ROMENA 3

Yudiyana as suw segen hiɗi mige?

1La nala, sa Yudiyana suw segen hiɗi mige? Lebo ka-gosayta lum ŋaa'a suw mi mige? 2Nisi asay misiya: kuɗ ta ala yoboyna Lawna ay vuli jewe misi nisi sa Yudiyana. 3Mige lo? La segena ay bay vi'e, bay-vida visiya as muɗ gasita vi Lawna goy waa'a su? 4May noŋɗi, nay ma wi Lawna ki nam gasiya nala, nay ma wi san gigekaw ki nam mi ma sinda nala. Ki ɗo'ay nala:

Kay naŋ ma fi ɗigerta hay dita vaŋu,

Kitata vaŋ ma vi'e kaw hay li ma naŋ co vun kitata.#3:4 Fi kayni hay Nul 51:6.

5May la bay-ɗigerta vaya mar ɗigerta vi Lawna goy haraŋi, nay ma di mige? Lawna nam bay-ɗigere hay li ma nam mar ɦiyda valam kaya su? -- Nan ka law ki varta vi san nala -- 6May noŋɗi, kay la nala, Lawna fi ka kitata kay sa nagatna ɗawn arige?

7May la kuɗ sinda vanu, gasita vi Lawna jor voko kuɗ gaŋeraŋa valamu, nala kitat ma kaays kan lo ki sa ma sulukŋa nala kay mige? 8Nala nay ma li joota kay ŋaata fi ma kuɗ kayni su? Ki nisi ka ŋulma'a kuɗ kayni nala, segen ka di ala numa hat kayni goyo kaw. Nisiya kitat ko kisiya hay liya'a.

Sulukŋa ka kay sumun kaf

9Mige lo? Nay ŋolo suwsi su? May noŋ ne'ɗi: kay numa wi goy ala la Yudiyana lebo Grekŋa kaw, nisi kaf ka gaa kuɗ sulukŋa. 10Ki ɗo'ay nala:

Sa ma ɗigera mayɗi, kep kaw mayɗi.

11Sa ma wi yalla mayɗi, sa ma gar Lawna mayɗi,

12Nisi kaf hin hagatawa goyo, nisi kaf muɗi goy waa'a, sa ma li va ma ŋaa'a mayɗi, kep kaw mayɗi.

13Delsiya ki zulda ta pi sana nala,

hiɗi vunsiya nisi ɗuta,

sinaw guyna ka kuɗ vunsiya.

14Vunsiya hobawa hiɗi ŋulda hiɗi galakka,

15Sesi ka koloyo kay ɦok busuw goyo.

16Ɓulakka hiɗi yorta ka hay hagata visiya,

17nisi may wi hagata vi toyta noŋɗi.

18Narta ta kuɗ Lawna may kirsi noŋɗi.#3:18 Fi kayni hay Nul 14:1-3; Yer 9:3-5.

19May nay wi ala slen pet ma vun-ma-gatna di'e, nam di kayni tisi sa ka gaa kuɗ vun-ma-gatna, kay vun san gige gigekaw ma ziŋa, a sumuna kaf kitata ma ko kisiya vok Lawna. 20Kay hiɗi lopna vi vun-ma-gatna sana fi muɗ ɗigere vok Lawn noŋɗi, hiɗi vun-ma-gatna san fi wi sulukŋa valamu.

MU'DA ƊIGERTA

San muɗ goy ɗigere kuɗ vida hay Yesu Kristu

Gal 2:15-16; Efes 2:7-9

21May wulini ɗigerta vi Lawna ta vun-ma-gatna hiɗi sa jobta di kalamna maawa goy haraŋi, 22ɗigerta vi Lawna kuɗ vida hay Yesu Kristu maawa kay sa vi'e kaf, kay sa ma suw niram mayɗi. 23Kay kaf li sulukawa, nagay kay gajijita vi Lawnɗi may. 24Nisi fi ɗigertawa kuɗ slugota valamu ɦawa kuɗ butta-goyta hay Kristu Yesu, 25ma Lawna vulum goy ɗifini, kay nisi sa vi hay busuwna valamu, kay ɗek ɗigerta valam goyo. Kay suluk ma liy jewna nam hinim bay ka kitata kalamu.

26Nam mini kay ɗek ɗigerta valam goyo hay liyn ma wulinna, kay sumuna ma wum ɗigere, hay li ma nam muɗ sum sa vi hay Yesuna goy ɗigere.

27La nala nay subur tuway hiɗi mige? Kayn mayɗi. Kuɗ vun-ma-gatna marige? Kuɗ vun-ma-gatna vi lopna su? Mayɗi, may kuɗ vun-ma-gatna vi vida. 28Kay kiray ta ala sana fi ɗigerta kuɗ lopna vi vida bay vun-ma-gatna. 29Lebo Lawna, nam mi Lawna vi sa Yudiyan tuta su? Nam mi Lawna vi sa waana kawɗi su? Awa, nam mi Lawna vi sa waana kaw. 30Kay Lawna nam kep ma muɗ sa kaay gosayna ɗigere kuɗ vida visiya, nam muɗ sa bay ka-gosayna ɗigere kuɗ vida kaw.

31La nala, nay muɗ vun-ma-gatnawa goy waa'a kuɗ dita su? May noŋɗi, may nay hobom kulo kayni mi vun-ma-gatna.

Currently Selected:

ROMENA 3: Massana

Highlight

Copy