WID-ŊAYAYTA 21

Dukalawna ma wulina hiɗi nagata ta wulita

1Nan wi dukalawna ma wuliya hiɗi nagata ta wuliya. Kay dukalawna ma jewna hiɗi nagata ta jewta vatay goyo, niy-lum ma ŋolla may loɗi. 2Kulo hay wuralawna kat Lawna pa, nan wi hoyok-ziyna ma peldetna siray gaa'a, kayni ti Yerusalem ta wulita, koti kot ki cata ta tuwa' koti jifiya kay jufa' min sla'a nala. 3Goy hay zlamda-mulda pa nan hum del ma ŋolla ma ka di ala: Ɗuwgiya, tabernaklena vi Lawna coowa jar sumuna. Nam ma li ziy jarsiya, nisi ma muɗ si sumuna valamu, Lawn kay tuwamu ma mus jarsiya. 4Nam ma ɦas zimiyn goy kirsi kafe, mitta ma li loɗi, yorta hiɗi tiyna hiɗi tuw-tita ma li loɗi, kay sle ma jewna vatawa goyo.

5Nam ma musi kay zlamda-mulda di'e: Ɗuwaŋu, nan min li slen pet goy wuliya. Nam danu: Ɗoŋu, kay yoboyna kayni mi yoboy ma gasi gasina. 6Nam danu: Slen laawa yo! nanu mi Alfa hiɗi Omega, tun cawta hiɗi dabaŋ-gu'ta. Sa ma kolawana, niy ma irina ma riŋ goy hay kaata pana nan ma vulumta a ci'e. 7Sa ma kolawana, nam ma fi slen pet voco'o, nan min mus mi Lawna valamu, nam ma muɗ mi goora vanu kaw. 8May sa naara, sa bay-vina, sa liwisna, sa ci matna, sa li zlata-bulo'o, sa li gul-yalda, sa girif lawayn ma waana, hiɗi sa ka sinda kaf, ir galla visiya ma li hay goloŋ ma ŋal hiɗi kuta hiɗi sufre; kayni ti mitta ta ma'ta.

9Bugol kayni sunda-wuralawna mara kep jar sa siɗiyana, sa tasa ma siɗiyana hay ɓisiya hobay hiɗi bakmara ma cawna, nam co tanu di tan ala: Naŋaya, nan min ɗekaŋ kay cat-goota, cata vi goor ɦu-dimina.

10Hay ŋusta pa, nam slan kulo hay hiɗiyt ŋolo ta fiyokka, nam ɗekan kay hoyok-ziyn ma peldetna, kayn ti Yerusalem ta siray gaa tam Lawna hay wuralawn pata,

11gajijita vi Lawna ay kuɗa'a, haraŋa va'a ŋray hiɗi hiɗiy ma gus lop suw pete, ki hiɗiyn yaspis ma ciliŋ ki kristal nala. 12Gulmunna va'a ŋolo, kulo fiyoko kaw. Vun-galana va'a doogo yam ma', sunda-wuralawna lakay tam vun-galana doogo yam ma' kaw. Semda ka ɗoy tam vun-gala namna, kayni semda vi jafna vi Israyel sa doogo yam ma'. 13Gal kuɗuwu vun-galan ɦidi, gal gaa'a vun-galan ɦidi, gal kayami vun-galan ɦidi, gal vulatiya vun-galan hiɗi kaw. 14Gulmunna ini kulo kay hiɗiy-ŋulon doogo yam ma', semda vi sa hatayna vi goor ɦu-dimina sa doogo yam ma'na ɗoy talamu.

15Nam ma ka law hiɗi nanu, zugulda ta ora ka hay ɓalamu, kay ŋaɓ hoyok-ziyna, vun-galana hiɗi gulmunna valamu. 16Hoyok-ziyn gefem fiɗi pet ŋray ca, fiyokka valamu ŋray ca hiɗi buɗukka valamu. Nam ŋaɓ hoyok-ziyna hiɗi zugulla, fiyokka valamu ir stade birim doogo yam ma', fiyokka valamu, buɗukka valamu hiɗi fiyokka valam ta kulota kaf ŋray ca. 17Nam ŋaɓ gulmunna, nam ir goldoŋ kis kalam dok-fiɗi yam fiɗi, kayni ti ŋaɓta vi sana hiɗi sunda-wuralawna.

18hoyok-ziyna koti hiɗi hiɗiyn yaspis, koti hiɗi or ma bay-rigasna, ɗuw ki vitrena nala. 19Sem gulmunna ma ini gaana vi hoyok-ziyna koti jifiya hiɗi hiɗiyn mara'a mara'a ma gus lop ŋolo. Hiɗiyn ma jewna mi yaspis, ma ma'na ma safir, ma ɦidina mi kalsedowan, ma fiɗina mi emerode, 20ma vaslna mi sardoniks, ma karkiyana mi sardowan, ma siɗiyana mi krisolit, ma glafandina mi beril, ma zleeŋena mi topaz, ma doogona mi krisopras, ma doogo yam kepna mi hiyasinte, ma doogo yam ma'na mi ametiste. 21Vun-galana ma doogo yam ma'na mi kermena doogo yam ma' kaw; vun-galana marige kaw ka hiɗi kermena kep kepe. Liyn ma lakka vi hoyok-ziyna koti hiɗi or ma bay-rigasna, ŋray ca hiɗi vitrena ma san as sar jaramna.

22Nan may wi Tempel hayam noŋɗi, kay Tempella valam kayni mi Lawna Bum-Sumuna hiɗi goor ɦu-dimina. 23hoyok-ziyn li haraŋi bay fatta bay tilla kaw, kay gajijita vi Lawna li haraŋi hayamu, goor ɦu-dimina mi haraŋa valamu. 24Jaf-sumuna ma poy hay haraŋa valamu, muliyana vi nagata ma co'o kay suburumu.#21:24 nay fi kayni hay Es 60:3-5. 25Vun-galana valamu sa as dukum hay falayt noŋɗi, kay ɗawni henjeta tay noŋɗi. 26Nisi ma mar suburta hiɗi sli-yamda kulota vi jaf-sumuna hay hoyok-ziy namna. 27Va ma liwisi as kal kalaf hayam noŋɗi, sa ma li slen ma liwisi lebo ka sinda as kal kalaf hayam noŋɗi, may kal kalaf hayam kayni si nisi sa sesi ɗoy hay defterta vi irita vi goor ɦu-dimina tuta.

Currently Selected:

WID-ŊAYAYTA 21: Massana

Highlight

Copy

Compare