WID-ŊAYAYTA 2

Ɗerwelda tam ziyna-Lawna ma siɗiyana

Lop Ap 20:28-31

1Ɗo tam sunda-Lawna hay ziyda-Lawna ta hay Efesus: Kayni mi sle ma nam ma mok mislekŋa siɗiya hay ɓalam ta jufta dumna, nam ma poy jar sle ma ora siɗiya ma tun fitil kalamna: 2Nan wi sle ma naŋ lumna, nan wi lopna vaŋu hiɗi so-tuwta vaŋu. Nan wi ala naŋ as ziy sum sa joonɗi, sum sa yi tuwsi ala nisi si sa apostolayna, may nisi si apostolay gasiɗi, naŋ fisiyawa hay sinda. 3Naŋ ka hiɗi so-tuwta, naŋ ci lastawa kuɗ semda vanu, may naŋ min mak noŋɗi. 4May vana vaŋ ma nan minimɗin kayn ala, naŋ hin minda vaŋ ta jewtawa goyo. 5Humaŋ ma gaŋu kay liyn ma naŋ nig gaa hayam pana, hamaŋu, hotaŋ hay lopna vaŋ ma jewna, la naɗina, nan ma co kaŋu, vana vaŋ ma tun fitil kamna nan ma slum goy hay baŋalamna, la naŋ hamɗina. 6May va ka ŋomi kaŋ kep kayn ala, naŋ ka gawi hiɗi lopna vi sa nikolaytna, kayni mi lop ma nan ka gaw hiɗi namna kaw.

7Sa ma humam ka'a nam ma hum sle ma Ŋusta di tam sa Ekklesiyana: Sa ma kolawana, nan ma vulum a ti kuɗ vuɗ-guna vi irita ma ka hay Paradisna vi Lawna.

8Ɗo tam sunda-Lawna hay ziyda-Lawna ta hay Smirna: Kayni mi va ma nam ma yum ala ma jewna hiɗi ma cawna dumna, nam ma ay miti mit, may muɗawa iriya lo:

9Nan wi lasta ta naŋ ca'ta, hiɗi hawta vaŋ kaw -- may naŋ mi sa ma faraya -- hiɗi ŋulda vi nisi sa di ala nisi sum sa Yudiyana, may nisi si Yudiyaɗi, may sinagogayna vi Satan. 10Naŋ ma li nari kay lasta ta naŋ ma ca'ta ɗawnɗi, humaŋu, Matna ma cuk segen jargiya hay daŋgayna, kay nigi ma li waki-wak, nigi ma ci lasta ir buur doogo. Musaŋ jigere ta-ta hay mitta, nan min vulaŋ bogorayna vi irita.

11Sa ma humam ka'a, nam ma hum sle ma Ŋusta di tam sa Ekklesiyana. Sa ma kolawana, mitta ma'ta ma tun ɓa' talam noŋɗi. 12Do tam sunda-Lawna hay ziyda-Lawna ta hay Pergamum: Kayni mi va ma nam ma ka hiɗi kew-gaferaŋa ma siyam ma' pet hiliw-hiliw' hay ɓalamna dumna:

13Nan wi liyn ma naŋ ka musi hayamna, kayni mi liyn ma zlamda-mulda vi Satan ka haya. Naŋ vi semda vanawa, vida vaŋ ta kuɗanta naŋ may noya' goyɗi, hay li ma Antipas ma di-goyna van ma gasina nisi cum goy gal vigiya, hay liyn ma musta vi Satan kaw naŋ may noy vida goyɗi. 14May slen ka kaŋ ne' ne' ma nan minimɗina, kay sum segen ka jargiya, nisi ŋom hatta vi Balaam, nam hat tam Balak kay cuk nemda vok gurona vi Israyel, kay nisi ma ti ɗifinna vi lawayn ma waana, kay li zlata-bulo'o kaw. 15Nala kaw, sum segen ka kuɗaŋu, nisi hat hatta vi sa Nikolaytna. 16Hamaŋ goy wulini, la naɗi, nan ma co kaŋ koloyo, nan ma duraŋu hiɗi kew-gaferaŋa vi vunanu.

17Sa ma humam ka'ana, hinim hum sle ma Ŋusta di tam Ekklesiyata. Sa ma kolawana, nan ma vulum manna ma ŋayayna, hiɗi goor-hiɗiy ma haɓna, kulo kay goor-hiɗiy namna semda ta wuliya ka ɗoya ta sa mara wa' noŋɗi, may mi nam ma va'na tuta.

18Ɗo tam sunda-Lawna hay ziyda-Lawna ta hay Tiyatira: Slen kayni dum mi goora vi Lawna, ma iram ka ki sin-kuta nala, ma selem ka ki wayna ma wile'e nala,

19nan wi lopna vaŋu hiɗi ti-kamda vaŋu, vida vaŋu, lopna vaŋu, so-tuwta vaŋu hiɗi lopna vaŋu ma cawna ma ŋol suw ma jewna. 20May vana vaŋ ma nan minimɗin kayn ala: Cata ta ya' ala Yesabel, ta ɗuw tuwa' ki na' ti ta jobta-Lawna nalata, naŋ hina' hat sa sunda vanu, ɗutsi goyo kaw, kay nisi ma kal tuwsi hay poyta ta waata, kay nisi ma ti sliwna ma liy ɗifini tam lawayn ma waana. 21Nan vula' liyn kay hama, may na' min ham kay zlata-bulota va'ɗi. 22Humaŋu, nan min bura' gaa hay zlatta, nisi sa li zlata-bulota hiɗi na'a kaw, nan min kalsi hay lasta ŋolda, la nisi ham kay lopna va'ɗi. 23Gurona va'a nan ma cisi goy mati; ekklesiyat kaf ma wi ala nanu mi ma fek glesna hiɗi dikga, nan min vul mi gige gige jargiya kuɗ lopna valamu valamu.#2:23 Ɗuw kayni hay Yer 17:10. 24May tigi nigiya, nan digiya: Nigi segena sa ka hay Tiyatira, ki nisi di nala, nigi sa may wi sle ma zulla vi Satanɗi, nan fi di ala nan may tun jak ma nek mara'a kigiɗi, 25may va ma ka hay ɓigina nigi ma vum dono'o, ta-ta hay li ma nan ma hotaya.

26Tam nam ma kolawana, nam ma ŋom lopna vanawa ta-ta hay vattana, nan ma vulum ŋolda kay jaf-sumuna. 27Nan ma ŋomsi hiɗi zugulda ta kawaya, ki san to doway ma nagan goy nala, ki nan kay tuwanu fi dono na'ta ay vi Buni pa nala. 28Nan min vulum mislek ma fo liyna.

29La sa ma humam ka'a kay humana, nam ma huma. Kayni mi va ma Ŋusta di tam ekklesiyata.

Currently Selected:

WID-ŊAYAYTA 2: Massana

Highlight

Copy

Compare