ROMENA 15

1Nay sa donota vay ka'ana, nanige kaw nay ma ziy maŋayta vi sa maŋayna, gigekaw ma lum mi va ma kiram ŋaa'a tutaɗi. 2Gigekaw jaraya ma li va ma kir sugolomna ŋaa'a, va ma as wul vida valam kulo'o. 3Kay Kristu kaw may gar sle ma li ŋaa'a tam tuwam ma ɗeŋŋaɗi, ki ɗo'ay nala:

Ŋulda vi nisi sa ŋulaŋu ni gaa'a kanu.#15:3 Nul 69:10.

4Kay sle ma ay ɗoy jewna kaf ɗoy kayn kay hatta taya, kay kuɗ ŋalda hiɗi teŋ-irta ta ɗota vula, kay nay ma lak hay cubta-sle'ta.

5May hin Lawna vi ŋalda hiɗi teŋ-irta ligi a varta vigi tap kuɗ tuwa' kepe hay Yesu Kristu. 6Kay vungi ma tap kepe, hiɗi vungi kuɗ tuwam kepe kaw, nigi fi sun Lawna, Bum Bum-Sumuna vaya Yesu Kristu.

7Kay na'ta vigi tuwgi jar-tuwgi hiɗi firita, ki Kristu vigiyawa nala, tam gajijita vi Lawna.

Kristu mi sa ma sunda vi sumuna

Efes 2:11-19

8Kay na'ta nan di ala: Kristu muɗi mi sa ma sunda vi sa kaay-gosayna, kay ɗek gasita vi Lawna goyo, kay hob vun deŋga ta diy tam sumiyaya, 9may a sa waana ma subur Lawna kay slugota valamu, ki ɗo'ay nala:

Kay na'ta nan min yi semda vaŋu jar sa waana,

Gi nulla tam semda vaŋu kaw.#15:9 Ɗuw hay 2 Sam 22:50.

10Nam di lo:

Tapgi firita vigiya hiɗi sumuna valamu, nigi sa waana.

11Lo,

Suburgi Bum-Sumuna, nigi sa waan kaf,

Hin sumun kaf suburumu.

12Lo Esaya di'e:

Jafna vi Yesaya ma ma'a,

nam ma fok kulo'o kay mus mulla vi sa waana,

namu sa waana ma zamam ɓalam hiɗi sle'ta.#15:12 Ɗuw hay Es 11:1, 10.

13May Lawna vi cubta-sle'ta hobgi hiɗi firita hiɗi toyta kaf hay vida, kay nigi ma fi cubta-sle'ta ŋolo hay donota vi Ŋusta-Peldetta.

Lopna vi Paulus hiɗi varta kay tuɗ rogoyo

2 Kor 10:13-18

14May ɓosiyonna, nan kay tuwanu var kigi ala, nigi hobawa hiɗi ŋaata, hobay hiɗi wida kaw, as kay ɗek tuwgi jar-tuwgiya hay hagata. 15Nir na'ta kepe nan ɗo tigiya hiɗi kursuliya kay gigi humgiya lo, kuɗ slugota ta Lawna vul tanu, 16kay nan ma li mi sa ma sunda vi Yesu Kristu tam sa waana, kay nan ka li ɗifin ma peldetna vi labara ma firina vi Lawna, kay sa waana kaw ma liys mi ɗifin ma kir Lawn ŋaa'a, liy goy peldete hiɗi Ŋusta-Peldetta.

17Kay na'ta nan as subur tuwan hay Yesu Kristu vok ir Lawna. 18Kay nan as yi sem va maraɗi, may mi sle ma Kristu lum tanu kay mar sa waana hay hum-vunda, hiɗi yoboyna hiɗi lopna kaw, 19hay donota vi ɗekka hiɗi sle ma ŋulo ŋulona, hay donota vi Ŋusta, ta-ta fokis hay Yerusalem pa, raw hay Iliriya, labara ma firina vi Yesu Kristu nan meremawa goy ŋolo. 20Awa, nan so tuwanu kay kus labara ma firina hay liyn ma semda vi Yesu may yiy hayam jewanɗi, kay nan ma in kulo'o kay sem-ziyna vi sa maraɗi. May ki ɗo'ay nala:

21Nisi sa labara valam may tisiɗina,

nisi ma wi'e,

Nisi sa bay huma, nisi ma wum cawam goyo kaw.#15:21 Ɗuw hay Es 52:15.

22Kayni mi va ma telan dok-doko kay co tigiya. 23May wulini lopna vanu hay gal tani may loɗi, busat ŋolo gizangi vanawa, kan nan min co goy vigiya, hay li ma nan min kal Espaniya. 24Nan min jikis ɗuwgiya, hay li ma nan dikgi gisangiyawa goy dikŋa, nigi ma gan diran ɗawni.

25May wulini nan na Yerusalem li sunda vi sa peldetna. 26Kay Makedoniya hiɗi Akaya li vulda-minda vi slena visiya tam sa hawna sa ka jar sa peldetna hay Yerusalem. 27Nisi min li kuɗ haysiya, may bal ka kisiya kay gut segena kaw; kay la sa waana fi slena vi ŋustawa kuɗ sa Yudiyana, bal ka kisiya kay gut kuɗ sa Yudiyana hay sle ma ŋom ŋil tuwsiya kaw. 28Hay li ma nan li slen kaynawa, la nan tuɗsi vulda-mindawa hay ɓisiya, nan ma tuɗis hay nagata vigiya, raw vokanu hay Espaniya. 29nan wi ala nan tuɗis goy vigi ɗawni, nan tuɗis hobay hiɗi bolda vi Kristu hob'.

30Wulini nan siɗawgiya, ɓosiyonna, hiɗi Bum-Sumuna vaya Kristu, hiɗi ti-kamda vi Ŋusta, a nigi ma tap dur hiɗi nanu hay li ma nigi siɗaw Lawna dono'o kanu, 31kay nan ma suɗ goy hay ɓam sa bay-vina hay Yudiya, a vulda ta nan min nara' hay Yerusalemta sum sa peldetna ma va' ŋaa'a kaw. 32Kay nan fi co tigi hiɗi firita, la Lawna min nala, fi tun sukan jargi neeɗa kaw. 33Lawna vi toyta mus hiɗi nigi kafge. Amen.

Currently Selected:

ROMENA 15: Massana

Highlight

Copy