WID-ŊAYAYTA 3

1Ɗo tam sunda-Lawna hay ziyda-Lawna ta ka hay Sardis: Kayni mi va ma nam ma Ŋusta vi Lawna siɗiya hiɗi mislekŋa siɗiya kaw ka kalamna dumna: Nan wi lopna vaŋu: Semda vaŋu ka tiy ki naŋ ka iri nala, may naŋ mitiya. 2Zliyaŋ kulo'o, vulaŋ donot mi ma hinina, ma ka goboy hiɗi mitta, kay lopna vaŋu nan may fum ɗiger vok ir Lawna vanɗi. 3Humaŋ ma gaŋ ala ir nanige naŋ hum yoboyna, vum kaw, ŋomaŋ yoboyna, hamaŋ goyo. La naŋ mus jigerɗi, nan ma co'o ki sa ma kulla nala, naŋ ma wi liyna ma nan ma co kaŋŋaɗi. 4May sum sara'a ka kuɗaŋ hay Sardis, sa bay ges sligara visi tuwa, nisi ma poy hiɗi nanu hay sligar ma haɓna, kay nisi nagay kay kayni.

5Sa ma kolawana, nan ma cukum sligar ma haɓ talamu, nan ma ɦasam selem goy hay ɗerwelda vi irita noŋɗi, nan ma yum selem goy vok Bunu hiɗi sa sunda-wuralawna valamu.

6La sa humam ka'a kay humana, nam ma huma. Kayni mi va ma Ŋusta di tam ekklesiyata.

7Ɗo tam sunda-Lawna hay ziyda-Lawna ta ka hay Filadelfiya: Kayni mi va ma nam ma peldetna ma gasina dumna, nam ma klena vi David ka kalamna, nam ma as malam goyo, sa fi dukumɗi, nam ma as dukumu, sa fi malam goyɗi kaw.

8Nan wi lopna vaŋu. Humaŋu, nan col vokaŋu vun-ziyn ma goy maliya ma sa fi dukumɗi, kay donota vaŋ kiɗaya, may naŋ ŋom yoboyna vanawa, kay naŋ min puw vunaŋ kay semda vanɗi. 9Humaŋu, nan min vul sum sa hay sinagogŋa vi Satan hay ɓaŋu, nisi sa yi tuwsi ala si Yudiyana, may si Yudiyaɗi, kay nisi ka sini. Humaŋu, nan min marsiya kay nisi ma girif gaa vokaŋu, a nisi ma wi ala nan minaŋawa. 10Kay naŋ ŋom yoboyna ma so-tuwta hay nanu, nan kaw nan ma ŋomaŋu hay buura vi wakka ma min co gaa kay nagat kuɗulu, kay wak sum sa gaa kay nagata. 11Hini neeɗa ɦawa nan ma co'o. Va ma ka hay ɓaŋŋa naŋ ma vum dono'o, kay sa ma sli bogorayna vaŋɗi.

12Sa ma kolawa, nan ma muɗum goy mi dolla hay Tempella vi Lawna vanu, nam ma kal goy hayam pa loɗi. Nan ma ɗo sem Lawna hiɗi sem hoyok-ziyna vi Lawna vanu tam sa namna, Yerusalem ta wulita ta kulo tam Lawna vanu hay wuralawn pa min jikay gaa'a, hiɗi semda vanu ta wulita.

13La sa humam ka'a kay humana, nam ma huma. Kayni mi va ma Ŋusta di tam Ekklesiyata.

14Ɗo tam sunda-Lawna hay ziyda-Lawna ta hay Lawdikiya: Kayni mi dita vi nam ma Amenna,#3:14 Nam ma Amenna Min di'e nam ma coli kay gasita. sa ma di yoboyna ma ɗigera ma gasina, cawa'ta tunita vi slen ma Lawn lumna:

15Nan wi lopna vaŋu, naŋ may sleɗay goyɗi, naŋ may giy kuɗi kaw. May nan min kayn ala naŋ ma li sleɗe kla, kuwa kla. 16May kay naŋ zumalay lub-lub' ɦawa, naŋ may sle'ɗi, kuɗi kaw, kay na'ta nan min lo'otaŋ goy hay vunanu. 17Kay naŋ di ala: Nanu sa ma faraya, slena van ka ŋolo, va ma nan bay fum mayɗi. May kay naŋ mi sa ma ɗuw sari, sa ma maŋaya, hawi, dukiya, goy nala'a kaw, naŋ may wi kaynɗi, 18nan ɗekaŋ yali kay naŋ ma gus hay ɓanu ora ma waki-wak hay kuta, kay naŋ ma muɗ faraya, cuk sligar haɓ taŋu kaw, kay naŋ ma li ganiya, a sa wi nalata vaŋɗi, a naŋ ma gus mul ma set ira hay ɓanu kaw, kay naŋ ma muɗ wi'e. 19Nisi kaf sa nan minsina, nan gatsiya, watsi kaw. Kay na'ta laŋ ciwerta, hamaŋu kaw. 20Humaŋu, nan ka coli vun-ziyna, nan ka daba. La san human delenawa, la nam mal vun-ziynawa goyona, nan ma kal vo valamu, nan ma ti fun hiɗi namu, namu hiɗi nanu kaw.

21Sa ma kolawana, nan ma musum hiɗi nanu hay zlamda-mulda vanu, ki nan kolawa, nan musawa hiɗi Bunu hay zlamda-mulda valamu nala kaw.

22La sa humam ka'a kay humana, nam ma huma. Kayni mi va ma Ŋusta di tam ekklesiyata.

Currently Selected:

WID-ŊAYAYTA 3: Massana

Highlight

Copy

Compare