma vun-ma-gatna mayɗi, sulukŋa may ŋaɓiɗi. 14Nir na'ta kep sulukŋa li gaŋeraŋi tam Adam pa ta-ta tam Musus, tam nisi sa li suluku hiɗi raw-goyta ki Adam naɗin kaw. Namu mi ŋus nam ma min ma'a.

15May vulda-slugota kayni na' may ki raw-goyta naɗi. Kay la sumuna ŋolo miti kuɗ raw-goyta vi ma kepna, nala suw kayni ŋolo kaw, kay slugota vi Lawna hiɗi vulda kuɗ slugota vi sa ma kepna, Yesu Kristu, nagawa ŋolo kisi kafe. 16May vulda li ki van li'e hay li ma ma kepna li suluku naɗi, kay kitata ma kuɗ san kepe tam ba-goyta, may vulda-slugota muɗi lita goy ɗigerta bugol raw-goyta ŋolo. 17Kay la kuɗ raw-goyta vi sa ma kepna, mitta li gaŋeraŋi, suw kayni ŋolo kaw, nisi sa fi slugotawa ŋolo hiɗi vulda vi ɗigerta, nisi ma li gaŋeraŋi kuɗ irita vi ma kepna Yesu Kristu kaw.

18Kay na'ta ki raw-goyta vi ma kepna mar ba-goyta tam sumun kafe, nala kaw lop ma ɗigera vi ma kepna mar ɗigerta vi irita kay sumun kafe. 19Kay ki sumun ŋolo muɗi goy si sa sulukŋa kuɗ ŋel-vunda vi sa ma kepna, nala kaw sumuna ŋolo ma muɗ ɗigere kuɗ hum-vunda vi sa ma kepna kaw.

20Vun-ma-gatna maawa kay raw-goyta ma li ŋolo, may hay li ma sulukŋa muɗ ŋolo, slugota jor voka' ŋol suwa. 21Kay ki sulukŋa li gaŋeraŋ kuɗ mitta, nala kaw slugota ma li gaŋeraŋi kuɗ ɗigerta tam irita vatɗita hay Yesu Kristu, Bum-Sumuna vaya.

Currently Selected:

ROMENA 5: Massana

Highlight

Copy