ROMENA 14

Sa donona hiɗi sa maŋayna

1 Kor 4:3-5

1Sa ma bay vi dono'o tapam kuɗgiya, may kaagi kitat kay varta valamɗi. 2Sa ma kepna vida valamu as ti slen kafe, may sa hena ma maŋayna tum mi hadafna ɦawa. 3Sa ma ti'e nam ɗuw sa ma tiɗina birek-cekɗi, sa ma tiɗina ma ka kitat kay sa ma tinaɗi kaw, kay Lawna vumawa. 4Naŋ ka kitat kay sa ma sun vo hay ziyna vi sa hen kayn naŋ gige? La nam col kulo'o, lebo la nam nig gaa' kaw kayni wum mi mulamna. Awa, nam fi cola, kay Bum-Sumuna donota valam as kay hinim col kulo'o.

5Sa hena buurta kepta kiram ŋol suw hena, sa hena lo buur kaf kiram ŋray ca. May gigekaw ma col dono'o kay va ma nam kay tuwam varamna.

6Sa ma tun ŋalda valam kay buura nam tun ŋalda valam kayn kay Bum-Sumuna. Sa ma ti'e nam li kayn kay Bum-Sumuna, kay nam vul gi-deɓta mi Lawna. Nam ma tiɗi kaw, nam li kayni kay Bum-Sumuna, vul gi-deɓta mi Lawna kaw. 7Kay sa jaraya ma mus tuwam iri kay tuwam mayɗi. Sa ma as mit tuwam kay tuwam mayɗi kaw. 8La nay lak iriya, nay lak iri kayni hay Bum-Sumuna, la nay mita, nay mit kayn kay Bum-Sumuna kaw. La nay lak iri maya, la nay mit maya kaw, nay ka hay Bum-Sumuna. 9Kay na'ta Kristu mitiya, muɗi iriya lo, kay nam fi mus mi Bum-Sumuna vi sa irina hiɗi sa mitina kaw. 10May naŋu, naŋ ka kitat kay ɓasuŋŋa kay mige? Naŋu lo, naŋ ɗuw ɓasuŋŋa birek-ceke kay mige? Kay nay kaf ma lak vok zlamda-kitata vi Lawna. 11Ki ɗo'ay nala:

Nan ka iriya, din Bum-Sumuna,

Sumun kaf ma girif ŋulofgi gaa vokanu,

Vunna vi sumun kaf ma subur Lawna.#14:11 Ɗuw hay Es 45:23.

12Nala san gige gige kaf jaraya ma ɗek lopna valam kay tuwamu goy vok Lawna.

13Kay na'ta nay ma tun kitat kay tuway jar-tuwayɗi, kitata vigi kayn ala nigi ma li va ma dab sem ɓasukiɗi, li va ma pukum gaaɗi kaw.

14Nan wi'e, nan viy goy haraŋi hay Bum-Sumuna Yesu ala: Va ma liwisi kay tuwam mayɗi, may va ma kir san liwisi, nam muɗi talam nam liwisi may. 15Kay la ɓasuŋŋa ka yor tuwam kay va ma naŋ ti'e, naŋ may poy hay ti-kamda loɗi, sa ma Kristu mit kalamna naŋ naram tam ba-goyta kuɗ tina vaŋɗi. 16Hin ŋaata vigiya muɗ goy va ma sa di joo'o kalamɗi. 17Kay mulda Lawna kayni may mi tina hiɗi cinɗi, may ɗigerta hiɗi toyta hiɗi firita hay Ŋusta-Peldetta. 18Kay sa ma sun Kristu ki kayn nalana nam kir Lawna ŋaa'a, sumun var ŋaa'a kalamu kaw.

19Kay na'ta, nay ma garam mi sle ma mar toyta, hiɗi sle ma wulay kulo hay vida kaw. 20Ɓulakay lopna vi Lawna kay lawta vi tinɗi, hay gasita slen pet ka cet-cete; may nam joo'o kay sa ma tumna, hay li ma nam tumu kay dab sem sa hiɗi namu. 21May ŋaa'a kay mut sliwnɗi, may ŋaa'a kay ci vinɗi kaw, va ma as puk ɓasuŋŋa gaa'a naŋ as hinim goyo. 22Vida vaŋ ta hayaŋga naŋ ma col ka' ɗeŋe vok Lawna, sle'ta ka kay sa ma ka kitat kay tuwamɗi kay va ma kiram ŋaa'a hay liyamna. 23May la san ti hiɗi giriŋga, kitat ka kalamu, kay nam ti kayni hiɗi vidaɗi. Mige kaw ma li hiɗi vidaɗi kayni mi sulukŋa.

Currently Selected:

ROMENA 14: Massana

Highlight

Copy