WID-ŊAYAYTA 22
22
1Nam ɗekan kay niy-lumna vi niyna vi irita, ciliŋ ki kristal nala, riŋay goy hay zlamda-mulda vi Lawna hiɗi goor ɦu-dimina pa. 2Jar hagata vi hoyok-ziyna hiɗi deŋel niyna ma' pet, guna vi irita ka'a, nam vuɗ vuɗna selem doogo yam ma', nam vuɗ vuɗna valamu hay tilla tilla kafe. Hum-gu namna gut jaf-sumuna kay yersi goyo. 3Va ma beɗay goyna ma li loɗi. Zlamda-mulda vi Lawna hiɗi zlamda-mulda vi goor ɦu-dimina ma tun hay hoyok-ziy namna. Sa sunda valamu ma sunumu, 4nisi ma wum iramu, semda valam ma ɗo kulo hay voksiya. 5Henjeta ma li loɗi, nisi ma gar haraŋa vi fitilla hiɗi fatta loɗi, kay Lawna Bum-Sumuna kay tuwamu ma li haraŋ kisiya, nisi ma ti mulda ta-ta hay vatɗita vatɗita.
Gatta ta vat hiɗi na'ta
6Nam danu: Yoboyna kayni nam gasi gasiya. Bum-Sumuna Lawna ma gi Ŋusta valam hay sa jobta-Lawna, gi sunda-wuralawna valamiya, kay ɗek sa sunda valamu kay sle ma min li vokay wulin ɗawni. 7Humgiya, nan ma co goboyo. Sle'ta ka kay sa ma ŋom yoboyna vi jobta-Lawna ma ɗoy hay ɗerwelda kayni.
8Nan Yohana mi ma hum slen kayni, nan mi ma wum hiɗi iranu kaw. Hay li ma nan hum slen kayni, wum hiɗi iranu kaw, nan her gaa sem sunda-wuralawna ma ɗekan kay slen namna, kay girifimu. 9May nam di tanu: Tel tuwaŋu kay li van kayni, nanu mi niraŋŋa hay lopna, nir ɓosiyom sa jobta-Lawna kaw, hiɗi nir nisi sa ŋom yoboyna ma ɗoy hay ɗerwelda kayni. Girifaŋgin mi Lawna.
10Nam di tanu: Yoboyna ma di hay ɗerwelda kayni, naŋ ma dukum vunam gaa hiɗi soonɗi, kay liyna ka goboyo. 11Sa ma min li bay-ɗigerta hinim li bay-ɗigerta valam tuwa, sa ma min li liwista hinim li liwista valam tuwa, sa ma min li peldetta hinim li peldetta valam tuwa, nam ma peldetna hinim li goy peldet tuwa. 12Humgiya, nan ma ma gosoyo. Nan ka mar wurakŋa van kanu kay wurak mi san gige gigekaw kuɗ lopna valamu valamu. 13Nanu mi Alfa hiɗi Omega, ma jewna hiɗi ma cawna, cawa'ta tunita hiɗi dabaŋ-gu'ta. 14Sle'ta ka kay nisi sa muz sligar-tuwna visi goyo, kay nisi ma fi liyna tam guna vi irita, kay cuk hay vun-galana vi hoyok-ziyna kaw. 15May goy jiya durnayna, sa li gul-yalda, sa li zlata-bulona, sa ci matna, sa girif lawayn ma waana hiɗi san gigekaw ma min sinda, ma ka sin kaw ka'a. 16Nan Yesu, nan gi sunda-wuralawna vanisawa kay di slen kayni goy tigiya hay ziyna-Lawna. Nanu mi sutayna hiɗi jafna vi David. Mislek ma wilena ma fo liyna.
17Ŋusta hiɗi cat-goota di'e: Naŋaya! Sa ma hum slen kayni, hinim di ala naŋaya! sa ma laat lumna, nam ma ma'a, sa ma mina, nam ma ci niyna vi irita bay wuraki. 18Nan di goyo tam gigekaw ma hum yoboyna ma jobta ma ɗoy hay ɗerwelda kayni ala: La sa cuk mara vunamu, bakmarana ma ɗoy hay ɗerwelda kayni, Lawna ma cuk mara vun falamna kaw. 19La sa yaw goy kuɗ yoboyn ma jobta ma ɗoy hay ɗerwelda kayni, ir ɓurawta valamu ma ka hay guna vi irita hiɗi hoyok-ziyn ma peldetna ma ɗoy hay ɗerwelda kayni Lawna ma yawam goyo kaw.
20Nam ma di goy kay slen kayni di'e:
Awa nan ma co gosoyo. Amen!
Naŋaya Bum-Sumuna Yesu.
21Slugota vi Bum-Sumuna vaya Yesu mus hiɗi nigi mus musge!
Currently Selected:
WID-ŊAYAYTA 22: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
