WID-ŊAYAYTA 13

Muura ma may goloŋ hay niy-lumna pana

1Bugolda nan wi muura mara'a ma jikay kulo goloŋ hay niy-lumna pa, ma miyokom doogo, yalam siɗiya, bogoray doogo ka kuluɓi kay miyokom ma doogona. Semda vi ŋulda ka tuni kay yalamu. 2Muura ma nan wi'e sli zinilla nala, selemu ki sem ursena nala, vunam ki vun zlona nala, guy ŋolla vulum donota valamu, zlamda valamu hiɗi gaŋeraŋa valamu. 3Yalam ta kepta ay ki na' kaay goy mil ŋolo nala, may mil namna citiy cit. Sum sa hay nagat kaf ka jiɓer kuɗ muura, nisi tap kuɗumu. 4Nisi girif gaa vok guy ŋolla, kay nam vul gaŋeraŋa mi muura; nisi girif gaa vok muura di'e: Sa ma ŋray hiɗi muura gige? Sa ma as durum kaw mi gige? 5Vunna vuli talamu kay di yoboy ma galakŋa hiɗi ŋulda, donota vuli talamu kay li ki kayn nala ta-ta hay ir til dok-fiɗi yam ma'. 6Nam mal vunam goyo kay ŋul Lawna, kay ŋul semda valamu, kay ŋul tabernaklena valamu, hiɗi nisi sa ka lakay hay wuralawna. 7Nam fi donot kay dur hiɗi sa peldetna, kay kol kisiya kaw, nam fi donot kay jaf-sumuna hiɗi sumuna hiɗi vun sumuna hiɗi nagat tarige tarige pet. 8Sum sa hay nagat kaf ma girif gaa vokomu, nisi sa hay tun cawta vi nagat pa, sesi may ɗoy hay ɗerwelda vi goor ɦu-dimina ma ay ŋataynaɗi.

9La sa humam ka'a kay huma, nam ma huma. 10Sa ma nagay a kal hay daŋgayna nam ma kal daŋgayna, sa ma nagay a kew-gaferaŋa calamna, kew-gaferaŋa ma calamu may.#13:10 ɓiretta kayni segen muɗa' ala: La sa ci hiɗi kew-gaferaŋa, ma cum hiɗi kew-gaferaŋa kaw Ct 9:6; Es 33:1; Mat 26:52. So-tuwta hiɗi vida vi sa peldetna ka tani.

Muura mara'a ma duɓi goy hay nagata pa

11Bugolda nan wi muura mara'a duɓi goy hay nagata pa, miyokomu ki goor ɦu-dimina nala, delem law ki guy ŋolla nala.

12Nam li lop hiɗi gaŋeraŋa vi muur ma jewna, vok iramu kaw, nam li a sum sa hay nagat kaf girif gaa vok muur ma jewna, ma tuwam ma kaay goy milla ay citiy cit'. 13Nam li ɗekka ma ŋulona, ta-ta kuta ta wuralawna nam jika'ay gaa kay nagata kir sumun kaf. 14Nam ɗut sum sa hay nagatna goyo hiɗi ɗutta ta hagat vuli talamu kay la' vok ir muura, nam di tam sum sa gaa kay nagata kay nisi ma ceɗ va ma sli tuw muura ma tuwam ay kaay goy mili, may wulini nam ka iriya lona. 15Donot vuli talamu kay vul suk ma irina mi va ma sli tuw muura, kay va ma sli tuw muura ma lawa, kay sum sa girif gaa vok muuraɗina nam ma cisi goy kafe. 16Nam ka li'e kay sumuna kaf, la si sa ŋulona lebo sa gurayna, sa farayna hiɗi sa hawna, sum sa goy butina lebo sa gorvona, kaf ma fi tumda hay ɓisi ta jufta lebo hay voksiya, 17kay la san may hiɗi tumda hiɗi semda hiɗi nimerona vi muura talamɗi, nam as gus vaɗi, nam as gus va goyɗi kaw.

18Tan kayni mi yalla. Sa ma yalla valam ka'a, nam ma ŋaɓ nimerona vi muura. Kay namu mi nimerona vi sana, nimerona valam kis-karkiya kalam dok-karkiya yam karkiya.

Currently Selected:

WID-ŊAYAYTA 13: Massana

Highlight

Copy

Compare