ROMENA 2

Kitata vi Lawna

Yak 2:12-16

1Kay na'ta naŋ fi hulot goyɗi, naŋ san gigekaw ma ka kitata, kay hay li ma naŋ ka kitat kay sugoloŋu, naŋ ka kitat kay tuwaŋ kaw, kay naŋ sa ma ka kitata, naŋ li slen kayni kaw. 2May nay wi ala kitata vi Lawna kat sum sa li slen ki kayn nala na' hay hagata va'a. 3May naŋ sana, naŋ mi ma kitat kay sum sa li slen ki kayn nana, may naŋ kay tuwaŋu li nala kaw, kayn naŋ var ala naŋ fi pir goy kay kitata vi Lawna su? 4Lebo ŋaata vi asta valamu, ŋalda valamu hiɗi cubta valamu, naŋ ɗuwa' birek-ceke, nala naŋ may wi ala ŋaata vi Lawna zutaŋ hay hamda ɗisu? 5May hiɗi so'otta hiɗi bay-hamda vi dikaŋu, naŋ ka tok kitat kaŋu kay buur ma ɦiyda hiɗi buur ma Lawna ɗek kitata valam ta ɗigerta goyo. 6Nam ma wurak gigekaw kuɗ lopna valamu valamu. 7Nam ma vul irita vatɗita mi nisi sa li lop ma ŋaana ta-ta makɗi, nisi sa gar gajijita hiɗi suburta hiɗi ɓulakɗita. 8May nisi sa ŋel vun-ma-gatna, hum kuɗ gasitɗi kaw, may hum kuɗ bay-ɗigerta, ɦiyda hiɗi purcakka valamu ka kisiya. 9Lasta hiɗi zumalda co kay san gigekaw ma li joota, kay sum sa Yudiyan jewe, bugolda kay sum sa Grekŋa. 10May gajijita hiɗi suburta hiɗi sle'ta tam san gigekaw ma li ŋaata, tam sa Yudiyana jewe, bugolda tam sa Grekŋa. 11Kay Lawna may ka ir saɗi.

Sulukŋa vi sa wi vun-ma-gatna

12Nisi kaf sa li suluku bay vun-ma-gatna ma ba goyo bay vun-ma-gatna, nisi kaf sa li suluku hay vun-ma-gatna, nisi ma fi kitata kuɗ vun-ma-gatna kaw. 13Kir Lawn ɗiger kayni si sa hum vun-ma-gatna ɦawanɗi, may nisi sa li kuɗ vun-ma-gatna nam muɗsi ɗigere si nisiya. 14Sa waana sa vun-ma-gatna may hay ɓisiɗina, la nisi li kuɗ sle ma gatta dumna kay tuwsiya, nisi muɗi mi vun-ma-gatna vi tuwsiya. 15Nisi ka ɗek goy ala lopna vi vun-ma-gatna ka ɗoy hay diksiya; tap-wida visi li di-goyt kisiya, varta visiya pi lawt kisiya lebo kot lawt kisiya. 16Hay buur ma Lawna ma kitata kay sle ma ŋayayna hay sumun ɗawni, nam ma ka kitat na'ta kuɗ labara ma firina vanu hay Kristu Yesu.

17May naŋ ma yi tuwaŋ ala Yudiyana, naŋ ma ka kuɗ vun-ma-gatna, naŋ ma subur tuwaŋ kay Lawna, 18naŋ ma wi minda valamu kaw, poŋ ir slen hena hena kaw, kay naŋ hatawa kuɗ vun-ma-gatna. 19Naŋ wi ŋaa'a ala naŋu mi ma tan sa dukina, naŋu mi haraŋa vi nisi sa ka hay jufunda, 20naŋ sa ma gat sum sa ɦay-ɦayna, sa ma hat gurosgurayna, kay hay gatta naŋ fi hagata vi wida hiɗi gasita; 21naŋ sa ma hat sum sara'a, naŋ hat tuwaŋɗi may su? 22Naŋ sa ma kus yoboyn ala sa kulɗi, naŋ kul su? Naŋ sa ma di ala sa li zlata-buloɗi, naŋ kay tuwaŋ li zlata-bulota may su? Naŋ ma lawayn ma waana kiraŋ liwisi, naŋ hot li sle ma liwisna lo su? 23Naŋ sa ma subur tuwaŋu kay vun-ma-gatna, naŋ as ɓulak semda vi Lawna hay li ma naŋ li sle ma vun-ma-gatna telemnaɗi. 24Kay kuɗgi nigiya, semda vi Lawna ka fi ŋulda jar sumuna. Ki ɗot ka ɗoy nala.

Ka-gosayta ta gasita

25Kay ka-gosayta li va ŋaa'a hay li ma naŋ li kuɗ vun-ma-gatna, may la naŋ raw vun-ma-gatna goyo, ka-gosayta vaŋu hay na'ta muɗi goy bay-gosayta. 26La sa ma bay ka-gosayna li kuɗ li kuɗ vun-ma-gatna, bay-gosayta valamu ma ŋaɓis ki ka-gosayta nala hay na'ta ɗisu? 27Sa ma vuɗi hay bay-gosayta, may nam li kuɗ vun-ma-gatna, nam ma ka kitat kaŋɗi su? Kay naŋu ka hiɗi ɗota hiɗi ka-gosayta, may naŋ raw vun-ma-gatna goyo. 28Kay Yudiya ma gasin kayni may mi nam ma hay sliw tuwam kir sumunɗi, ka-gosayta ta gasita kayni may ti gosayta ta kir sumun hay sliwnaɗi, 29may mi Yudiyana ma hay dikam kalafi mi Yudiya ma gasina, ka-gosayta ta gasita kayni ti ka-gosayta vi dikga, hay Ŋusta, kuɗ ɗotaɗi, nala Yudiyana ma ki kayn nala suburta valamu may vi sumunɗi, may vi Lawna.

Currently Selected:

ROMENA 2: Massana

Highlight

Copy