WID-ŊAYAYTA 20

Mulda ta ir busat birim kepta

1Bugolda nan wi sunda-wuralawna mara kep jikay gaa hay wuralawn pa, klena vi zul ma wiŋŋa hiɗi lenje ma ŋolo ka hay ɓalamu. 2Nam vi guy-ŋolla, guy ma busayna ma yum Matna hiɗi Satan. Nam junumu ir busat birim kep. 3Nam gum gaa hay zul ma wiŋŋa, duk vun zulla kaw, gum vunam gaa'a kaw, kay nam ma ɗut jaf-sumun loɗi, ta-ta busat ta birim kepta vat tuwa. Bugol kayni nam ma butis goyo ir liyn neeɗa.

4Nan wi zlamayn-mulda. Sum sa lakay kalamna donota vuli tisiya kay ka kitata. Nan wi ciwta vi sum sa sumun kaasi yisi goyo kuɗ di-goyta kay Yesu, kuɗ yoboyna vi Lawna kaw, hiɗi nisi sa bay girif gaa vok muura hiɗi va ma sli tuw muura, sa bay fi tumda vi nimerona hay voksiya hiɗi ɓisiya kaw, wulini sum nisin muɗi iriya, nisi ti mulda hiɗi Kristu ir busat birim kep. 5Sum segena sa mitina may day kuloɗi ta-ta busat ta birim kepta vat tuwa. Kayni ti dayta-kulota ta jewta. 6Sle'ta hiɗi peldetta kay nisi sa min day kulo'o hay dayta-kulota ta jewta. Mitta ma'ta ma li gaŋeraŋ kisi loɗi, may nisi ma lak si muliyan-sa-ɗifinna vi Lawna hiɗi Kristu, nisi ma ti mulda hiɗi namu ir busat birim ɗaw'.

7Hay li ma busata ta birim kepta vatawana, Satan ma butis goyo hay daŋgayna valamu, 8nan ma kalay goyo kay ɗut sum sa hay gef-nagata ma fiɗin pete, Gog hiɗi Magog,#20:8 Hay Ezek 38:2 di ala Gog mulla vi Magog. kay toksi yisiya kay li duura. Ŋaɓta visiya ŋray ca ki ŋesl ma goloŋ kel niyna nala.

9Nisi jik kulo'o kay nagata, nisi sli kaŋŋa vi sa peldetna hiɗi hoyok-ziyna ma ŋaa ŋolla. May kut may kulo wuralawn pa, na' ŋalsi goyo. 10Matna ma ka ɗutsiya gumis hay zul ma kuta hiɗi sufre, liyn ma muura hiɗi sa jobta bay-gasina ka hayamna. Nisi ma li las ŋolo falayta hiɗi henjeta, hay vatɗita vatɗita.

Kitata ta cawta

11Bugol kayni nan wi zlamda-mulda ta ŋolo ta haɓ tal-tal', nan wi sa ma musi ka'na kaw. Vok iramu nagat hiɗi dukalawna muni jaŋi, nisi ma fi liyn kisi noŋɗi. 12Nan wi sa mitina sa ŋulona hiɗi sa gurayna kaw, lakay kulo vok zlamda-mulda. Ɗerwella mali goyo, ɗerwel mara mali goy lo, kayni mi ɗerwella vi irita. Sum sa mitina kitat kaay kisiya, gigekaw kuɗ lopna valamu valamu. 13Niy-lumna vul sum sa mit hayamna ay goyo, mitta hiɗi liyna vi mitta vul sa mitina visi ay goyo, gigekaw kitat kaays kalamu kuɗ lopna valamu valamu. 14Mitta hiɗi liyna vi mitta cuki hay goloŋ ma kuta, kayni ti mitta ta ma'ta. 15San gigekaw la semda valam may ɗoy hay ɗerwella vi iritɗina, gumis hay goloŋ ma kuta.

Currently Selected:

WID-ŊAYAYTA 20: Massana

Highlight

Copy

Compare